អ្នកគ្រប់គ្រងកីឡាករទៅវ៉ៃនៅ ONE តស៊ូដើម្បីកម្ពុជាលើឆាកអន្តរជាតិ

2018-11-27 03:11:28
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកគ្រប់ក្រុមកីឡាករទៅប្រកួតនៅសង្វៀន ONE លោក Jose Conway បានមកស្រុកខ្មែរជាលើកដំបូងក្នុងឆ្នាំ ២០១៥ ដែលធ្វើឲ្យ លោកមិននឹកស្មានថាខ្លួនអាចភ្ជាប់និស្ស័យជាមួយកីឡាករគុនខ្មែរ ចាន់ រតនា ឡើយ។

លោក Conway និង ចាន់ រតនា សព្វថ្ងៃមានទំនាក់ទំនងជិតស្និត។ ពួកគាត់បានចាប់ដៃគ្នាដើរប្រមូលផ្តុំអ្នកស្នេហាវិស័យក្បាច់គុនពីប្រទេសមួយទៅប្រទេសមួយ ក្នុងឆន្ទៈលើកស្ទួយកីឡានេះដើម្បីប្រឡូកក្នុងពិភពគុនក្នុងស្តង់ដារកម្រិតខ្ពស់។ ពួកគាត់ក៏បានបញ្ចូលសមាជិកថ្មីទៀតផងដែររួមមានជើងខ្លាំងមកពីប្រទេសភូមា ភូ ថាវ និងកីឡាករខ្មែរ-អាមេរិក អម សុផាណារិទ្ធ។

ចាន់ រតនា (ស្តាំទី១) លោក Conway (ស្តាំទី២) សុផាណារិទ្ធ (ឆ្វេងទី១) និងភូ ថាវ

Conway ដែលមានដើមកំណើតនៅសហរដ្ឋអាមេរិកបានរំលឹកថា ៖«ខ្ញុំពិតជារំភើប ជាមួយអ្វីដែលពួកគាត់កំពុងធ្វើណាស់ ទាំងការបង្ហាត់ក្បាច់គុន និងការចាក់ដោតវប្បធម៌របស់ក្បាច់គុនខ្មែរ ក៏ដូចជាយុទ្ធគុនខម។ពេលនោះខ្ញុំបង្កើតកម្មវិធីសប្បុរសធម៌មួយឈ្មោះ ប្រយុទ្ធដើម្បីកម្ពុជា «Fight For Cambodia» ដើម្បីរកប្រាក់ទ្រទ្រង់វិស័យអប់រំ និង វិស័យក្បាច់គុន ជាអ្វីដែលក្លឹប«សិល្បៈ»ព្យាយាមធ្វើសព្វថ្ងៃនេះ»។

លោក Conway ដែលមានស្រុកកំណើតនៅទីក្រុងបូស្តុន និងមានជំនាញធនាគារ និងហិរញ្ញវត្ថុ ជឿជាក់ថា ខ្លួនអាចប្រើប្រាស់ជំនាញរបស់ខ្លួនដើម្បីជួយផ្សព្វផ្សាយពិភពលោកឲ្យបានខ្ទរខ្ទារបន្ថែមពីកីឡាក្បាច់គុនកម្ពុជា។

«យើងជួយគ្នាច្រើនទាក់ទងនឹងការឲ្យតម្លៃ ក៏ដូចជាឆន្ទៈក្នុងការប្រើប្រាស់ក្បាច់គុនចម្រុះសម្រាប់ជួយផ្លាស់ប្តូរជីវិតរបស់ពួកគាត់ឲ្យល្អឡើង។ យើងព្យាយាមធ្វើយ៉ាងណា ចូលរួមជួយពិភពលោកតាមរយៈក្បាច់គុន។ យើងជឿថា ក្បាច់គុនបង្រួបបង្រួមមនុស្សជាតិចូលគ្នា»។

