ព្រះមហាក្សត្រយាងចូលរួមកម្មវិធីឧទ្ទិសកុសលវិញ្ញាណក្ខន្ធ ជូនលោកវេជ្ជបណ្ឌិត Beat Richner

  • 2018-12-06 05:45:00
  • ចំនួនមតិ 0 | ចំនួនចែករំលែក 42

ចន្លោះមិនឃើញ

តាមបណ្តាំ និងគោលបំណងចុងក្រោយ នៅ​ព្រឹក​នេះ មានពិធី​ដង្ហែ​អដ្ឋិធាតុ​ ឯកឧត្ដម​វេជ្ជបណ្ឌិត Beat Richner ​តាម​វិថី​សំខាន់​ៗ​មួយ​ចំនួន​ ក្នុង​ក្រុង​សៀមរាប​ ខេត្តសៀមរាប។

ព្រះករុណា ព្រះបាទ​សម្ដេច​ព្រះ​បរមនាថ នរោត្ដម សីហមុនី ព្រះ​មហាក្សត្រ​ និង​សម្ដេច​ព្រះមហាក្សត្រី​ ព្រះវររាជមាតា​ជាតិ​ខ្មែរ នៃ​ព្រះរាជាណាចក្រ​កម្ពុជា ក៏យាងបាន​ចូលរួម​ព្រះ​រាជ​ពិធី​សង្ឃទាន​ឧទ្ទិស​កុសល​ ជូន​ចំពោះ​វិញ្ញាណក្ខន្ធ​សព​ ឯកឧត្ដម​វេជ្ជបណ្ឌិត​ផង​ដែរ។

ព្រះ​រាជ​ពិធី​សង្ឃទាន​ បានរៀបចំក្រោម​អធិបតីភាព​ព្រះមហាក្សត្រ ឧទ្ទិស​កុសល​ជូន​ចំពោះ​វិញ្ញាណក្ខន្ធ​សព​ នៅ​ក្នុង​បរិវេណ​នៃ​មន្ទីរ​ពេទ្យ​ជ័យវរ្ម័ន​ទី៧ ក្រុង​សៀមរាប ខេត្ត​សៀមរាប។

ក្រៅពីព្រះរាជអធិបតីភាពដ៏ខ្ពង់ខ្ពស់បំផុតរបស់ព្រះករុណា កម្មវិធី​នេះ ក៏មានបុគ្គលិកមន្ទីរពេទ្យគ្រប់ជាន់ថ្នាក់ ប្រមាណ១ពាន់នាក់ រួម​នឹង​អ្នក​ចូលរួម​ផ្សេង​ទៀត​ ដូចជាសិស្ស និស្សិត និងប្រជាពលរដ្ឋជាច្រើននាក់។

មក​ទល់​ពេល​នេះ​កម្មវិធី​សង្ឃទាន​ បាន​ចប់​សព្វ​គ្រប់​ហើយ។ គួរ​រំលឹក​ថា ពិធី​សង្ឃទាន​ធ្វើ​ឡើង​បន្ទាប់​ពី​អដ្ឋិធាតុ​របស់​សព​ឯកឧត្ដម​វេជ្ជបណ្ឌិត​ ត្រូវ​បាន​សាច់​ញាតិ និង​ថ្នាក់​ដឹកនាំ​មូល​និធិគន្ធ​បុប្ផា​ស្វីស​ បាន​នាំ​មក​ពី​ប្រទេស​ស្វីស​ ដែល​ជា​ស្រុក​កំណើត​របស់​លោក មក​កាន់​ខេត្ត​សៀមរាប តាម​បណ្ដាំ និង​បំណង​ចុង​ក្រោយ​របស់​លោក​វេជ្ជបណ្ឌិត Beat Richner កាល​នៅ​មាន​ជីវិត។


អត្ថបទ៖ ពៅ រក្សា