ក្រុមហ៊ុនវៀតណាមបោះទុនវិនិយោគនៅកម្ពុជាច្រើនជាង៣០ដង បើធៀបនឹងកម្ពុជាវិនិយោគនៅវៀតណាម

2018-12-07 04:32:17
ចំនួនមតិ 0 | ចំនួនចែករំលែក 0

ចន្លោះមិនឃើញ

រដ្ឋមន្ត្រីក្រសួងពាណិជ្ជកម្មឲ្យដឹងថាបច្ចុប្បន្នវៀតណាមជាដៃគូពាណិជ្ជកម្មធំទីប្រាំរបសកម្ពុជា និងបានជំរុញប្រទេសទាំងពីរបង្កើនទំហំពាណិជ្ជកម្មឲ្យបានដល់ប្រាំពាន់លានដុល្លារនៅពេលខាងមុខ។

(ឯកឧត្តម ប៉ាន សូរស័ក្កិ រដ្ឋមន្ត្រីក្រសួងពាណិជ្ជកម្មថ្លែងក្នុងពិធីបិទវេទិកាធុរកិច្ចវៀតណាម-កម្ពុជាកាលពីម្សិលមិញ/រូបភាព៖ ក្រសួងពាណិជ្ជកម្ម)

នៅលើទំព័រហ្វេសប៊ុករបស់ក្រសួងពាណិជ្ជកម្មនៅព្រឹកនេះបានសរសេរថាឯកឧត្តម ប៉ាន សូរស័ក្កិ រដ្ឋមន្ត្រីក្រសួងពាណិជ្ជកម្មបានលើកឡើងបែបនេះកាលពីម្សិលមិញក្នុងពិធីបិទវេទិកាធុរកិច្ចវៀតណាម-កម្ពុជាកាលពីម្សិលមិញ។

បើតាមប្រភពខាងលើទំហំនៃការដោះដូរពាណិជ្ជកម្មរវាងកម្ពុជា-វៀតណាមក្នុងឆ្នាំ២០១៧មានចំនួន៣,៨ពាន់លានដុល្លារ។ កាលពីឆ្នាំ២០១៥ ប្រទសទាំងពីបានចុះកិច្ចព្រមព្រាងពង្រីកទំហំពាណិជ្ជកម្មប្រទេសទាំងពីរឲ្យបានដល់៥ពាន់លានដុល្លារនៅពេលខាងមុខ។

ឯកឧត្តម ប៉ាន សូរស័ក្កិ បានឲ្យដឹងទៀតថា៖ «បច្ចុប្បន្នវៀតណាម គឺជាដៃគូវិនិយោគធំបំផុតទី៥ របស់កម្ពុជា ការវិនិយោគរបស់ក្រុមហ៊ុនវៀតណាម នៅប្រទេសកម្ពុជា មានប្រមាណ២០៦គម្រោង ស្មើនឹងទឹកប្រាក់ ៣,០២ប៊ីលានដុល្លារ ខណៈក្រុមហ៊ុនរបស់កម្ពុជា វិនិយោគនៅប្រទេសវៀតណាម មានត្រឹមតែ១៨ម្រោង ស្មើនឹងទឹកប្រាក់ ៥៨,១លានដុល្លារប៉ុណ្ណោះ»។

ប្រភពដដែលបន្តថា៖«ឯកឧត្តមរដ្ឋមន្ត្រី ក៏បានសង្កត់ធ្ងន់ពីសារៈសំខាន់នៃការអនុវត្តអនុសាសន៍ប្រមុខរដ្ឋប្រទេសទាំងពីរ និងសេចក្តីសម្រេចនានា ដែលធ្វើឡើងតាមរយៈកិច្ចប្រជុំទ្វេភាគី និងកិច្ចប្រជុំតំបន់ត្រីកោណអភិវឌ្ឍន៍ នាពេលកន្លងមកដើម្បីពង្រឹងកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិនិយោគកម្ពុជា-វៀតណាមធ្វើយ៉ាងណាឱ្យសម្រេចបាននូវគោលដៅដែលប្រទេសទាំងពីរបានកំណត់»។

កាសែតបាងកកប៉ុស្តិ៍កាលពីពាក់កណ្តាលឆ្នាំ២០១៨ បានចុះផ្សាយថាក្នុងឆ្នាំ២០១៧ វៀតណាមនាំចូលទំនិញមកកម្ពុជាក្នុងទំហំទឹកប្រាក់ប្រហែលជា២,៧៧ពាន់លានដុល្លារ ខណៈកម្ពុជានាំចេញ ទៅវៀតណាមមានចំនួនប្រហែលជា១ពាន់លានដុល្លារ៕

អត្ថបទ៖ ទូច សុខា