កសិករ៖ កម្លាំងមនុស្សមានតែអ្នកវ័យចំណាស់ៗ ហើយទារថ្លៃឈ្នួលច្រូតថ្លៃទៀត
- 2018-11-22 02:08:14
- ចំនួនមតិ 0 | ចំនួនចែករំលែក 0
កសិករ៖ កម្លាំងមនុស្សមានតែអ្នកវ័យចំណាស់ៗ ហើយទារថ្លៃឈ្នួលច្រូតថ្លៃទៀត
ចន្លោះមិនឃើញ
កសិករខ្លះបានបែរមកប្រើកម្លាំងម៉ាស៊ីនដើម្បីច្រូតស្រូវជំនួសឲ្យការជួលកម្លាំងមនុស្ស ដោយហេតុថាពិបាករកជួល និងមានតម្លៃថ្លៃប្រហាក់ប្រហែលនឹងម៉ាស៊ីនដែរ។
បើតាមរបាយការណ៍ក្រសួងកសិកម្មការធ្វើកសិកម្មដោយប្រើកម្លាំងមនុស្សបានធ្លាក់ចុះពី៨០ភាគរយនៅឆ្នាំ១៩៩៣ និងបន្តធ្លាក់មកត្រឹម៦០ភាគរយនៅឆ្នាំ២០០៥ លុះនៅឆ្នាំ២០១៧ ធ្លាក់មកត្រឹម៤០ភាគរយ។
អ្នកស្រី អ៊ុំ ស្ដើង រស់នៅស្រុកទ្រាំង ខេត្តតាកែវ ថាអ្នកស្រីត្រូវបង្ខំចិត្តជួលម៉ាស៊ីនច្រូតវិញព្រោះមិនអាចរកជួលកម្លាំងមនុស្សបានទៀតទេសព្វថ្ងៃនេះ។ អ្នកស្រីអះអាងថាដោយសារតែអ្នកភូមិដែលមានកម្លាំងពេញវ័យចេញរកមុខរបរផ្សេងទៀតមិននៅចាំស៊ីឈ្នួលច្រូតស្រូវដូចមុនទេ។
អ្នកស្រីបន្តថា៖ «ឆ្នាំនេះតម្លៃឈ្នួលថ្លៃណាស់ម្នាក់៣ម៉ឺនរៀលក្នុងមួយថ្ងៃហើយអាចជួលបានតែអ្នកមានវ័យចាស់ៗ...ពិបាកបន្តិចព្រោះគាត់ធ្វើការមិនសូវរហ័សដូចក្មេងៗទេ...ឆ្នាំមុនថ្លៃឈ្នួលតែជាងពីរម៉ឺនរៀនទេក្នុងមួយថ្ងៃ»។
ចំណែកកសិករម្នាក់ទៀតគឺលោកហ៊ុន ហាំ បានឲ្យដឹងដែរថាគ្រួសារលោកទើបតែឈប់ជួលកម្លាំងមនុស្សច្រូតស្រូវរយៈ២ឆ្នាំចុងក្រោយនេះដោយសារតែលោកប្ដូរមកធ្វើស្រូវអ៊ីអ៊ាហើយស្រូវប្រភេទនេះវាមិនងាយដួល និងអំណោយផលល្អអាចច្រូតដោយម៉ាស៊ីនបាន។
លោកបន្តថាម៉្យាងទៀតលោកមិនចង់ចំណាយពេលវេលាយូរ និងម្យ៉ាងចំណាយថវិកាតិចជាងជួលកម្លាំងមនុស្សក្នុងការច្រូតកាត់ផងដែរ ខណៈកូនៗរបស់លោករវល់ការងារនៅរោងចក្រ។
លោកបន្តថា៖ «អញ្ចឹងខ្ញុំត្រូវជួលម៉ាស៊ីនច្រូតដើម្បីឲ្យងាយស្រួលហើយក៏ចំណាយថវិកាតិចជាងផងដែរ»។
ថ្វីបើយ៉ាងនេះក្តីក៏កសិករខ្លះនៅទ្រាំជួលកម្លាំងមនុស្សដែរ ដោយថាស្រែនៅឆ្ងាយពីផ្លូវពិបាកចូលម៉ាស៊ីនច្រូត និងស្រូវដួលជាដើម។
អ្នកស្រីអ៊ូច សុគន្ធា បានប្រាប់ Sabay ដែរថាអ្នកស្រីមានស្រែជម្រៅមួយកន្លែងដែលអាចទទួលផលបានពី២៥ទៅ៣០ស្បោងក្នុង១រដូវ។
អ្នកស្រីថាអ្នកស្រីនៅតែត្រូវការកម្លាំងមនុស្សច្រូតព្រោះបើជួលម៉ាស៊ីនពិបាកត្រង់ថាទី១ស្រែជ្រៅនៅមានទឹកត្រឹមជង្គង់ឯណោះហើយត្រូវបូមទឹកចេញទៀតបើជួលម៉ាស៊ីនច្រូត។
ហេតុផលមួយទៀតអ្នកស្រីថាការជួលម៉ាស៊ីនមកច្រូតស្រូវធ្វើឲ្យមានការខាតបង់ច្រើនព្រោះថាកន្លែងខ្លះស្រូវដួលរាបដល់ដីហើយថាម៉ាស៊ីនពិបាកច្រូតក្នុងស្ថានភាពបែបនេះ។
អ្នកស្រី សុគន្ធា បន្តថា៖ «បើជួលមនុស្សច្រូតបានផល៣០ស្បោង...ច្រូតម៉ាស៊ីនបានតែ២០ស្បោងយ៉ាងច្រើនបំផុត»៕
គួរបញ្ជាក់ថាតាមក្រសួងកសិកម្មប្រជាកសិករខ្មែរបានងាកមកប្រើម៉ាស៊ីនក្នុងវិស័យកសិកម្មជាង៩៦ភាគរយហើនៅពេលបច្ចុប្បន្ននេះ៕