សរុបលទ្ធផលត្រួសៗ BTS អាចរកបានដល់ទៅ ៤០លានដុល្លារពីការប្រគំតន្ត្រីទោលកន្លងមក

2018-12-01 08:42:57
ចំនួនមតិ 0 | ចំនួនចែករំលែក 0

ចន្លោះមិនឃើញ

យោងតាមការវិភាគរបស់ក្រុមហ៊ុន Yuanta Securities បានឲ្យដឹងថាបានការប៉ាន់ស្មាន BTS អាចរកបាន ៤៤,៩ពាន់លានវ៉ុន (ប្រមាណ ៤០លានដុល្លារ) ពីការប្រគុំតន្ត្រីទេសចរណ៍ជុំវិញពិភពលោក។

ជាទូទៅ សំបុត្រចូលមើលការប្រគំតន្ត្រីរបស់ BTS មានតម្លៃជាមធ្យម ១៣០ដុល្លារក្នុង ១សន្លឹក។ ប៉ុន្តែ មនុស្សមួយចំនួនអាចរកបានច្រើនជាងនេះទៀត ក្រោយទិញសំបុត្រ ហើយលក់បន្ត ដូចនេះពួកគេអាចរកបានក្នុង ១សន្លឹកចាប់ពី ៣០០ដុល្លារឡើងឯណោះ។

ភាពជោគជ័យសម្រាប់ការប្រគំតន្ត្រីនៅអាមេរិកខាងជើង និងប្រទេសផ្សេងទៀតនៅតំបន់អឺរ៉ុប កាន់តែអាចធ្វើឲ្យ BTS អាចរកចំណូលកាន់តែច្រើន។ លោក Park Sung Ho អ្នកតំណាងមកពីក្រុមហ៊ុន Yuanta Securities បានបញ្ជាក់ថា៖ "វាពិតជាពិបាកណាស់ដើម្បីសម្រេចភាពជោគជ័យពីការប្រគំតន្ត្រីនេះ នៅអាមេរិកខាងជើង ដូចនេះហើយទើបតារា K-Pop មិនប្រថុយចំពោះការងារនេះ។ ទោះជាយ៉ាងណា ក្រៅពីប្រទេសជប៉ុន តំបន់ខាងប៉ែកអឺរ៉ុបមានទីផ្សារល្អបំផុតក្នុងការកើបយកប្រាក់ចំណេញ ប្រសិនអ្នកអាចធ្វើវាបានដោយជោគជ័យនៅទីនោះ"។

អ្នកតំណាងដដែលបានបន្ថែមទៀតថា៖ "កន្លងមក តារា K-Pop ភាគច្រើនតែងទទួលជោគជ័យជាបន្តបន្ទាប់នៅប្រទេសជប៉ុន ប៉ុន្តែកម្រមានអ្នកធ្វើបាននៅអាមេរិកខាងជើង ឬតំបន់ខាងប៉ែកអឺរ៉ុបណាស់”។

យ៉ាងណាមិញ ក្រៅពី BTS តារាចម្រៀង G-Dragon គឺជាតារា K-Pop ដែលទទួលភាពជោគជ័ួយ៉ាងត្រចះត្រចង់ ក្រោយចេញដំណើរប្រគំតន្ត្រីទេសចរណ៍នៅអាមេរិកខាងជើង។ កាលពីឆ្នាំ ២០១៧ G-Dragon អាចរកបានដល់ទៅ ៧,៩លានដុល្លារឯណោះពីការប្រគំតន្ត្រីទោល។

សូមបញ្ជាក់ផងដែរថា BTS បានចាប់ផ្ដើមប្រគំតន្ត្រីទេសចរណ៍ពិភពលោករបស់ខ្លួនកាលពីខែកញ្ញា នៅអាមេរិកខាងជើង និងនៅខែតុលានៅតំបន់អឺរ៉ុប។ ថ្មីៗក្រុមក៏បន្តការប្រគំតន្ត្រី "Love Yourself” ក្នុងប្រទេសជប៉ុន ហើយតាមគម្រោងពួកគេ នឹងបន្តធ្វើដំណើរទៅកាន់ប្រទេសសិង្ហបុរី ហុងកុង និងថៃក្នុងឆ្នាំ ២០១៩៕

ប្រភព៖ Allkpop ប្រែសម្រួល៖ យី សុធារី