កម្មវិធីជប៉ុនមួយ រងការរិះគន់ធ្ងន់ធ្ងរ ដោយផ្សាយព័ត៌មានមិនពិត ពីសម្ដីរបស់ Jimin
- 2018-11-24 02:52:11
- ចំនួនមតិ 0 | ចំនួនចែករំលែក 0
កម្មវិធីជប៉ុនមួយ រងការរិះគន់ធ្ងន់ធ្ងរ ដោយផ្សាយព័ត៌មានមិនពិត ពីសម្ដីរបស់ Jimin
ចន្លោះមិនឃើញ
កម្មវិធីផ្សាយរបស់ប្រទេសជប៉ុនមួយ ទទួលរងមតិរិះគន់ជាច្រើន ក្រោយផ្សាយព័ត៌មានខុសការពិត។
កាលពីថ្ងៃទី១៨ ខែវិច្ឆិកាកន្លងទៅនេះ កម្មវិធី "Leave It to Atko!” របស់បណ្ដាញផ្សព្វផ្សាយព័ត៌មាន TBS បានធ្វើសេចក្ដីរាយការណ៍ថា សមាជិកក្រុម BTS តារាចម្រៀង Jimin បានធ្វើការសុំទោសទៅកាន់ប្រទេសជប៉ុន ជុំវិញបញ្ហាអាវយឺតរូបគ្រាប់បែកបរមាណូរបស់លោក។ បើតាមកម្មវិធីមួយនេះដែរ បញ្ជាក់សម្ដីរបស់តារាចម្រៀង Jimin ថា៖ "ខ្ញុំបានបង្កការព្រួយបារម្ភ មិនមែនសម្រាប់តែអ្នកគាំទ្ររបស់ប្រទេសជប៉ុនប៉ុណ្ណោះទេ ប៉ុន្តែសម្រាប់អ្នកគាំទ្រទាំងអស់ជុំវិញពិភពលោក។ ខ្ញុំសុំទោសចំពោះអ្នកគាំទ្រក្នុងប្រទេសជប៉ុនផង"។
ទោះជាយ៉ាងណាក៏ដោយ អ្វីដែលតារាចម្រៀងរូបនេះ និយាយពិតប្រាកដនៅឯកម្មវិធីប្រគំតន្ត្រីក្នុងប្រទេសជប៉ុននោះគឺ៖ "ដោយសារតែស្ថានភាពខុសគ្នា ខ្ញុំគិតថាអ្នកទាំងអស់គ្នា និងមនុស្សជាច្រើនទៀតនៅជុំវិញពិភពលោក គឺមានការភ្ញាក់ផ្អើល និងព្រួយបារម្ភ។" លោកថែមទាំងបានបន្ថែមទៀតថា បញ្ហាមួយនេះ គឺធ្វើឲ្យលោកមានការឈឺចាប់ណាស់ ប៉ុន្តែលោកមិនបានបញ្ជាក់និយាយសុំទោសទៅកាន់ប្រទេសជប៉ុន ឬអ្នកគាំទ្រជប៉ុនដោយផ្ទាល់នោះទេ។
ក្រោយមក មហាជនកូរ៉េជាច្រើន មានការខឹងសម្បារ និងរិះគន់ទៅកាន់កម្មវិធីជប៉ុនមួយនោះជាខ្លាំង សម្រាប់ការផ្សាយព័ត៌មានខុសការពិតបែបនេះ។ ក្នុងចំណោមមតិរិះគន់ទាំងនោះដែរ មានមតិមួយចំនួន រិះគន់ខ្លាំងៗថា៖ "មនុស្សធ្លាប់កុហកពីមុន ឥឡូវនៅតែកុហកដដែល" “គាត់មិនបាននិយាយថាសុំទោសទេ។ ពាក្យនេះគឺជាអ្វីដែលជប៉ុនចង់ឭ ប៉ុន្តែគាត់មិនបាននិយាយទេ។ ព័ត៌មានក្លែងក្លាយ"។ "ជប៉ុន នៅតែជាជប៉ុន" “ជប៉ុនបង្កើតរឿងមិនពិត ដូច្នេះពួកគេអាចមានអារម្មណ៍ល្អជាងមុន"៕