Galaxy S10 នឹងក្លាយជាស្មាតហ្វូនដំបូង អាចថតវីដេអូបែប Portrait កម្រិត 4K HDR

2018-12-11 04:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

Qualcomm ជាក្រុមហ៊ុនផ្គត់ផ្គង់ Chip បំពាក់ក្នុងទូរសព្ទធំជាងគេលើពិភពលោក ហើយឈីបជំនាន់ថ្មីនឹងដើរតួនាទីសំខាន់ជំរុញសមត្ថភាពទូរសព្ទឆ្នាំ ២០១៩ ខ្លាំងមិនធម្មតា។ តួយ៉ាងដូច Galaxy S10 នឹងក្លាយជាស្មាតហ្វូនដំបូង អាចថតវីដេអូបែប Portrait កម្រិត 4K HDR

ទាំងនេះជាចំណុចខ្លឹមៗ ៥ ដែលបន្ទះឈីប Snapdragon 855 ជួយឲ្យ Galaxy S10 ខ្លាំង៖

១) Sensor ស្កេនម្រាមដៃ Ultrasonic បង្កប់ក្នុងអេក្រង់

Snapdragon 855 ជា Chip ដំបូងដំណើរការជាមួយ Sonic Sensor 3D របស់ Qualcomm ដែលជាបច្ចេកវិទ្យាស្កេនម្រាមដៃមានបង្កប់ក្នុងអេក្រង់តែម្តង។ អេក្រង់ទូរសព្ទលាតពេញ ហើយអាចស្កេនម្រាមដៃនៅផ្ទៃខាងមុខឧបករណ៍។ Samsung មានការរំពឹងថា នឹងប្រើមុខងារស្កេនម្រាមដៃក្នុងអេក្រង់លើ Galaxy S10 ឆ្នាំក្រោយ។

២) ថតវីដេអូបែប Portrait

រូបភាពលក្ខណៈ Portrait មានផ្ទៃខាងក្រោយព្រាល និងរក្សា Subject ច្បាស់ល្អ។ Portrait mode សម្រាប់វីដេអូ គឺមានលក្ខណៈដូចគ្នា។ Chip Snapdragon 855 នឹងអាចផ្តល់មុខងារ Portrait mode នេះចូលទៅកាន់វីដេអូ HDR កម្រិត 4K។ មុខងារនឹងធ្វើការតាមចាប់ Subject ខណៈរក្សាការបែងចែកផ្ទៃខាងក្រោយបានល្អ។

ទូរសព្ទប្រើ Snapdragon 855 អាចថតវីដេអូកម្រិត 4K នៅល្បឿន 60 Frames ក្នុងមួយវិនាទី ហើយអាចសន្សំថាមពលថ្មបានដល់ទៅ ៣០%។

៣) រក្សាទុករូបភាព និងវីដេអូបានច្រើនជាងមុន

ទូរសព្ទប្រើ Snapdragon 855 អាចទាញយកអត្ថប្រយោជន៍ពីបច្ចេកវិទ្យាក្នុង iPhone ម៉ូដែលចុងក្រោយបាន។ HEIF (High Efficiency Image Format) អាចបន្ថយទំហំរូបភាព JPEG បានពាក់កណ្តាល ដោយមិនបាត់បង់គុណភាព។

បច្ចេកវិទ្យា HEIF អាចដើរតួជាស្តុកសម្រាប់ប្រភេទរូបភាពផ្សេងៗបាន។ឧទាហរណ៍ លើទូរសព្ទកាមេរ៉ា បី អាចចាប់យករូបភាព និងរក្សាទុកទិដ្ឋភាពពី Telephoto, Wide-angle និង Super-wide-angle បាន ដែលអាចយកទៅប្រើការតាមតម្រូវការផ្សេងពេលណាក៏បាន។ ក្រៅពីសន្សំសំចៃទំហំរក្សាទុក Chip Snapdragon 855 អាចដំណើរការ File HEIF បានលឿន ប្រើថាមពលទាប។

៤) ប្រើ AI Assistant ច្រើនក្នុងពេលតែមួយបាន

Chip 855 អាចឲ្យក្រុមហ៊ុនផលិតទូរសព្ទប្រើមុខងារជំនួយការជាសំឡេងបានច្រើនក្នុងពេលតែមួយ។ ទូរសព្ទខ្លះបានផ្តល់មុខងារនេះ ប៉ុន្តែត្រូវការទាញយកកម្មវិធីបន្ថែម និងប្រើបានតែមួយប៉ុណ្ណោះក្នុងពេលតែមួយ។

Qualcomm ក៏ប្រើ AI កាត់បន្ថយសំឡេងរំខានពីក្រៅពេលប្រើជំនួយការជាសំឡេង ព្រមទាំងសម្គាល់សំឡេង ដោយបើសំឡេងនោះជាអ្នកផ្សេង មិនអាចដាស់បើកចូលឧបករណ៍បានឡើយ។

៥) ប្រើថាមពលតិច ពេលមើលវីដេអូ

មុខងារថ្មីមួយក្នុង Snapdragon 855 ហៅថា Cinema Core អាចជួយសន្សំសំចៃថ្ម ពេលមើលវីដេអូពីសេវាកម្មនានា ដូចជា Amazon Video។ Cinema Core ក៏អាចផ្តល់ការចាក់វីដេអូកម្រិត HDR10+ បានដែរលើទូរសព្ទ។ HDR ផ្តល់ពន្លឺ និងពណ៌បានច្បាស់ល្អត្រជាក់ភ្នែក។

GPU Adreno 640 របស់ Snapdragon 855 ផ្តល់ល្បឿនដំណើរការកើនឡើង ៣០% អាចលេងហ្គេមផ្តល់រូបភាពកម្រិត HDR បាន។ សម្រាប់បច្ចេកវិទ្យា VR Chip Snapdragon 855 អាចផ្តល់លទ្ធភាពបានដល់ទៅ Resolution កម្រិត 8K នៅល្បឿន 120 Frame ក្នុងមួយវិនាទី៕