បង្កើតជាង៦០ឆ្នាំហើយ សូមមកដឹងប្រវត្តិត្រួសៗ នៃវិទ្យាស្ថានប៉ាស្ទ័រកម្ពុជា
- 2018-12-07 06:00:00
- ចំនួនមតិ 0 | ចំនួនចែករំលែក 0
បង្កើតជាង៦០ឆ្នាំហើយ សូមមកដឹងប្រវត្តិត្រួសៗ នៃវិទ្យាស្ថានប៉ាស្ទ័រកម្ពុជា
ចន្លោះមិនឃើញ
វិទ្យាស្ថានប៉ាស្ទ័រកម្ពុជា គឺជាគ្រឹះស្ថានស្រាវជ្រាវ និងបម្រើផលប្រយោជន៍សាធារណៈ ស្ថិតនៅក្រោមការគ្រប់គ្រងរបស់ក្រសួងសុខាភិបាលកម្ពុជា។ គិតមកដល់ឆ្នាំ២០១៨ គឺជាខួប៦៥ឆ្នាំ ហើយនៃការបង្កើតវិទ្យាស្ថាននេះ។ នេះបើតាមទំព័រហ្វេសប៊ុក វិទ្យាស្ថានប៉ាស្ទ័រកម្ពុជា។
ចំណែកឯ ប្រភពពីគេហទំព័ររបស់វិទ្យាស្ថានប៉ាស្ទ័រកម្ពុជាវិញ បានបញ្ជាក់ពីប្រវត្តិលម្អិតនានាទាក់ទងនឹងវិទ្យាស្ថាននេះ។ Sabay សូមដកស្រង់តែចំណុច មួយចំនួនមកជម្រាបជូននៅពេលនេះ។ មិនមែនមានតែផ្នែកចាក់វ៉ាក់សាំងទេ វិទ្យាស្ថានប៉ាស្ទ័រកម្ពុជា មានបម្រើសេវាសុខភាពជាច្រើនទៀត ដោយសារតែស្ថិតនៅរួមក្នុងបណ្តាញនៃវិទ្យាស្ថានប៉ាស្ទ័រអន្តរជាតិ ដែលតែងតែមានសហប្រតិបត្តិការជាមួយគ្នា។
**១. ប្រវត្តិវិទ្យាស្ថានប៉ាស្ទ័រប្រចាំប្រទេសកម្ពុជា**
បើតាមប្រភពពីគេហទំព័រដដែលឲ្យដឹងថា វិទ្យាស្ថានប៉ាស្ទ័រ កម្ពុជាបានបង្កើតតាំងពី ខែធ្នូ ឆ្នាំ ១៩៥៣ ដែលមានឈ្មោះថា វិទ្យាស្ថានប៉ាស្ទ័រភ្នំពេញ បន្ទាប់ពីការប្រកាសឯករាជ្យនៃព្រះរាជាណាចក្រខ្មែរ។ កាលពីដំបូង វិទ្យាស្ថានផលិតវ៉ាក់សាំងសម្រាប់សត្វ ហើយមិនយូរប៉ុន្មានវិទ្យាស្ថាននេះក៏បានបង្កើនសមត្ថភាពរបស់ខ្លួនដោយធ្វើការផលិតវ៉ាក់សាំងប្រឆាំងជំងឺឆ្កែឆ្កួត និងវ៉ាក់សាំងប្រឆាំងជំងឺអុតតូចដែលកើតមានលើមនុស្ស។
ថ្ងៃទី១០ ខែកុម្ភៈ ឆ្នាំ១៩៩៥ វិទ្យាស្ថានប៉ាស្ទ័រកម្ពុជាត្រូវបានបើកសម្ភោធជាផ្លូវការដោយនាយករដ្ឋមន្ត្រី នៃរាជរដ្ឋាភិបាលកម្ពុជា កាលនោះ គឺព្រះអង្គម្ចាស់នរោត្តម រណឫទ្ធិ ក្រោមវត្តមាន សាស្ត្រាចារ្យ Bernard DEBRÉ រដ្ឋមន្រ្តីនៃកិច្ចសហប្រតិបត្តិការបារាំង។ វេជ្ជ . François Flye Sainte-Marie បានដឹកនាំវិទ្យាស្ថាននេះជាផ្លូវការហើយ លោកស្រី គ្រុយ ស៊ុនឡាយ ដែលជាអ្នកមានគំនិតផ្ដួចផ្ដើមបង្កើតវិទ្យាស្ថានប៉ាស្ទ័រកម្ពុជា ត្រូវបានតែងតាំងជានាយករង។ យុគសម័យ ថ្មីបានលេចឡើងសម្រាប់វិទ្យាស្ថានប៉ាស្ទ័រប្រចាំនៅកម្ពុជា និងកិច្ចសហប្រតិបត្តិការបារាំង ខ្មែរ។ ជាដំបូងវិទ្យាស្ថាននេះបានបង្កើតផ្នែកជីវសាស្ត្រ។
