ស្ងាត់ៗ អតីតស្រីស្អាតលេខ១ ថោ សោម៉ាលីន លើកទាំងគ្រួសារមកលេងស្រុក

2018-12-06 03:14:48
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីទៅរស់នៅស្រុកគេអស់ពេលជាច្រើនឆ្នាំ នៅពេលនេះ អតីតស្រីស្អាតលេខ១ ឆ្នាំ២០០៤ ថោ សោម៉ាលីន បាននាំទាំងគ្រួសារមកលេងប្រទេសកំណើត លេងក្រុមគ្រួសារថ្មីៗ។

តាមការបញ្ជាក់របស់សាមីខ្លួន បានឲ្យដឹងថា នាងបានមកដល់កម្ពុជាកាលពីថ្ងៃទី ៣ ធ្នូ ២០១៨នេះ ក្នុងនោះនាងបានមកទាំងគ្រួសារតែម្ដង មានស្វាមី និងកូនតូចៗ២នាក់ ដើម្បីមកលេងប្រទេសកំណើតជាលើកដំបូងក្នុងឆ្នាំនេះ។ យ៉ាងណា មិនមែនជាលើកទី១ ក្រោយចាកឆ្ងាយស្រុកអស់១១ឆ្នាំនោះឡើយ។ "អឹម...និយាយទៅ ខ្ញុំមិនមែនទើបមកលើកទី១ទេបង តាំងចេញពីខ្មែរទៅស្រុកគេ ខ្ញុំធ្លាប់មកក្រុមគ្រួសារ លេងបងប្អូនដូចជា ៥-៦ដងរួចមកហើយ!”។

ចំពោះដំណើរលើកនេះ អតីតស្រីស្អាតលេខ១មកពីខេត្តព្រៃវែង ប្រាប់ថា ដូចគ្នានឹងដំណើរមុនៗដែរ គឺដើម្បីមកលេងគ្រួសារ និងជាពិសេស គឺនាំកូនៗទាំងពីរឲ្យមកស្គាល់ប្រទេសកំណើតរបស់នាង និងជួបជុំបងប្អូន។ ក្រៅពីនេះ នាងមិនមានគោលបំណងអ្វីពិសេសជាងនេះឡើយ ក្រៅពីដើរកម្សាន្តជាលក្ខណៈគ្រួសារ។ នៅថ្ងៃទី ៨ធ្នូ ខាងមុខនេះ សោម៉ាលីន ប្រាប់ថា នាងនឹងនាំកូនៗទៅលេងខេត្តសៀមរាប ទស្សនាប្រាសាទអង្គរដ៏ល្បីរបស់ខ្មែរ។

ថ្ងៃទី ២៨ ខែ ឆ្នាំ ដដែល សោម៉ាលីន និងគ្រួសារ នឹងត្រូវត្រឡប់ទៅញូវហ្សេលែនវិញ។ "អឹម...មកអត់បានយូរទេបង ត្រូវទៅវិញថ្ងៃ ២៨ ហ្នឹងហើយ ព្រោះស្វាមីខ្ញុំ គាត់ត្រូវធ្វើការ"។

ថោ សោម៉ាលីន បច្ចុប្បន្នមានវ័យ ៣៥ឆ្នាំ មកពីខេត្តព្រៃវែង ហើយនាង គឺជាអតីតស្រីស្អាតលេខ១ឆ្នាំ ២០០៤។ ក្រោយជាប់ជយលាភី សោម៉ាលីន មិនសូវនាងលូកដៃខ្លាំងប៉ុន្មានទេ ក្នុងសិល្បៈ។ លុះមកដល់ដើមឆ្នាំ ២០០៧ ដោយមានការគាំទ្រពីគ្រួសារ នាងបានទៅបន្តការសិក្សាជំនាញផ្នែកគ្រប់គ្រងនៅប្រទេសញូវហ្សេលែន ជាទីដែលនាងបានជួបជួននឹងស្វាមីជាជនជាតិកូរ៉េរបស់នាងបច្ចុប្បន្ន។

ពាក់ព័ន្ធនឹងការចាប់ផ្ដើមជីវិតគូ អតីតស្រីស្អាតលេខ១ ប្រាប់ថា ដើមឡើយស្វាមីរបស់អ្នកនាង គឺជាមិត្តរួមថ្នាក់ភាសាអង់គ្លេសរបស់នាង ក្នុងនាមជាមិត្តភ័ក្ដិធម្មតាប៉ុណ្ណោះ។ ក្រោយពីបញ្ចប់ការសិក្សាថ្នាក់ភាសាអង់គ្លេស ជ្រើសរើសជំនាញ ពួកគេក៏បែកគ្នាប៉ុន្មានឆ្នាំ លុះជួបគ្នាវិញ ក៏ដុះដាលមនោសញ្ចេតនាស្នេហាតែម្ដង។ "ក្រោយចប់ថ្នាក់ភាសាអង់គ្លេស ដល់វគ្គរើសជំនាញ ខ្ញុំយកផ្នែកគ្រប់គ្រង គាត់យក IT អីចឹងពួកយើងក៏បែកគ្នា...លុះ២-៣ឆ្នាំក្រោយមក យើងបានជួបគ្នាវិញ ហើយពេលជួបគ្នាវិញ យើងក៏ស្រឡាញ់ ហើយក៏រៀបការទៅ!"។

កូនប្រុស ស្រីរបស់ សោម៉ាលីន និងស្វាមី(រូបភាព៖ហ្វេសប៊ុក សោម៉ាលីន)

ថោ សោម៉ាលីន បានរៀបការនៅជាមួយស្វាមី ជនជាតិកូរ៉េនៅឆ្នាំ ២០១២ ហើយនៅដើមឆ្នាំ ២០១៣ នាងបាននាំស្វាមីរៀបការនៅប្រទេសកម្ពុជាម្ដងទៀត។ មកទល់បច្ចុប្បន្ននាង ទទួលបានបុត្រា បុត្រី ២នាក់ជាចំណងដៃ ក្នុងនោះ កូនស្រីបងអាយុ ៥ឆ្នាំ ឯកូនប្រុសប្អូន មានអាយុ ៣ឆ្នាំហើយ។ ដោយឡែកជីវភាពនៅប្រទេសញូវហ្សេលែនវិញ ថោ សោម៉ាលីន ប្រាប់ថា នាងមិនមានធ្វើអ្វីទេ គឺនៅផ្ទះមើលកូន ឯស្វាមីជាអ្នករាប់រងបន្ទុកគ្រួសារ៕

អត្ថបទ៖ ទារិកា