នាថ្ងៃសុក្រ ទី៧ ខែធ្នូ ខាងមុខនេះ ចាន់ រតនា នឹងត្រូវប្រឈមមុខជាមួយជើងខ្លាំងវ៉ៃមិនធ្លាប់ចាញ់របស់ឥណ្ឌូណេស៊ី នៅក្នុងព្រឹត្តិការណ៍ដ៏ធំនៅអាស៊ី ONE: DESTINY OF CHAMPIONS ក្នុងទីក្រុងកូឡាឡាំពួរ ប្រទេសម៉ាឡេស៊ី។ ក្រៅពីមានវត្តមាន ចាន់ រតនា លើឆាកអន្តរជាតិនេះ កីឡាការិនីទើបរះថ្មី ឯម សុវណ្ណា ក៏ បង្ហាញខ្លួនតំណាងឲ្យកម្ពុជាដែរ។

ក្បាច់គុននៅតំបន់អាស៊ីអាគ្នេយ៍កំពុងរីកចម្រើនខ្លាំង ដោយសារមានស្ថាប័នប្រដាល់យក្សជាច្រើនបានដឹកនាំវិស័យនេះដូចជាសង្វៀន ONE Championship ជាដើមដែលបានផ្តល់ឱកាសឲ្យកម្ពុជាបញ្ចេញសមត្ថភាព ឡើងប្រយុទ្ធក្នុងកម្រិតស្តង់ដារ។

លោក Conway មើលឃើញពីទេពកោសល្យរបស់កីឡាករកម្ពុជា ប៉ុន្តែក៏ទទួលស្គាល់ថា កម្ពុជាត្រូវការផ្លាស់ប្តូរច្រើនទៀត បើចង់មានអ្នកប្រយុទ្ធខ្លាំងៗកម្រិតពិភពលោក។ លោកថា៖ «នៅក្នុងប្រទេស ម្នាក់ៗមានកម្រិតប្រហាក់ប្រហែលគ្នា ប៉ុន្តែពេលឡើងប្រកួតអន្តរជាតិទើបដឹងថា គេខ្លាំងៗ ដោយសារគេមានលុយសម្រាប់ការហ្វឹកហាត់ អាហារ ក្លឹបហាត់ពោរពេញដោយសម្ភារៈទំនើប សំបូរអ្នកជំនាញជួយបង្ហាត់ទាំងកម្លំាងកាយ និងស្មារតីស្របតាមគោលការណ៍ត្រឹមត្រូវ។ ប្រសិនបើយើងមានអ្វីៗគ្រប់គ្រាន់ដូចគេ យើងក៏មិនអន់ជាងគេដែរ។ យ៉ាងណា អ្វីដែលកីឡាករមានសព្វថ្ងៃក៏ល្អហើយ»។

ក្នុងឆ្នាំ២០១៨នេះឃើញថា ចលនាក្នុងវិស័យកីឡាកម្ពុជាជាច្រើនមានសកម្មភាពរួមទាំងការបើកសហព័ន្ធយុទ្ធគុនចម្រុះ កីឡាករ កីឡាការិនីជាច្រើនបានចេញទៅប្រកួតនៅក្រៅប្រទេសដូចជានៅសង្វៀន ONE Championship ជាដើម។

លោក Conway រំពឹងថា នៅឆ្នាំ២០១៩ខាងកម្ពុជា កីឡាគុនចម្រុះកម្ពុជា និងប្រដាល់គុនខ្មែរកាន់តែរីកសាយលើឆាកអន្តរជាតិ។ «ខ្ញុំបាននិយាយជាមួយលោក ហ៊ុន ច័ន្ទរាជ អំពីសហព័ន្ធយុទ្ធគុនចម្រុះកម្ពុជា ដើម្បីរកមធ្យោបាយធ្វើការជាមួយគ្នាសម្រាប់លើកស្ទួយវិស័យនេះ»៕

អត្ថបទ៖ Matias Andres