សែម ឆវី បកស្រាយប៉ារ៉ូភាពយន្តគេល្បីពេញ FB ត្រង់វគ្គហៅកូនមកបញ្ចុកបាយបែរជាឲ្យកូនហូបខ្លួនឯង

2018-11-20 10:05:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែភាពយន្តខ្មែរ ដែលគេចែកចាយពេញបណ្ដាញសង្គម ត្រង់វគ្គមួយ ម្ដាយហៅកូនមកហូបបាយ ហើយបម្រុងបញ្ចុក តែម្ដាយបែរជាឲ្យកូនញ៉ាំខ្លួនឯងទៅវិញ បង្កជាការផ្ទុះសំណើចយ៉ាងខ្លាំង។ វីដេអូនេះ ធ្វើឲ្យប្រិយមិត្តជាច្រើនចង់ដឹងថា ប៉ារ៉ូរឿងពិតជាបែបនេះមែន ឬ យ៉ាងណា។

ទាក់ទិននឹងរឿងនេះ អ្នកស្រី សែម ឆវី តួសម្ដែងក្នុងរឿងផ្ទាល់តែម្តង បានប្រាប់ថា ប៉ារ៉ូរឿងពិតជាបែបនេះមែន តែអ្វីដែលគេចែកចាយពេញ Facebook នោះជាវីដេអូដែលគេកាត់មិនពេញលេញ ទើបមើលទៅគួរឲ្យអស់សំណើចបែបនេះ។ ឈុតឆាកពេញត្រង់វគ្គនេះ អ្នកស្រីថា គឺម្ដាយហៅកូនមកដើម្បីម្ដាយប្រុងបញ្ចុកកូនមែន តែចៃដន្យ ប្ដីមកដល់ផ្ទះក៏ស៊ីផ្លេទឺតៗនៅក្រៅផ្ទះ ឲ្យបើកទ្វារឲ្យ។ ម្ល៉ោះហើយ ស្ត្រីជាប្រពន្ធរវល់តែងើបទៅបើកទ្វារឲ្យប្ដី ក៏ប្រាប់កូនឲ្យហូបបាយខ្លួនឯងវិញទៅ។ អ្នកស្រី សុំឲ្យទស្សនិកជនទស្សានាភាពយន្តនេះទាំងមូល ទើបដឹងថាវគ្គនេះ មានន័យយ៉ាងណា។

តារាសម្ដែងរូបនេះ បន្តថា ឈុតឆាកនេះ គឺនៅក្នុងរឿង "ទឹកចិត្តម្ដាយ" ដែលនិពន្ធដោយ អ្នកស្រី ពាន់ ភួងបុប្ផា ជាភាពយន្តល្បីល្បាញកាលពីជាង១០ឆ្នាំមុន។

សម្រាប់អ្នកស្រី សេម ឆវី បានបញ្ចេញអារម្មណ៍ថា មានការភ្ញាក់ផ្អើលនៅពេលបើកមើល Facebook ហើយឃើញឃ្លីបវីដេអូនេះ ចំណែកស្វាមីអ្នកស្រីគឺលោក សារិន ហ្វីលីព វិញ ក៏មានការភ្ញាក់ផ្អើលដូចគ្នាផងដែរ៕