ធ្លាក់មែនតែគ្រូឡាវចង់បញ្ចប់ដោយពិន្ទុខ្ពស់ ខណៈគ្រូកម្ពុជាថាស្គាល់ដៃគូច្បាស់

2018-11-20 00:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមជម្រើសជាតិកម្ពុជា នឹងទទួលក្រុមឡាវនាវេលាម៉ោង ៦:៣០ នាទីល្ងាចនេះក្នុងការប្រកួតសន្សំពិន្ទុពូល A នៃព្រឹត្តិការណ៍ AFF Suzuki Cup 2018 នៅពហុកីឡដ្ឋានជាតិ។

លោក V.Sundram Moothy

កម្ពុជា និងឡាវមាន ០ ពិន្ទុដូចគ្នា ដោយកម្ពុជាឆ្លងកាត់ពីរប្រកួត ស្របពេលឡាវ៣ប្រកួត ចាញ់ទាំងអស់ដូចគ្នា។ ទាក់ទងការប្រកួតល្ងាចនេះលោក V.Sundram Moothy គ្រូបង្វឹករបស់ឡាវបានឲ្យដឹងថា ទោះក្រុមរបស់លោកធ្លាក់ចេញត្រឹមវគ្គនេះមែន តែក្រុមរបស់លោកក៏ចង់បានពិន្ទុខ្ពស់មួយផងដែរ។

ដូច្នេះលោកចង់ឲ្យកូនក្រុមទាំងអស់ប្រឹងប្រែងលេងឲ្យអស់ពីកម្លាំងកាយចិត្ត ដើម្បីស្វែងរកពិន្ទុល្អក្នុងពូល។ លោកមើលឃើញទម្រង់លេងរបស់កម្ពុជាថ្មី និងប្លែកដែលធ្វើឲ្យលោកពិបាកសន្និដ្ឋានអាចធ្វើបានល្អឬអត់ក្នុងការប្រកួតស្អែកនេះ។

ទន្ទឹមគ្នានោះលោក Felix គ្រូបង្វឹករបស់កម្ពុជាបានលើកឡើងដែរថា កម្ពុជាបានត្រៀមរៀបចំហ្វឹកហាត់មានរយៈពេលយូរសមរម្យ។ លោកមើលឃើញថា កីឡាកររបស់លោកស្វែងយល់បានច្រើនពីគំនិតអ្វីដែលគ្រូបង្វឹកចង់បាន។

លោក Felix

ទោះជាកីឡាកររបស់លោកបានប្រឹងប្រែងហ្វឹកហាត់ និងបានយល់ដឹងច្រើនពីការរៀបចំក្ដី លោកផ្ដាំផ្ញើទៅកាន់កីឡាករកម្ពុជាទាំងអស់ថា ត្រូវតែប្រុងប្រយ័ត្នឲ្យបានខ្ពស់សម្រាប់ការប្រកួតនេះ។ ក្រុមឡាវបានធ្លាក់ចេញពិតមែន ប៉ុន្តែពួកគេមានទម្រង់លេងល្អ និងអាចបង្កើតគ្រោះថ្នាក់ដល់កម្ពុជាគ្រប់ពេលវេលា។ ២ប្រកួតកន្លងមករបស់កម្ពុជាគឺចាញ់ ម៉ាឡេស៊ី ១-០ និងចាញ់ មីយ៉ាន់ម៉ា ៤-១។ ចំណែកក្រុមឡាវចាញ់ វៀតណាម ៣-០ ចាញ់ ម៉ាឡេស៊ី ៣-១ និងចាញ់មីយ៉ាន់ម៉ា ៣-១៕