សារ៉េថ្ងៃគ្នាឲ្យហើយទៅ! ៤កន្លែងទេសភាពស្អាតកប់សារី បានទៅលេងចុងឆ្នាំល្អបំផុត
- 2018-11-28 04:44:23
- ចំនួនមតិ 0 | ចំនួនចែករំលែក 0
សារ៉េថ្ងៃគ្នាឲ្យហើយទៅ! ៤កន្លែងទេសភាពស្អាតកប់សារី បានទៅលេងចុងឆ្នាំល្អបំផុត
ចន្លោះមិនឃើញ
ចុងឆ្នាំជាពេលវេលាដ៏ល្អបំផុត សម្រាប់មនុស្សគ្រប់គ្នា ធ្វើដំណើរកម្សាន្តទៅកាន់តំបន់ទេសចរណ៍នានា។ ថ្ងៃនេះសូមនាំប្រិយមិត្តទៅស្គាល់តំបន់ទេសចរណ៍ធម្មជាតិ ៤កន្លែង អាចនិយាយបានថា ប្រសិនបើទៅអំឡុងខែនេះ ឬចុងឆ្នាំ គឺមានទេសភាពស្អាតខ្លាំងតែម្ដង។ សូមទៅស្គាល់ទាំងអស់គ្នាណា៖
១. ភ្នំដូងកន្លែងកម្សាន្តថ្មីនៅកំពត
ភ្នំដូងជាកន្លែងដើរលេងថ្មីមួយទៀត មិនសូវមានអ្នកស្គាល់ ប៉ុន្តែបើនិយាយពីទេសភាពវិញស្អាតខ្លាំង បំផុត។ បើតាមយុវតីវ័យក្មេង ធាវី ទើបតែបានទៅដល់ទីនោះលើកទី១ ប្រាប់ Sabay ថានៅទីនោះស្ងប់ស្ងាត់ និងខ្យល់អាកាសបរិសុទ្ធល្អណាស់ ជាពិសេសមានដូងទេរស្អាតៗ ខ្សាច់ពណ៌ដូចមាស ស្អាតខ្លាំងពិបាករកអ្វីប្រដូច ឲ្យស័ក្ដិសមនឹងសម្រស់ដ៏ត្រកាលមួយនេះ។
អ្វីដែលធ្វើឲ្យយុវតីវ័យ១៨ឆ្នាំ ចូលចិត្តការថតរូបលេងកម្សាន្តកាន់តែភ្ញាក់ផ្អើលនោះ គឺមានភ្នំខ្ពស់ទាបហ៊ុមព័ទ្ធជុំវិញច្រូងច្រាង ជួយបង្កើតសម្រស់នៅទីនោះកាន់តែអស្ចារ្យឡើង មិនចាញ់ស្រុកគេឡើយ។ អ្នកខេត្តកំពតរូបនេះបន្តថា យើងអាចឈរពីកន្លែងនោះមើលឃើញទៅដល់ទឹកដីខេត្តកែប និងកោះត្រល់ទៀតផង។
ទើបតែទៅលើកទី១ដែរយុវតីរូបនេះប្រាប់ទាំងសើចកក្អឹកថា មិនទាន់ស្គាល់ឈ្មោះភូមិ ឃុំ នៅទីនោះទេ តែដឹងតែថា មានចម្ងាយប្រមាណ៧គីឡូម៉ែត្រប៉ុណ្ណោះពីទីរួមខេត្តកំពត ជិះទៅតាមផ្លូវវត្តត្រើយកោះ ហួសស្រែអំបិលបន្តិច នឹងទៅដល់ទីនោះហើយ។
២.ឧទ្យានជាតិវីរៈជ័យ
លាតសន្ធឹងលើផ្ទៃដីរាប់រយហិកតា គ្របដណ្ដប់ដោយវាលស្មៅដ៏ខៀវខ្ចី នៅលើកំពូលភ្នំដ៏ស្រស់ស្អាត មានដើមរុក្ខជាតិតូចធំ ទទួលពន្លឺព្រះអាទិត្យយ៉ាងច្បាស់ បានធ្វើឧទ្យានជាតិវីរៈជ័យក្លាយជាផ្ទាំងទស្សនីយភាពដ៏ទាក់ទាញបំផុត នៅលើទឹកដីខេត្តរតនគីរី និងស្ទឹងត្រែង។
ស្ថិតនៅភូមិភាគប៉ែកឦសាន នៃប្រទេសកម្ពុជា ឧទ្យានជាតិវីរៈជ័យ គឺជាកន្លែងលំហែអារម្មណ៍ និងស្រូបយកខ្យល់អាកាសដ៏ល្អបរិសុទ្ធមួយមិនគួរមើលរំលង។ ធម្មជាតិបានបង្កើតផ្ទាំងទស្សនីយភាពជាច្រើន ក្នុងឧទ្យានមួយនេះសឹងមិនជឿនឹងភ្នែកមានទាំងដើមឈើចម្រុះពណ៌យ៉ាងស្រស់បំព្រងនៅតាមដងអូរ និងសត្វព្រៃជាច្រើនកំពុងសំងំរស់នៅយ៉ាងមានសេចក្ដីសុខដូចជា សត្វស្វាកន្ទុយស ទោច ជ្រូកព្រៃ ឈ្លូស ប្រើស ខ្លាត្រី ខ្លាពពក ខ្ទីង និង ខ្លាឃ្មុំជាដើម។
