តាមរយៈកាយវិការ Wu Chun ធ្វើដាក់ឪពុក អ្នកមើលអាចហូរទឹកភ្នែកមិនដឹងខ្លួន

2018-12-10 04:54:13
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែងជនជាតិព្រុយណេ Wu Chun និងឪពុកវ័យ ៧២ឆ្នាំ Goh Kim Tian បានបង្ហាញខ្លួនជាមួយគ្នាក្នុងកម្មវិធីទួរទស្សន៍ចិន The Most Beautiful Time កាលពីពេលថ្មីៗនេះ។ កាយវិការបញ្ជាក់ពីក្ដីស្រឡាញ់រវាងឪពុកកូនពួកគេទាំង ២ពិតជាធ្វើឲ្យអ្នកទស្សនាទប់ចិត្តមិនរំភើបមិនបាន។

Wu Chun និងឪពុក

ក្នុងកម្មវិធីពេលនោះ Wu Chun ជាកូនបានសម្រេចជួយលាងជើងឲ្យឪពុកដែលមានជំងឺរ៉ាំរ៉ៃ ដោយសារជើងហើម។

ពេលកំពុងលាងជើងឲ្យ Wu Chun បានសួរទៅកាន់ឪពុកថា មានត្រង់ណារមាស់ទេ? ហើយឪពុកក៏ឆ្លើយតបកូនវិញថា៖ "ប៉ាដឹង កូនខំប្រឹងណាស់” ឯ Wu Chun ក៏តបដោយរីករាយថា៖ "តែកូនសប្បាយចិត្តបំផុត”។

ទិដ្ឋភាពនេះ ស្រាប់តែធ្វើឲ្យទស្សនិកជនមួយចំនួននឹកឃើញ កម្មវិធី "Where Are We Going, Dad? 5” នៅពេល Wu Chun នាំកូនប្រុសស្រីទាំង ២ចូលក្នុងកម្មវិធី។ ពេលនោះលោកក៏បានលាងជើងឲ្យកូនៗ មុនឲ្យគេង។

ដោយឡែកសម្រាប់កម្មវិធីថ្មីនេះវិញ ទស្សនិកជនមិនតិចទេ បានបញ្ចេញមតិដូចៗគ្នាថា ក្រោយមើលហើយ ពួកគេពិតជារំជួលចិត្តណាស់ ពេលឃើញកាយវិការបញ្ជាក់ពីក្ដីស្រឡាញ់ ក្នុងនាមជាកូនកតញ្ញូរបស់ Wu Chun ដែលមានចំពោះឪពុកចំណាស់។

អតីតសមាជិកក្រុម Fahrenheit ធ្លាប់បាននិយាយក្នុងបទសម្ភាសមួយ ក្រោយកម្មវិធីនោះថា៖ "ឪពុករបស់ខ្ញុំ មើលថែកូនៗដល់ទៅ ៣នាក់ ហើយខ្ញុំចង់ ប្រាប់ប៉ារបស់ខ្ញុំថា គាត់ក៏ខំប្រឹងខ្លាំងណាស់ដែរកន្លងមកនេះ។ ខ្ញុំចាំបាន នៅពេលខ្ញុំជួយកូនៗខ្ញុំលាងជើងពួកគេ កូនស្រីប្រាប់ខ្ញុំថា នាងនឹងជួយលាងជើងឲ្យខ្ញុំ ពេលខ្ញុំចាស់ទៅ ហើយពេលនោះខ្ញុំស្រាប់តែរលីងរលោងទឹកភ្នែកភ្លាម។ ឥឡូវខ្ញុំលាងជើងឲ្យប៉ា ហើយវាជាការចងចាំគ្មានថ្ងៃភ្លេច ព្រោះខ្ញុំមិនដឹងថា ពេលណាខ្ញុំមានឱកាសធ្វើបែបហ្នឹងទៀតទេ”៕

ប្រភព៖ jaynestars ប្រែសម្រួល៖ យី សុធារី