ប្លែកណាស់! លើកគ្នាមកចង់មួយភូមិ មកដុតក្រឡានក្ដៅៗ ទុកសំពះព្រះខែនៅភ្នំពេញ

2018-11-21 08:25:44
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រឡានរាប់រយ ខ្លះកំពុងដុតឡើងក្ដៅងំនៅលើភ្លើង ខ្លះទៀតកំពុងសកសម្បក បានប្រហើរយ៉ាងឈ្ងុយឈ្ងប់ នៅក្បែរស្ពានជ្រោយចង្វា កន្លែងដែលកីឡាករស្នាក់នៅ តាមបណ្ដោយដងទន្លេនៅរាជធានីភ្នំពេញ។ ប្រិយមិត្តដឹងទេ តើគេដុតក្រឡានទាំងនេះ ដើម្បីអ្វី?

តាមពិតក្រឡានទាំងនេះ គឺជាស្នាដៃរបស់អ្នកភូមិស្វាយដំណាក់ ឃុំជុំនីក ស្រុកក្រូចឆ្មារ ខេត្តត្បូងឃ្មុំ ដើម្បីគាំទ្រដល់ក្រុមកីឡាករអុំទូក ដែលជាទូករបស់ភូមិស្រុករបស់ពួកគាត់ គឺទូក «អម្ពវ័ន្តធីតារចនាមានជ័យ»។ ក្រៅពីទុកឲ្យក្រុមកីឡាករទទួលទាន និងសម្រាប់ទទួលភ្ញៀវ ដែលជាសប្បុរសជន ឧបត្ថម្ភទូកហើយនោះ ក្រឡានទាំងនេះ គឺធ្វើសម្រាប់ពិធីសំពះព្រះខែ ទុកអមជាមួយអំបុក។ នេះនើតាមការឲ្យដឹងពីលោក វ៉ាន់ ស៊ុត អ្នកគ្រប់គ្រងចំណុះទូកនេះផ្ទាល់។

តាមលោកវ៉ាន់ ស៊ុត បញ្ជាក់ទៀតថា អ្នកភូមិតែងប្រមូលគ្នាមកដុតក្រឡាននេះ ជារៀងរាល់ឆ្នាំ បើគិតមកដល់ឆ្នាំ២០១៨នេះ គឺជាឆ្នាំ ទី១៦ហើយ ពោលគឺឲ្យតែទូក «អម្ពវ័ន្តធីតារចនាមានជ័យ» មកប្រកួត អ្នកភូមិតែងតែមកដែរ។ លោកបន្តថា អ្នកភូមិ ក៏ដូចជាកីឡាករទាំងអស់បានមករាជធានីភ្នំពេញតាំងពីថ្ងៃទី១៩មក រហូតដល់ចប់ព្រះរាជពិធីបុណ្យអុំទូកទើបត្រឡប់ទៅវិញ។