កាន់តែរំជួលចិត្ត! ថ្ងៃជូនដំណើរចុងក្រោយ Beat Richner មានសាច់ញាតិតែម្នាក់គត់មកពីស្វីស
- 2018-12-06 05:03:40
- ចំនួនមតិ 0 | ចំនួនចែករំលែក 0
កាន់តែរំជួលចិត្ត! ថ្ងៃជូនដំណើរចុងក្រោយ Beat Richner មានសាច់ញាតិតែម្នាក់គត់មកពីស្វីស
ចន្លោះមិនឃើញ
តាមការឲ្យដឹងពីក្រុមការងារ Sabay ដែលទៅផ្ដិតយកទិដ្ឋភាពដោយផ្ទាល់នៅខេត្តសៀមរាប ថ្ងៃដាក់តម្កល់អដ្ឋិធាតុរបស់ឯកឧត្ដមសាស្ត្រាចារ្យបណ្ឌិត Beat Richner មានសាច់ញាតិតែម្នាក់គត់ដែលមកពីទីក្រុងហ្សួរិច ប្រទេសស្វីស ញាត់ម្នាក់នោះ គឺត្រូវជាបងស្រីបង្កើតរបស់លោកវេជ្ជបណ្ឌិត គឺលោកយាយ Annaregula Lutz ដែលមានវ័យចាស់ជរាទៅហើយ។
ក្រៅពីលោកយាយ Annaregula Lutz គឺមានក្រុមមន្ត្រីមូលនិធិគន្ធបុប្ផា ដែលអមដំណើរមកជាមួយលោកយាយ។ លោកយាយ Annaregula Lutz បានមកដល់តាំងពីថ្ងៃទី០៥ ខែធ្នូ ម្សិលមិញនេះ ដើម្បីយកអដ្ឋិធាតុមកតម្កល់នៅមុខមន្ទីរពេទ្យគន្ធបុប្ផាខេត្តសៀមរាប តាមបណ្ដាំរបស់ប្អូនប្រុស។
នៅក្នុងពិធីដង្ហែអដ្ឋិធាតុរបស់ប្អូនប្រុស ចេញពីព្រលានយន្តហោះអន្តរជាតិខេត្តសៀមរាប និងពិធីដង្ហែនៅរាត្រី ថ្ងៃទី០៥ ខែធ្នូ ម្សិលមិញនេះ លោកយាយ បានសម្រក់ទឹកភ្នែក ជូនដំណើរប្អូនប្រុសទាំងមិនអស់អាល័យ។
នៅនៅព្រឹកថ្ងៃព្រហស្បតិ៍ ១៤រោច ខែកក្តិក ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី៦ ខែធ្នូ ឆ្នាំ២០១៨នេះ ព្រះមហាក្សត្រខ្មែរ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី និងព្រះមហាក្សត្រី ព្រះវររាជមាតាជាតិខ្មែរ នរោត្តម មុនិនាថ សីហនុ បានយាងដាក់កម្រងផ្កា និងគោរពវិញ្ញាណក្ខន្ធលោកវេជ្ជបណ្ឌិត Beat Richner ស្ថាបនិកមន្ទីរពេទ្យគន្ធបុប្ផា នៅចេតិយតម្កល់ធាតុរបស់លោកនៅមុខមន្ទីរពេទ្យគន្ធបុប្ផា ក្នុងក្រុងសៀមរាប ៕