ចាប់ពីឆ្នាំ១៩៩៥ វិទ្យាស្ថានបានបើក ផ្នែកចាក់ថ្នាំបង្ការប្រឆាំងជំងឺឆ្កែឆ្កួត និងមជ្ឈមណ្ឌលធ្វើតេស្តឈាមអនាមិក និងឥតបង់ថ្លៃ សម្រាប់មេរោគអេដស៍ទីមួយប្រចាំនៅប្រទេសកម្ពុជា។
ផ្នែកមេរោគសាស្ត្រត្រូវបានបើកសម្ពោធនៅខែធ្នូ ឆ្នាំ១៩៩៦ ក្រោមអធិបតីភាពសម្ដេច ហ៊ុន សែន ហើយបន្ទាប់មកផ្នែកសិក្សាពីរោគរាតត្បាតនៃម៉ូលេគុល ដោយធ្វើការលើជំងឺគ្រុនចាញ់នៅខែ មករា ឆ្នាំ២០០១ និងផ្នែកសិក្សាពីប្រព័ន្ធការពាររាងកាយ និងការបង្កើតភាពស៊ាំ នៅឆ្នាំ២០០៥។
បន្ទាប់ពីមានការលេចឡើងដ៏ច្រើននៃមេរោគ ដែលបណ្តាលឲ្យមានជំងឺផ្លូវដង្ហើមដែលមានលក្ខណៈធ្ងន់ធ្ងរ និងជំងឺគ្រុនផ្ដាសាយបក្សី H5N1 បន្ទប់ពិសោធន៍ដែលមានសុវត្ថិភាពជីវសាស្ត្រកម្រិត P3 ប្រចាំតំបន់មួយ ត្រូវបានបើកសម្ពោធ នៅថ្ងៃទី២៥ ខែមេសា ឆ្នាំ២០០៨ ក្រោមវត្តមានរបស់ លោក វេជ្ជ . ម៉ម ប៊ុនហេង រដ្ឋមន្ត្រីក្រសួងសុខាភិបាល និង លោកស្រី Rama YADÉ រដ្ឋលេខាធិការបារាំងទទួលបន្ទុកកិច្ចការបរទេស និងសិទ្ធិមនុស្ស។
២. សកម្មភាពនៃវិទ្យាស្ថាន
វិទ្យាស្ថានប៉ាស្ទ័រផ្ដោតទៅលើការស្រាវជ្រាវជីវវេជ្ជសាស្ត្រ និងការតាមដានជំងឺឆ្លង ដោយធ្វើការជាដៃគូរជាមួយវិទ្យាស្ថានប៉ាស្ទ័រដទៃទៀត និង មជ្ឈមណ្ឌលជាតិប្រយុទ្ធនឹងជំងឺឆ្លង ព្រមទាំងជាមួយមន្ទីរពេទ្យមួយចំនួន។
ការស្រាវជ្រាវដែលធ្វើនៅវិទ្យាស្ថានប៉ាស្ទ័រកម្ពុជាមានទិសដៅក្នុងការធ្វើរោគវិនិច្ឆ័យ កំណត់លក្ខណៈនៃជីវវេជ្ជសាស្ត្រ និងអណូ និងអេពីដេមីសាស្រ្តនៃវីរុស (ផ្ដាសាយ គ្រុនឈាម ហ៊ីវ…) បាក់តេរី (របេង សាលម៉ូណែលឡូស, ឡេហ្សូណែលឡូស, លេបតូស្ព័រ…) និងគ្រុនចាញ់ជាមួយនឹងការសង្កត់ធ្ងន់ ទៅលើការកំណត់អត្តសញ្ញាណ និងការសិក្សាពីយន្តការនៃភាពស៊ាំរបស់អតិសុខុមប្រាណទៅនឹងការព្យាបាល។
វិទ្យាស្ថានប៉ាស្ទ័រក៏បានសហការជាមួយសាកលវិទ្យាល័យ និងសាលាបណ្ដុះបណ្ដាលវិជ្ជាជីវៈនានានៅកម្ពុជា។