“ព្រឹត្តិការណ៍ពិព័រណ៍ និងតន្ត្រីសប្បុរសធម៌លើកទី៦” ត្រឡប់មកវិញម្ដងទៀតហើយ តើមានអ្វីប្លែកសម្រាប់ឆ្នាំនេះ
- 2018-11-28 02:20:57
- ចំនួនមតិ 0 | ចំនួនចែករំលែក 0
“ព្រឹត្តិការណ៍ពិព័រណ៍ និងតន្ត្រីសប្បុរសធម៌លើកទី៦” ត្រឡប់មកវិញម្ដងទៀតហើយ តើមានអ្វីប្លែកសម្រាប់ឆ្នាំនេះ
ចន្លោះមិនឃើញ
“ព្រឹត្តិការណ៍ពិព័រណ៍ និងតន្ត្រីសប្បុរសធម៌លើកទី៦” ជាកម្មវិធីមួយដែលត្រូវបានរៀបចំឡើងដោយក្លឹបយុវជនកាកបាទក្រហមកម្ពុជាប្រចាំវិទ្យាស្ថានបច្ចេកវិទ្យាកម្ពុជា ដោយទទួលការអនុញ្ញាត និងគាំទ្រពីវិទ្យាស្ថានបច្ចេកវិទ្យាកម្ពុជា និងស្នាក់ការកណ្ដាលកាកបាទក្រហមកម្ពុជា ។ កម្មវិធីនេះនឹងប្រព្រឹត្តទៅនៅថ្ងៃសៅរ៍ ទី០៨ ខែធ្នូ ឆ្នាំ២០១៨ នេះ ចាប់ពីវេលាម៉ោង ៨:០០ នាទីព្រឹក រហូតដល់ម៉ោង ៩:០០ នាទីយប់ នៅវិទ្យាស្ថានបច្ចេកវិទ្យាកម្ពុជា ។
កម្មវិធី “ព្រឹត្តិការណ៍ពិព័រណ៍ និងតន្ត្រីសប្បុរសធម៌លើកទី៦” ត្រូវបានបង្កើតឡើងក្នុងគោលបំណងធំៗចំនួន ៣ គឺ៖
“ក្តីសង្ឃឹម” ជាគម្រោងទី១ នៃកម្មវិធី “ព្រឹត្តិការណ៍ពិព័រណ៍ និងតន្ត្រីសប្បុរសធម៌លើកទី៦” ដើម្បីជួយសម្រួលដល់ជីវភាពនិស្សិតក្រីក្រ ដែលកំពុងសិក្សានៅក្នុងឆ្នាំមូលដ្ឋាន នៃវិទ្យាស្ថានបច្ចេកវិទ្យាកម្ពុជា ដោយផ្តល់ជូនពួកគាត់នូវប្រាក់ឧបត្ថម្ភជារៀងរាល់ខែ ដើម្បីសម្រួលបន្ទុកលើការចំណាយមួយចំនួនរបស់ពួកគាត់ក្នុងការសិក្សា។
“មួយជំហានដើម្បីការអប់រំ” ជាគម្រោងទី២ នៃកម្មវិធី “ព្រឹត្តិការណ៍ពិព័រណ៍ និងតន្ត្រីសប្បុរសធម៌លើកទី ៦” ដែលត្រូវបង្កើតឡើងក្នុងគោលបំណងដើម្បីជួយដល់សាលាបឋមសិក្សាមួយចំនួននៅតាមតំបន់ដាច់ស្រយាលនៅក្នុងប្រទេសកម្ពុជា ដែលមានបញ្ហាខ្វះខាតទៅលើផ្នែកហេដ្ឋារចនាសម្ព័ន្ធមួយចំនួនក្នុងសាលារៀន ។
