ក្រុមជំនាញចុះពិនិត្យទីតាំងសាងសង់ផ្លូវថ្មី១ខ្សែ លើភ្នំគូលែន មុនប្រជុំបច្ចេកទេសធំ១ នៅស្អែកនេះ
- 2018-12-03 10:00:00
- ចំនួនមតិ 0 | ចំនួនចែករំលែក 0
ក្រុមជំនាញចុះពិនិត្យទីតាំងសាងសង់ផ្លូវថ្មី១ខ្សែ លើភ្នំគូលែន មុនប្រជុំបច្ចេកទេសធំ១ នៅស្អែកនេះ
ចន្លោះមិនឃើញ
ក្រុមអ្នកជំនាញការអាដហុក នៃអង្គការយូណេស្កូរួមជាមួយមន្ត្រីអាជ្ញាធរជាតិអប្សរា និងមន្ត្រីបរិស្ថាន ព្រមទាំងភាគីក្រុមហ៊ុនសាងសង់ផ្លូវបានចុះពិនិត្យមើលការសាងសង់ផ្លូវថ្មីមួយខ្សែនៅលើភ្នំគូលែន។
ការពិនិត្យនេះគឺដើម្បីត្រៀមទទួលយោបល់កែលម្អ នៅក្នុងកិច្ចប្រជុំបច្ចេកទេស អាយស៊ីស៊ី-អង្គរលើកទី៣១ ដែលនឹងប្រព្រឹត្តទៅពីថ្ងៃទី០៤ ដល់ថ្ងៃទី០៥ ខែធ្នូ ឆ្នាំ២០១៨នេះ។
លោកបណ្ឌិត ឈាន រដ្ឋា ប្រធានស្ដីទីនៃនាយកដ្ឋានអភិរក្សប្រាសាទក្រៅឧទ្យានអង្គរ បានឱ្យដឹងថា ក្នុងដំណើរចុះទៅពិនិត្យរបស់ក្រុមអ្នកជំនាញការអាដហុក គឺក្នុងគោលបំណងពិនិត្យមើលនិងតាមដានការងារធ្វើផ្លូវនេះ ថាតើបានអនុវត្តន៍ត្រឹមត្រូវស្របតាមអនុសាសន៍ កន្លងមកដែរឬទេ ដើម្បីចៀសវាងផលប៉ះពាល់ធ្ងន់ធ្ងរដល់ព្រៃឈើ និងទីតាំងបុរាណដ្ឋានមួយចំនួនត្រូវការពារ។
បន្ថែមលើនេះ អ្នកជំនាញបានចុះពិនិត្យមើលរណ្ដៅកំណាយចំនួន ៩កន្លែង ដែលក្រុមការងាររបស់អាជ្ញាធរជាតិអប្សរាបាននិងកំពុងធ្វើកំណាយ ដើម្បីឱ្យដឹងថា តើនៅក្រោមដីដែលត្រូវធ្វើផ្លូវពីលើនិងនៅសងខាងផ្លូវដែលត្រូវធ្វើផ្លូវនោះ មានបុរាណដ្ឋាន ឬរចនាសម្ព័ន្ធអ្វីដែលគួរចៀសវាងឬអត់។
លោកបណ្ឌិត ឈាន រដ្ឋា បានបន្តឱ្យដឹងទៀតថា រណ្តៅចំនួន៩កន្លែង នៅក្នុងភូមិអន្លង់ធំនោះ ក្រុមការងារបានប្រទះឃើញមានបំណែកកុលាលភាជន៍តិចតួច និងបានប្រទះឃើញរចនា សម្ព័ន្ធធ្វើអំពីឥដ្ឋចំនួនមួយរណ្ដៅ តែមិនទាន់អាចសន្និដ្ឋានបានថាជាអ្វីឱ្យប្រាកដនៅឡើយទេ គឺត្រូវការពេលវេលាដើម្បីសិក្សាបន្ថែម។
ចំណែកយោបល់លើការធ្វើផ្លូវ ភាគច្រើនគឺ គោរពតាមអនុសាសន៍កន្លងមក និងមានកន្លែងតិចតួចប៉ុណ្ណោះដែលត្រូវពង្រីកធំ ដោយយោងទៅលើស្ថានភាពផ្លូវកោង ហើយយោបល់កែតម្រូវយ៉ាងណានោះ នឹងដឹងពិស្ដារ នៅក្នុងអង្គប្រជុំអាយស៊ីស៊ី-អង្គរ ស្អែកនេះ។