ឃើញឧទ្ធម្ភាគចក្ររុស្ស៊ីទំនើបៗពេក សម្ដេច ទៀ បាញ់ ស្នើឲ្យអ្នកមានៗទិញជិះ កុំឲ្យស្ទះផ្លូវ
- 2018-11-20 09:36:03
- ចំនួនមតិ 0 | ចំនួនចែករំលែក 0
ឃើញឧទ្ធម្ភាគចក្ររុស្ស៊ីទំនើបៗពេក សម្ដេច ទៀ បាញ់ ស្នើឲ្យអ្នកមានៗទិញជិះ កុំឲ្យស្ទះផ្លូវ
ចន្លោះមិនឃើញ
សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានសំណូមពរ ឲ្យម្ចាស់ក្រុមហ៊ុននៅស្រុកខ្មែរ និងមានទ្រព្យធនច្រើនៗ ងាកមកចាប់អារម្មណ៍ ប្រើប្រាស់ឧទ្ធម្ភាគចក្រ ដើម្បីកាត់ បន្ថយការកកស្ទះចរាចណ៍ និងចំណេញពេលវេលា។
សម្តេច ទៀ បាញ់ ថ្លែងបែបនេះ ចំពោះមុខតំណាងក្រុមហ៊ុនធំៗ នៅស្រុកខ្មែរនៅក្នុងពិធី តាំងពិព័រណ៍បង្ហាញ ការហោះហើរឧទ្ធម្ភាគចក្រទំនើប របស់រុស្ស៊ី នៅមូលដ្ឋានទ័ពអាកាសពោធិ៍ចិនតុង នាព្រឹកថ្ងៃទី២០ ខែវិច្ឆិកានេះ។
រដ្ឋមន្ត្រីក្រសួងការពារជាតិបានថ្លែងយ៉ាងដូច្នេះថា៖ «ខ្ញុំនឹងសំណូមពរ ឲ្យពួកគាត់ (ក្រុមហ៊ុន) ងាកមកមើល បើសិនមានលទ្ធភាព ក្នុងការប្រើប្រាស់ឧទ្ធម្ភាគចក្រ ដើម្បីបម្រើឲ្យការងារដែលខ្លួន មានលទ្ធភាពបាន គឺឲ្យគាត់ចាប់អារម្មណ៍។ចាប់អារម្មណ៍យកយន្ដហោះ ប្រភេទនេះ Ansat និងMI-171A2 ប្រសើរជាង”។»
បន្ថែមលើពីនេះទៀត ក្នុងពិធីទស្សនាការតាំងពិព័រណ៍ បង្ហាញការហោះហើរឧទ្ធម្ភាគចក្រ ប្រភេទ Ansat និងMI-171A2 របស់ក្រុមហ៊ុន RUSSIAN HELICOPTER របស់រុស្ស៉ី នៅព្រឹកនេះ សម្ដេចទា បាញ់ បង្ហើបថា នៅថ្ងៃអនាគត កម្ពុជានឹងទិញឧទ្ធម្ភាគចក្ររបស់រុស្ស៊ី ដែលយកមកបង្ហាញសមត្ថភាពនៅកម្ពុជា នាពេលនេះ។
មូលហេតុដែលរដ្ឋមន្ត្រីក្រសួងការពារជាតិ មានការចាប់អារម្មណ៍ព្រោះ ឧទ្ធម្ភាគចក្រយោធារបស់រុស្ស៊ីទាំងនេះ មានសមត្ថភាពខ្លាំង រឹងមាំ រហ័សរហួន និងអាចធានាបានសីតុណ្ហភាព ដក ៥០អង្សា និងបូក ៥០អង្សា ចំណែកឯល្បឿនរបស់វាគឺ ២៨០គីឡូម៉ែត្រក្នុងមួយម៉ោង។
សូមជម្រាបជូនថា នៅព្រឹកថ្ងៃទី២០ ខែវិច្ឆិកានេះ ឧទ្ធម្ភាគចក្ររុស្ស៊ីទំនើបៗ២គ្រឿង បានមកធ្វើការតាំងបង្ហាញនៅកម្ពុជា និងត្រូវយកទៅតាំងបង្ហាញបន្តបន្ទាប់ទៀតនៅប្រទេសវៀតណាម ថៃ និងម៉ាឡេស៊ី៕