ចាប់ពីថ្ងៃនេះបងប្អូនកម្មករ/ការិនី អាចធ្វើកុងបើកប្រាក់ខែតាម អេស៊ីលីដា បានហើយ

2018-11-20 08:22:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ម្សិលមិញនេះ ធនាគារ អេស៊ីលីដា ភីអិលស៊ី បានប្រកាសចុះហត្ថលេខាលើកិច្ចព្រមព្រៀងជាមួយសមាគម សមាគមរោងចក្រកាត់ដេរនៅកម្ពុជា (GMAC) ស្តីពីការប្រើប្រាស់សេវាបើកប្រាក់បៀវត្ស ដោយ បណ្ឌិត អ៊ិន ចាន់នី និង លោកឧកញ៉ា វ៉ាន់ ស៊ូអៀង។

បានន័យថាកម្មកររោងចក្រ ដែលនៅក្រោមសមាគមរោងចក្រកាត់ដេរនៅកម្ពុជាអាចធ្វើការបើកប្រាក់ខែតាមរយៈបញ្ជរ ទូរATM

បណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី មានប្រសាសន៍ថា ធនាគារ អេស៊ីលីដា ភីអិលស៊ី មានក្តីសោមនស្សរីករាយ ដោយបានចាប់ដៃគូសហប្រតិបត្ដិការជាមួយសមាគមរោងចក្រកាត់កាត់ដេរនៅកម្ពុជា (GMAC) ក្នុងការបម្រើសេវាបើកប្រាក់បៀវត្សជូនដល់កម្មករ-កម្មការិនីរោងចក្រកាត់ដេរ តាមរយៈសេវាធនាគារ អេស៊ីលីដា ភីអិលស៊ី ដោយបញ្ចូលទឹកប្រាក់ក្នុងគណនីប្រាក់បៀវត្សរបស់កម្មករ-កម្មការិនី ដោយប្រព័ន្ធអេឡិចត្រូនិក និងផ្តល់ភាពងាយស្រួល ឆាប់រហ័ស មានសុវត្ថិភាពខ្ពស់ ចៀសវាងនូវហានិភ័យផ្សេងៗ និងចំណេញពេលវេលាក្នុងការបើកប្រាក់បៀវត្សរ៍ដល់ដល់បងប្អូនកម្មករ-កម្មការនី ។

តាមរយៈកិច្ចព្រមព្រៀងនេះ ធនាគារ អេស៊ីលីដា ភីអិលស៊ី ផ្តល់មធ្យោបាយបើកប្រាក់បៀវត្សរ៍ងាយស្រួលប្រកបដោយប្រសិទ្ធភាពខ្ពស់ដល់កម្មករ-កម្មការិនី នៃរោចក្រកាត់ដេរដែលជាសមាជិកសមាគមរោងចក្រកាត់ដេរនៅកម្ពុជា (GMAC) ។ កម្មករ-កម្មការិនី អាចបើកប្រាក់បៀវត្សតាមរយៈអេស៊ីលីដា យូនីធីទាន់ចិត្ត (ACLEDA Unity ToanChet) អេធីអឹម (ATM) គ្រប់ពេលវេលា ២៤ម៉ោងក្នុង១ថ្ងៃ និង៧ថ្ងៃក្នុង១ សប្តាហ៍ ឬបញ្ជរបេឡានៅតាមការិយាល័យសាខាធនាគារ អេស៊ីលីដា ភីអិលស៊ី គ្រប់ខេត្ត-ក្រុងទូទាំងព្រះរាជាណាចក្រកម្ពុជា រៀងរាល់ម៉ោងធ្វើការដោយមិនគិតថ្លៃសេវា ។

ពិសេសជាងនេះទៅទៀត តាមរយៈសេវាអេស៊ីលីដាយូនីធីទាន់ចិត្ត កម្មករ-កម្មការិនី អាចធ្វើការផ្ទេរប្រាក់ទៅកាន់សាច់ញាតិ/បងប្អូន, បង់ថ្លៃប្រើប្រាស់ទឹក-ភ្លើង, ទិញកាតទូរស័ព្ទ, ពិនិត្យមើលទឹកប្រាក់ក្នុងគណនី និងប្រតិបត្តិការផ្សេងៗជាច្រើនទៀត រួមទាំងការទូទាត់ថ្លៃទិញទំនិញ និងសេវាកម្ម នានាតាមរយៈ QRCodeដែលមាននៅតាមទីតាំងដៃគូទាន់ចិត្ត របស់ធនាគារ អេស៊ីលីដា ប្រមាណជាង ១៦,០០០ ដៃគូ នៅទូទាំងប្រទេស ដោយមិនគិតថ្លៃសេវា ។

លោកឧកញ៉ា វ៉ាន់ ស៊ូអៀង ប្រធានសមាគមរោងចក្រកាកាត់ដេរនៅកម្ពុជា GMAC បានមានប្រសាសន៍ថា ធនាគារ អេស៊ីលីដា ភីអិលស៊ី បានជួយដល់កម្មករ-កម្មារិនីយ៉ាងច្រើន ហើយផ្ដល់នូវសុវត្ថិភាពខ្ពស់ និងឆាប់រហ័ស ជាក់ស្ដែង លោកក៏បានប្រើប្រាស់នូវសេវាធនាគារអេឡិចត្រូនិករបស់ ធនាគារ អេស៊ីលីដា ភីអិលស៊ី ជាពិសេស សេវាអេស៊ីលីដាយូនីធីទាន់ចិត្ត ផងដែរ។ លោកប្រធានសមាគម បានបញ្ជាក់ទៀតថា នៅពេលដែល កម្មករប្រើប្រាស់សេវារបស់ធនាគារ អេស៊ីលីដា ភីអិលស៊ី បងប្អូនកម្មករ-កម្មការិនីអាចចំណេញបានច្រើន ដោយអាចធ្វើការចាត់ចែងសាច់ប្រាក់ និងធ្វើប្រតិបត្តិការសេវាធនាគារតាមរយៈទូរស័ព្ទចល័តបានគ្រប់ពេលវេលា គ្រប់ទីកន្លែង។ ហើយលោកប្រធានសមាគមក៏បានលើកទឹកចិត្តដល់សមាជិក GMAC ទាំងអស់ឲ្យប្រើប្រាស់សេវាកម្ម របស់ធនាគារ អេស៊ីលីដា ភីអិលស៊ី ដើម្បីទទួលបាននូវអត្ថប្រយោជន៍ដ៏វិសេសវិសាលទាំងនេះ ។

អត្ថបទ៖ ថា ម៉ាលីដា

ពាក្យទាក់ទង