កីឡាការិនីខ្មែរ-អាមេរិក សុវណ្ណា នឹងមកកម្ពុជា មុនទៅវ៉ៃសង្វៀន ONE ដើមខែធ្នូ
- 2018-11-19 10:19:09
- ចំនួនមតិ 0 | ចំនួនចែករំលែក 0
កីឡាការិនីខ្មែរ-អាមេរិក សុវណ្ណា នឹងមកកម្ពុជា មុនទៅវ៉ៃសង្វៀន ONE ដើមខែធ្នូ
ចន្លោះមិនឃើញ
សព្វថ្ងៃជីវិតរបស់កញ្ញា អឹម សុវណ្ណា កំពុងមមាញឹកខ្លាំងណាស់។ នាងមិនត្រឹមតែតៀមឡើងសង្វៀន ONE: DESTINY OF CHAMPIONS នៅថ្ងៃសុក្រ ទី០៧ ខែធ្នូ ប៉ុណ្ណោះទេ នាងក៏នឹងមកលេងទឹកដីកំណើតកម្ពុជាជាលើកដំបូងខែក្រោយនេះផងដែរ។
អ្នកប្រដាល់ស្រីវ័យ ២៦ឆ្នាំ និយាយទាំងរំភើបថា៖«វាជាឱកាសធំណាស់ និយាយតាមត្រង់ទៅ ខ្ញុំមិនដឹងថាត្រៀមខ្លួនយ៉ាងមិចទេ ខ្ញុំទន្ទឹងចាំខ្លាំងមែនទែន»។ ការមកភ្នំពេញលើកនេះ គ្រាន់តែជាការចាប់ផ្ដើមលើកទីមួយ ហើយនឹងមានបន្តបន្ទាប់ទៀតសម្រាប់ជើងខ្លាំងពីរសាសន៍ ខ្មែរ-អាមេរិកាំង ដែលមានមូលដ្ឋាននៅ រដ្ឋកាលីហ្វរញ៉ា រូបនេះ។ «ដំបូងឡើយខ្ញុំស្មានថាត្រូវទៅម៉ាឡេស៊ីតែម្ដង ខ្ញុំរំភើបស្រាប់ហើយ ប៉ុន្តែដឹងអីបានឈប់នៅកម្ពុជាមុនសិន ខ្ញុំរឹតតែរំភើបខ្លាំងទៀត»។ សុវណ្ណា បានកើតក្នុងទីក្រុងឡុងប៊ិច ប៉ុន្តែរស់នៅក្រុងប៉ូម៉ូណា អាចនិយាយបានថាជាសហគមន៍ខ្មែរដែលមានប្រជាជនខ្មែរជាច្រើន និងអនុវត្តប្រពៃណីជាតិ។
«ខ្ញុំធំដឹងក្ដីឡើងក្នុងវប្បធម៌ខ្មែរ គោរពសាសនាព្រះពុទ្ធ ទៅវត្តទៅវ៉ា ហើយនិងប្រារព្ធបុណ្យចូលឆ្នាំខ្មែរនៅទីនោះ។ ខ្ញុំចេះនិយាយខ្មែរតិចៗទៀតពេលនៅពីតូច ប៉ុន្តែដល់ធំបន្តិចទៅខ្ញុំរៀងឆ្ងាយបន្តិចពីប្រពៃណីខ្មែរ។» ឱកាសដែលបានឡើងប្រកួតនៅឆាកក្បាច់គុនដ៏ធំនៅអាស៊ី មិនត្រឹមតែជួយដល់អាជីពជាអ្នកប្រដាល់នោះទេ ថែមទាំងជួយឲ្យនាងបានផ្សារភ្ជាប់មកឫសគល់ជាឈាមខ្មែរម្នាក់ដែរ។
«ខ្ញុំគិតថា វាជាឱកាសដ៏ល្អមួយដែលឲ្យខ្ញុំអាចផ្សារភ្ជាប់ជាមួយខ្លួនឯង ទៅនិងដើមកំណើតរបស់ខ្ញុំ។ សង្សាររបស់ខ្ញុំជនជាតិអ៊ីតាលី អញ្ចឹងខ្ញុំក៏ទទួលឥទ្ធិពលវប្បធម៌របស់អ៊ីតាលីបន្តិច ដល់ពេលអញ្ចឹងខ្ញុំក៏ចាប់ផ្ដើមចង់ដឹង ចង់រៀនពីវប្បធម៌ម្ដងទៀត»។ ថ្វីបើ ONE Championship ជាសង្វៀនប្រដាល់លើកទី៣ របស់នាងមកហើយក្ដី យ៉ាងណាមិញប៉ះជើងខ្លាំងរបស់ អ៊ុយក្រែន ម្ដងនេះមិនស្រួលប៉ុន្មានទេ។ ដោយសារគេមានបទពិសោធន៍ក្នុងទ្រុងច្រើនជាង ជាងកីឡាការិនីកម្ពុជា ដល់ទៅ ៦ដងឯណោះ។
សព្វថ្ងៃកីឡាការិនី ឯម សុវណ្ណា កំពុងហ្វឹកហាត់នៅក្លឹបប្រដាល់ Fight Science រដ្ឋឡូអែនជែលែស។ នាងត្រៀមរួចរាល់ហើយ ដើម្បីបង្ហាញពិភពលោកនូវស្នៀតថ្មីៗរបស់ខ្លួន បន្ទាប់ការប្រកួតកាលពីខែកុម្ភៈ ឆ្នាំ២០១៧ កន្លងទៅនេះ។ កាលនោះកីឡាការិនីកូនកាត់រូបនេះ ផ្ដួលគូប្រកួតត្រឹមតែ ៧៩ វិនាទី នៃការប្រកួតប៉ុណ្ណោះ ហើយបើនិយាយពីលើកទី១ វិញគឺ បញ្ចប់លឿនជាងនេះទៅទៀត គឺត្រឹមតែ ១៨ វិនាទី ប៉ុណ្ណោះ។
ការប្រកួតលើសង្វៀន ONE ឆាប់ៗនេះ មិនត្រឹមតែលើកកេរ្តិ៍ឈ្មោះជើងខ្លាំងដើមកំណើតខ្មែររូបនេះឲ្យខ្ពស់ត្រដែតថែមទៀតប៉ុណ្ណោះទេ ប៉ុន្តែ សុវណ្ណា សង្ឃឹមថាខ្លួននឹងមានឱកាសបានឡើងប្រកួតសង្វៀននៅព្រះរាជាណាចក្រកម្ពុជានៅថ្ងៃណាមួយមិនខាន។
គ្រូបង្វឹកឡាវថា ទម្រង់លេងកម្ពុជាថ្មីពិបាកសន្និដ្ឋាន
ក្រុមទាញព្រ័ត្រក្រសួងការពារជាតិ ប្រមូលពានជើងឯករាជធានី ទាំងស្រី និងប្រុស
ហ៊ិន ច័ន្ទនីរ័ត្ន ប្រកាសត្រៀមខ្លួនរត់ម៉ារ៉ាតុងដើមខែក្រោយនេះរួចរាល់ហើយ ចុះ Fan វិញ?
អត្ថបទ៖ Matias Andres