ឯម សុវណ្ណា រីករាយបានបង្ហាញខ្លួនលើសង្វៀន ONE ក្រោយរងចាំអស់១ឆ្នាំ

2018-11-27 09:16:48
ចំនួនមតិ 0 | ចំនួនចែករំលែក 0

ចន្លោះមិនឃើញ

កីឡាការិនីគុនចម្រុះខ្មែរ-អាមេរិក ឯម សុវណ្ណា ទីបំផុតមានឱកាសអាចបង្ហាញខ្លួនជាលើកដំបូងក្នុងកម្មវិធី ONE Championship ដែលនឹងត្រូវឡើងប្រកួតនៅថ្ងៃទី ៧ ធ្នូ ឆ្នាំ ២០១៨នេះនៅប្រទេសម៉ាឡេស៊ី។

សុវណ្ណា នឹងត្រូវតទល់ជាមួយកីឡាការិនីអ៊ុយក្រែន Iryna Kyselova ហើយកីឡាករ ចាន់ រតនាក៏នឹងត្រូវចូលប្រកួតក្នុងកម្មវិធីជាមួយគ្នានេះដែរ។ សុវណ្ណាបានចុះកុងត្រាជាមួយ ONE កាលពីចុងឆ្នាំ២០១៧ ប៉ុន្តែមិនទាន់បានប្រកួតម្ដងឡើយ ក្រោយមានបញ្ហារបួសកាលពីដើមឆ្នាំ២០១៨។

កីឡាការិនីមានដើមកំណើតនៅទីក្រុងឡុងប៊ិច សហរដ្ឋអាមេរិកមានប្រវត្តិប្រកួតល្អ វាយ២ដងផ្ដួលដៃគូឲ្យបោះបង់ការប្រកួតទាំងអស់។ នាងចាប់ផ្ដើមចូលហាត់ក្បាច់គុនចម្រុះក្នុងឆ្នាំ២០១២ មានការណែនាំពីមិត្តប្រុស ដោយដំបូងហាត់ក្បាច់គុនប្រដាល់និង Jui-Jitsu។ បន្ទាប់មកក៏បានសម្របខ្លួនរៀនក្បាច់គុនផ្សេងៗបន្ថែមទៀតរួមមាន ចំបាប់ យូដូ និងប្រដាល់សេរីគុនខ្មែរ។

“រឿងដំបូងដែលទាក់ទាញខ្ញុំឲ្យចូល ONE Championship គឺជាការពិតទស្សនវិស័យកម្មវិធីផ្ដោតលើតម្លៃក្បាច់គុនពិតៗដូចជាការគោរព លើកទឹកចិត្តនិងកិត្តិយស។ សម្រាប់ផ្ទាល់ខ្លួនខ្ញុំមើលឃើញសិល្បៈក្បាច់គុនគឺជាផ្នែកមួយសម្រាប់ពង្រឹងខ្លួនឯង ដូច្នេះខ្ញុំមិនខ្វល់ពីការនិយាយអាក្រក់ពីខាងក្រៅទេ។ ខ្ញុំពេញចិត្តពីរបៀប ONE ខិតខំផ្សព្វផ្សាយរូបភាពវិជ្ជមានមួយនៃសិល្បៈក្បាច់គុន មិនមែនជាកីឡាប្រើអំពើហិង្សា"។ សម្ដី សុវណ្ណា៕

អត្ថបទ៖ ហេង សុធារិទ្ធិ