Sarri ថាគ្មានក្បួនផ្តួល Man City ទេ ៖ "ខ្ញុំតែងចាញ់ Guardiola រាល់ពេល... សួរអ្នកផ្សេងទៅ!”
- 2018-12-08 07:41:07
- ចំនួនមតិ 0 | ចំនួនចែករំលែក 0
Sarri ថាគ្មានក្បួនផ្តួល Man City ទេ ៖ "ខ្ញុំតែងចាញ់ Guardiola រាល់ពេល... សួរអ្នកផ្សេងទៅ!”
ចន្លោះមិនឃើញ
Pep Guardiola មិនដែលចាញ់លោក Maurizio Sarri ឡើយក្នុងជំនួប៣លើក ហើយគ្រូបង្វឹក Chelsea បានសារភាពថាលោកពិតជាគ្មានក្បួនណាទៅផ្តួល Man City ឡើយ។
តោខៀវ Chelsea នឹងបើកទ្វារកីឡដ្ឋាន Stamford Bridge ស្វាគមន៍ក្រុមកំពូលតារាងមេឃខៀវនៅវេលាម៉ោង ១២:៣០ នាទីរំលងអាធ្រាត្រយប់នេះ។
ចាប់ផ្តើមរដូវកាលដំបូងជាមួយ Chelsea លោក Sarri មិនដែលស្គាល់ពាក្យចាញ់ ១២ប្រកួត ប៉ុន្តែបានបរាជ័យ២លើកក្នុងចំណោម៣ប្រកួតចុងក្រោយនៅ Premier League ដែលធ្វើឲ្យ Chelsea ត្រូវឃ្លាតឆ្ងាយពីក្រុមរំពឹងដណ្ដើមជើងឯក Man City និង Liverpool។
ជ័យជម្នះថ្ងៃសៅរ៍នឹងអាចធ្វើឲ្យ Chelsea ដែលមាន៣១ពិន្ទុអាចបន្តឡើងទៅកៀកកិតនឹងក្រុមកំពូលតារាង Man City ដែលមាន៤១ពិន្ទុ។
ប៉ុន្តែនៅក្នុងសន្និសីទ នៅពេលអ្នកសារព័ត៌មានសួរថាធ្វើម៉េចអាចផ្តួល Man City បាន? គ្រូបង្វឹកសញ្ជាតិអ៊ីតាលីឆ្លើយថា "ខ្ញុំមិនដឹងទេ។ ប្រកួតជាមួយ Guardiola ខ្ញុំតែងចាញ់រាល់លើក ដូច្នេះខ្ញុំមិនដឹងទេ។ លោកអាចសួរអ្នកផ្សេងបាន"។
Sarri បាននិយាយថា ក្រុមរបស់លោក Guardiola ជាក្រុមខ្លាំងមួយក្នុងចំណោមក្រុមបាល់ទាត់ខ្លាំងបំផុតនៅអឺរ៉ុបនាពេលបច្ចុប្បន្ន។ Man City ចាប់ផ្តើមរដូវកាលបានយ៉ាងល្អ។ មិនទាន់ស្គាល់ពាក្យចាញ់នៅឡើយគិតមកទល់ពេលនេះ។
គ្រូបង្វឹកតោខៀវជឿថា ឧបសគ្គរបស់ក្រុមលោកគឺខ្វះទឹកចិត្ត។ ដូច្នេះលោកបានប្រាប់កូនក្រុមលោកថា ពួកគេត្រូវធ្វើការប្ដេជ្ញាចិត្តដើម្បីដាក់គោលដៅរួម គឺធ្វើឲ្យ Chelsea ក្លាយជាក្រុមកំពូលមួយនៅអឺរ៉ុប។
“ខ្ញុំអាចនិយាយបានថា បច្ចុប្បន្នពួកគេ (Man City) ខ្លាំងជាងពួកយើង ប៉ុន្តែគោលដៅចុងក្រោយរបស់ពួកយើងគឺធ្វើជាក្រុមខ្លាំងបំផុតនៅអឺរ៉ុប។ ដូច្នេះយើងត្រូវបង្កើនការខំប្រឹង។ យើងមានសំណាង ៩០នាទី អ្វីៗក៏អាចកើតឡើងដែរ។ យើងដឹងថា វាជាការប្រកួតដ៏លំបាក ប៉ុន្តែយើងត្រូវតែមានជំនឿចិត្ត"។
Sarri ត្រូវបានទទួលស្គាល់ថា បានកែប្រែទម្លាប់ និង វិន័យដ៏តឹងរ៉ឹងបំផុតនៅ Chelsea
Sarri មិនត្រឹមតែបាននាំក្បួនប្រយុទ្ធដែលត្រូវនឹងរបៀបលេងរបស់កីឡាករ Chelsea ប៉ុណ្ណោះទេ ប៉ុន្តែគ្រូបង្វឹកវ័យ ៥៩ ឆ្នាំរូបនេះថែមទាំងជំនាញខាងចិត្តសាស្ត្រកីឡាករទៀតផង។
ជាការពិតណាស់ គ្មាននរណាហ៊ានថាវិន័យដែកថែបរបស់លោក Conte មិនល្អទេ ព្រោះអតីតគ្រូបង្វឹកតោខៀវរូបនោះធ្លាប់ដណ្តើមទាំងពាន Premier League និង ពានរង្វាន់ FA Cup ក្នុងរយៈពេល២រដូវកាលរបស់លោកនៅ Stamford Bridge។
ប៉ុន្តែ លោក Sarri គឺជារឿងដោយឡែកមួយទៀត។ លោក Sarri បានកែប្រែទម្លាប់ និង វិន័យដ៏តឹងរ៉ឹងទាំងនោះ។
បន្ថែមពីលើអាហារពេលយប់ដែលភាគច្រើនជាអាហារសម្រន់ដូចជា ទឹកប៉េងប៉ោះ អំបិល ប៊័រ លោក Sarri បានឲ្យមេចុងភៅបន្ថែមនំឲ្យកីឡាករលោក ហើយនៅពេលពួកគេត្រូវធ្វើដំណើរទៅលេងក្រៅទឹកដី លោកបានបន្ថែមការ៉េមដល់កីឡាករទៀតផង។
ប៉ុន្មានឆ្នាំចុងក្រោយនេះ មិនត្រឹមតែលោក Conte ទេដែលដាក់វិន័យតឹងរ៉ឹងបំផុតដោយតម្រូវឲ្យកីឡាករ ត្រូវប្រមូលផ្តុំនៅសណ្ឋាគារ១យប់មុនពេលដែលការប្រកួតក្នុងទឹកដី។ ព្រឹកឡើង ត្រូវប្រមូលផ្តុំហ្វឹកហាត់លើទីលាន។
ប៉ុន្តែ Sarri បានផ្លាស់ប្តូរទម្លាប់នេះ លោកអនុញ្ញាតឲ្យកីឡាករលោកអាចគេងនៅផ្ទះជុំគ្រួសារនៅយប់មុនការប្រកួតក្នុងដី។ លោកនិយាយថា លោកជឿជាក់លើកីឡាកររបស់លោកថាពួកគេនឹងមិនធ្វើឲ្យប៉ះពាល់ដល់ការហ្វឹកហាត់ឡើយ៕