“ពន្លឺសប្បុរសធម៌” ជាគម្រោងទី៣ នៃកម្មវិធី “ព្រឹត្តិការណ៍ពិព័រណ៍ និងតន្ត្រីសប្បុរសធម៌លើកទី៦” ដែលបានបង្កើតឡើងដើម្បីជួយដល់និស្សិតទូទៅនៅក្នុងវិទ្យាស្ថាន ដែលជួបបញ្ហាផ្សេងៗដូចជា៖ គ្រោះថ្នាក់ចរាចរណ៍ មានជំងឺ សមាជិកណាម្នាក់ក្នុងគ្រួសារស្លាប់ដែលត្រូវការជំនួយឧបត្ថម្ភជាដើម តាមរយៈការជួយឧបត្ថម្ភជាថវិកាជូនដល់ពួកគាត់ ។
កម្មវិធី “ព្រឹត្តិការណ៍ពិព័រណ៍ និងតន្ត្រីសប្បុរសធម៌” ត្រូវបានប្រារព្ធឡើងនៅក្នុងវិទ្យាស្ថានបច្ចេកវិទ្យាកម្ពុជាជារៀងរាល់ឆ្នាំ ដោយមានអ្នកចូលរួមប្រមាណ ៣ ០០០នាក់ មកពី១៨គ្រឹះស្ថានឧត្តមសិក្សាទូទាំងរាជធានីភ្នំពេញ។
ជាមួយគ្នានេះដែរ កម្មវិធី “ព្រឹត្តិការណ៍ពិព័រណ៍ និងតន្ត្រីសប្បុរសធម៌លើកទី៦” ក៏មានការអញ្ជើញចូលរួមសម្ដែងពីសំណាក់តារាចម្រៀងប្រចាំផលិតកម្មរស្មីហង្សមាស ផលិតកម្មសាន់ដេ (Sunday) ផលិតកម្មថោន (Town) និងតារាចម្រៀង Original Song ល្បីៗផងដែរ។ ក្នុងនោះក៏មានការដាក់តាំងបង្ហាញនូវផលិតផល សេវាកម្មផ្សេងៗពីក្រុមហ៊ុនដែលជាដៃគូហាសការណ៍របស់យើង និងស្នាដៃរបស់និស្សិតប្រចាំមហាវិទ្យាល័យនីមួយៗ នៃវិទ្យាស្ថានបច្ចេកវិទ្យាកម្ពុជា។ អ្វីដែលពិសេសនោះ កម្មវិធី “ព្រឹត្តិការណ៍ពិព័រណ៍ និងតន្រ្តីសប្បុរសធម៌លើកទី៦” ក៏មានបញ្ចូលនូវផ្ទាំងទស្សនីយភាពល្ខោនបុរាណខ្មែរ ការសម្តែងក្បាច់គុណខ្មែរយុទ្ធក្រមខមមហានគរ ការសម្ដែងជាលក្ខណៈប្រពៃណី និងសម័យ ពីសំណាក់និស្សិតនៃវិទ្យាស្ថានបច្ចេកវិទ្យាកម្ពុជាផ្ទាល់ និងមានការរំាលេងកម្សាន្តនៅពេលល្ងាចផងដែរ ។
គួរបញ្ជាក់ផងដែរថា កម្មវិធី “ព្រឹត្តិការណ៍ពិព័រណ៍ និងតន្រ្តីសប្បុរសធម៌លើកទី៦” នឹងប្រព្រឹត្តទៅនៅថ្ងៃសៅរ៍ ទី០៨ ខែធ្នូ ឆ្នាំ ២០១៨ នេះ ចាប់ពីវេលាម៉ោង ០៨ : ០០ នាទីព្រឹក រហូតដល់ ០៩ : ០០ នាទីយប់ នៅវិទ្យាស្ថានបច្ចេកវិទ្យាកម្ពុជា ហើយតម្លៃសំបុត្រចូលរួមកម្មវិធី ត្រឹមតែ ៦ ០០០រៀល តែប៉ុណ្ណោះ ដែលអាចរកជាវបាននៅវិទ្យាស្ថានបច្ចេកវិទ្យាកម្ពុជា៕