ធ្វើដំណើរផ្សងព្រេងបន្តទៅមុខទៀត ភ្ញៀវទេសចរទាំងឡាយ នឹងភ្លាំងភ្លឹកស្មារតីជាមួយសម្រស់ទឹកជ្រោះដ៏ស្រស់ត្រកាលនៅកណ្ដាលព្រៃស្រោងមួយហៅថា ទឹកជ្រោះយក្សកែ។ ទឹកធ្លាក់ហូរពីលើកំពូលភ្នំ បង្កើតជាសូរសៀងគគ្រឹកគគ្រាក់ លាយឡំជាមួយសំឡេងសត្វយំ អឺងកង ចំណែកឯទឹកវិញថ្លាឈ្វេងមើលឃើញបាតដី ធ្វើឱ្យទប់អារម្មណ៍មិនជាប់ចង់តែងូតលេងឱ្យសប្បាយរីករាយ។
ដើម្បីទៅដល់ទីតាំងប្រៀបដូចឋានសួគ៌លើដីនេះ អ្នកទេសចរត្រូវធ្វើដំណើរប្រមាណ១៥គីឡូម៉ែត្រពីស្រុកតាវែងទៅដល់ភូមិមណ្ឌលយ៉ន អ្នកទេសចរត្រូវឆ្លងកាត់ទន្លេសេសាន និងអូរតាបូក។ តាមផ្លូវធ្វើដំណើរអ្នកទេសចរអាចមើលឃើញផ្កាព្រៃ ទេសភាពតាមដងព្រៃមិនចេះជិនណាយ។
៣. ទឹកជ្រោះកាចាញខេត្តរតនគីរី
ទឹកជ្រោះកាចាញ មានកម្ពស់ទឹកធ្លាក់១២ម៉ែត្រ បែបធម្មជាតិសុទ្ធសាធ ពុំបានកែច្នៃអ្វីឡើយ។ ភ្ញៀវ អាចលេងទឹកបានទាំងនៅខាងលើ ឬនៅខាងក្រោមក្បែរទឹកធ្លាក់ ហើយមានស្ពានយោលប្រវែងប្រហែល៣០ម៉ែត្រ ដែលសាងសង់កាលឆ្នាំ២០០៥ ផងដែរ។ ចំពោះឈ្មោះកាចាញ គឺដោយសារកាលពីយូរលង់ មានតាយាយ២នាក់ជនជាតិគ្រឹង ជាអ្នកធ្វើចម្ការរកឃើញជ្រោះនេះមុនគេ ក៏ត្រូវបានគេដាក់ឈ្មោះថា "ទឹកជ្រោះកាចាញ” រហូតដល់សព្វថ្ងៃ។ នេះបើតាមការរៀបរាប់របស់លោក ចៅ រ៉េត សមាជិកក្រុមប្រឹក្សាកាចាញ។
ក្រៅពីចំណុចសំខាន់ៗខាងលើ រមណីយដ្ឋានទឹកជ្រោះកាចាញ នៅមានផ្ទះកូនកំលោះ ផ្ទះកូនក្រមុំ តូបលក់វត្ថុអនុស្សាវរីយ៍និងលក់អាហារសម្រន់ជាដើម។ រីឯសំបុត្រចូលលេងកម្សាន្តភ្ញៀវបរទេស ៣០០០រៀល, ភ្ញៀវក្នុងស្រុក ៥០០រៀល, រថយន្តធំ (ឡានក្រុង) ១៥០០០រៀល, រថយន្តទេសចរណ៍ (សាមយ៉ុង) ៨០០០រៀល, រថយន្តតូច ៤០០០រៀល, កង់បី ៣០០០រៀល និងម៉ូតូតម្លៃ ១៥០០រៀល។
៤. តាតៃនៅកោះកុង
ទឹកជ្រោះតាតៃ កោះអណ្ដែត កោះសាឡៅ តំបន់ព្រះអាទិត្យរៀបលិច ព្រៃកោងកាង ការដើរកម្សាន្តព្រៃជាដើម គឺជាសក្ដានុពលដែលមាននៅរមណីយដ្ឋានអេកូទេសចរណ៍តាតៃ ដែលស្ថិតក្នុងទឹកដី ខេត្តកោះកុង ជាខេត្តមានសក្ដានុពលទេសចរណ៍ធម្មជាតិមួយរបស់កម្ពុជា។
ប្រសិនបើធ្វើដំណើរពីភ្នំពេញត្រូវឆ្លងកាត់ផ្លូវ ២៧០គីឡូម៉ែត្រ នោះលោកអ្នកនឹងទៅដល់តំបន់ទេសចរណ៍ តាតៃ ហើយប្រសិនបើធ្វើដំណើរពីទីរួមខេត្ត កោះកុងវិញនោះ មានចម្ងាយប្រហែល១៨គីឡូម៉ត្រ៕