គ្រួសារស្ដុកស្ដម្ភមួយកំពុងរើសជាងថតរូបធ្វើដំណើរ ឲ្យចំណូលសែនដុល្លារ

2018-12-10 06:45:56
ចំនួនមតិ 0 | ចំនួនចែករំលែក 0

ចន្លោះមិនឃើញ

គ្រួសារដ៏ស្ដុកស្ដម្ភមួយក្នុងចក្រភពអង់គ្លេសកំពុងស្វែងរកជាងថតមួយរូប ដើម្បីថតរូបធ្វើដំណើរនៅលើពិភពលោក ដោយហ៊ានឲ្យប្រាក់ចំណូលប្រចាំឆ្នាំខ្ទង់ ១ សែនដុល្លារឯណោះ។

ផ្អែកតាមអត្ថន័យក្នុងអ៊ីមែលដែលហាងថតរូប Perfocal ទទួលបានឲ្យដឹងថា ក្រុមគ្រួសារដែលមិនត្រូវបានបង្ហាញអត្តសញ្ញាណនេះ បានបាត់បង់អ្នកថតរូបដែលធ្លាប់បានថតឲ្យពួកគេ។ ហេតុនេះទើបចង់ស្វែងរកអ្នកថតរូបថ្មី ដើម្បីផ្ដិតយកទិដ្ឋភាពធ្វើដំណើរជាបន្តទៀត។

បេក្ខភាពដែលចង់ទទួលបានការងារនេះត្រូវតែមានបទពិសោធន៍ ៥ ឆ្នាំក្នុងការថតពីការរស់នៅរបស់អ្នកមាន, បុគ្គលល្បី ហើយត្រូវឆ្លងកាត់ការសម្ភាសន៍ជាច្រើនដំណាក់កាលផងដែរ។

គ្រួសារខាងលើបានបញ្ជាក់ដែរថា អ្នកថតរូបដែលចង់ដាក់ពាក្យគួរតែអាចធ្វើការបានដល់ ១០ ម៉ោងក្នុងមួយថ្ងៃ, ពេលចេញដំណើរម្ដងៗត្រូវទៅរហូតដល់ ៣ ខែ ហើយនឹងបានឈប់សម្រាក ៣០ ថ្ងៃក្នុងមួយថ្ងៃផងដែរ។

អ្នកថតរូបដែលត្រូវបានជ្រើសរើសនឹងទទួលបានប្រាក់ចំណូលគោល ៨០ ០០០ ផោន (ស្មើប្រមាណ ១០២ ០០០ ដុល្លារ ក្នុងមួយឆ្នាំ។ បន្ថែមពីនេះគ្រួសារខាងលើនឹងរ៉ាប់រងលើការធ្វើដំណើរ, ការស្នាក់នៅ និងការហូបចុកថែមទៀតផង។