ក្រោយជាប់ឈ្មោះ "អាត្មានិយម" ធ្វើឲ្យជើងហោះហើរពន្យារ Jimmy ចេញមុខបកស្រាយភ្លាម

2018-12-07 03:02:18
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាល្បីជំនាន់ទសវត្សរ៍ ៩០ Jimmy Lin ទទួលបានក្ដីស្រឡាញ់ពីអ្នកគាំទ្រជាច្រើនអស់រយៈពេលជាង ២០ឆ្នាំហើយ ហើយតារារូបនេះក៏មិនដែលមានព័ត៌មានមិនល្អប្រឡាក់ជាប់ខ្លួនដែរ លើកលែងពេលនេះលោកបានធ្វើឲ្យបណ្ដាញផ្សព្វផ្សាយផ្ដោតលើគ្រប់គ្នាព្រោះរឿងហេតុមួយ។

កាលពីថ្ងៃទី ២៩ ខែវិច្ឆិកា Jimmy បានរៀបចំហោះហើរពីទីក្រុងហុងកុង ទៅកាន់តៃវ៉ាន់។ ពេលនោះដែរ ការហោះហើររៀបចំជិតចេញដំណើរ ហើយអ្នកដំណើរក៏អង្គុយតាមកន្លែងរៀងៗខ្លួន ប៉ុន្តែ Jimmy ឯណេះវិញបែរជាសុំត្រួតពិនិត្យវ៉ាលីរបស់ខ្លួន។

ផ្អែកតាមប្រភពព័ត៌មានមួយ ជើងហោះហើរនៅពេលនោះត្រូវពន្យារ ប្រមាណកន្លះម៉ោង ដើម្បីទុកពេលឲ្យជំនួយការរបស់ Jimmy ត្រួតពិនិត្យ និងយករបស់របររបស់លោកទុកដាក់ឲ្យស្រួលបួលវិញ។

បើទោះបី Jimmy ជាមនុស្សសុភាពរាបសារ ចេះគួរសម និងសុំទោសដល់គ្រប់គ្នានៅទីនោះក៏ដោយ ប៉ុន្តែលោកក៏ត្រូវអ្នកដំណើរជាមួយគ្នារអ៊ូរទាំ ថែមទាំងរាយការណ៍ប្រាប់បណ្ដាញផ្សព្វផ្សាយហុងកុងទៀតថា តារាប្រុសរូបនេះធ្វើឲ្យពួកគេខាតពេល ៣០នាទី ហើយទង្វើបែបនេះពិតជាអាត្មានិយមណាស់។

ដោយឡែកបើតាមក្រុមហ៊ុនអាកាសចរណ៍ Cathy Pacific បានឲ្យដឹងថា ទ្វារយន្តហោះបានបិទនៅ ម៉ោង ១០ និង៥៦នាទីយប់ រីឯម៉ោងដែលត្រូវហោះហើរ គឺនៅបន្ទាប់ពីពន្យារពេលប្រមាណ ២ ទៅ៣នាទីប៉ុណ្ណោះ ពោលគឺម៉ោង ១០ និង៥៨នាទី។ ចំណែកម៉ោងដែលរំពឹងថាទៅដល់ទីក្រុងតៃប៉ិគឺ ១២ និង៣២នាទី ដូចនេះមិនមានការបន្លាយពេលយូរពេកនោះទេ។

សម្រាប់ Jimmy Lin វិញក៏បានចេញមុខទទួលខុសត្រូវនូវទង្វើរបស់ខ្លួន ដោយបង្ហោះសុំទោស និងបញ្ជាក់រឿងពិតនៅលើគណនី Weibo របស់ខ្លួន។ សំណេរសុំទោសនោះមានន័យដូចតទៅ៖

“ជាការពិតមែនហើយដែលនៅពេលជិតចេញដំណើរ យើងស្រាប់តែដឹងថាភ្លេចរបស់សំខាន់មួយ។ ពេលនោះខ្ញុំក៏សួរជំនួយការរបស់ខ្ញុំដើម្បីសុំខាងក្រុមការងារជើងហោះហើរ ទៅរករបស់នោះ។ ពេលនោះដែរ ជើងហោះហើរក៏នៅតែចេញដំណើរទាន់ពេលតាមគ្រោងទុក ហើយរឿងហេតុដែលកើតឡើងចៃដន្យរបស់ខ្ញុំនោះ ក៏មិនបានធ្វើឲ្យដំណើរការហោះហើរមានការយឺតយ៉ាវ ឬត្រូវចុះចតបន្ទាន់ឡើយ មានតែទៅដល់មុនមួយនាទីទៀតផង”។

បន្ថែមពីលើនេះ លោកក៏បានក្រើនរម្លឹកទៅគ្រប់គ្នា តាមរយៈមេរៀនដែលលោកបានជួបលើកនេះ ដោយបញ្ជាក់ថា សូមឲ្យអ្នកដំណើរទាំងអស់កាន់របស់របរជាប់ជាមួយជានិច្ច កុំឲ្យភ្លេចភ្លាំង ព្រោះវាសំខាន់ណាស់៕

ប្រភព៖ jaynestars ប្រែសម្រួល៖ យី សុធារី