ប្រុសៗសម័យឥឡូវធ្វើបាន ៦ចំណុចនេះ វ័យ៣០មិនទាន់ សល់លុយដណ្ដឹងប្រពន្ធខ្លួនឯង
- 2018-12-10 07:29:23
- ចំនួនមតិ 0 | ចំនួនចែករំលែក 0
ប្រុសៗសម័យឥឡូវធ្វើបាន ៦ចំណុចនេះ វ័យ៣០មិនទាន់ សល់លុយដណ្ដឹងប្រពន្ធខ្លួនឯង
ចន្លោះមិនឃើញ
ចាប់ពីវ័យ ១៨ឆ្នាំឡើង ជាវ័យដែលមនុស្សកំពុងពេញកម្លាំងអាចរកប្រាក់ដោយខ្លួនឯង ស្របនឹងច្បាប់ការងារនៅកម្ពុជាផងដែរ។ ជាមួយគ្នានេះ យុវជន សូ វណ្ណា និស្សិតឆ្នាំទី២ នៃវិទ្យាស្ថានភាសាបរទេស បានរៀបរាប់ប្រាប់ Sabay ពីបទពិសោធន៍សន្សំលុយទាំងវ័យក្មេង និងមិនធ្លាប់ដាច់លុយចាយនោះឡើយ។ តទៅនេះ គឺជាគន្លឹះសន្សំលុយ ៦ចំណុច ដែលជួយឲ្យយុវជនរូបនេះ មិនខ្ចីលាតដៃសុំលុយម៉ាក់ប៉ា ក្រោយរៀនចប់វិទ្យាល័យ។
**១. រកការងារក្រៅម៉ោង**
ក្រោយទំនេរពីការសិក្សា ពេលល្ងាច វណ្ណា ឆ្លៀតធ្វើជាគ្រូបង្រៀនក្រៅម៉ោងរបស់សាលាឯកជនមួយ ទទួលបានចំណូល ១៥០ដុល្លារ /ខែ។ ចំណូលនេះ អាចជួយឲ្យវណ្ណាដោះស្រាយការចំណាយលើសម្ភារៈសិក្សា និងថ្លៃសាលាមួយចំណែក។ ធ្វើការផង រៀនផង វណ្ណាបានប្ដេជ្ញាមិនយកស្នេហាមកលូកឡំឡើយ ព្រោះចង់ផ្ដោតតែលើកគោលដៅសមត្ថភាពឲ្យបានពេញលេញ។
២. សន្សំ ទើបចំណាយក្រោយ
ជារៀងរាល់ខែ ចំណូលដែលបានពីធ្វើការ វណ្ណា ដកសន្សំតិចបំផុត ៣០ភាគរយ ហើយសល់ប៉ុន្មានសម្រាប់ចាយវាយលើតម្រូវការ។ នៅពេលទៅណាម្ដងម្កាលជាមួយមិត្តភក្តិ វណ្ណាមិនដាក់លុយច្រើនតាមខ្លួននោះដែរ ដោយគិតថាអាចនឹងត្រូវចាយអស់។ ម្យ៉ាងគេ ក៏មិនចូលចិត្តបង្កើតទម្លាប់ខ្ចីលុយមិត្តភក្ដិចាយនោះដែរ។
៣. ធ្វើតារាងទំនិញចាំបាច់
យុវវ័យមិនថា ស្រី ឬប្រុសជៀសមិនផុតឡើយលើការចំណាយសម្ភារៈប្រើប្រាស់។ ប៉ុន្តែយុវជននេះ ចេះបង្កើតតារាងទំនិញចាំបាច់ផ្ទាល់ខ្លួន សម្រាប់ចំណាយ ដោយកត់ត្រាទុកនូវវត្ថុទាំងនោះឲ្យបានច្បាស់លាស់ ហើយត្រូវកំណត់អោយដាច់ខាតថានឹងទិញតែអ្វីដែលមានក្នុងតារាងជៀសវាងការទិញរបស់តាមនឹកឃើញដែលមិនសូវសំខាន់។ ជាងនេះសំណួរ ដែលត្រូវសួរខ្លួនឯងមុនទិញនោះគឺ របស់សម្ភារៈថ្មី ថាតើទិញមកអាចផ្តល់ប្រយោជន៍អីខ្លះ? ហេតុអីត្រូវទិញ?
៤. លក់របស់របរលែងប្រើចេញ
ចំណុចនេះ វណ្ណាប្រាប់ថា រៀនតាមគេដែរ ព្រោះធ្លាប់ឃើញមិត្តមួយចំនួនលក់ខោអាវខ្លួនស្លៀករួច ក្នុងតម្លៃថោកៗ។ ដោយឡែកយុវជននេះ ជាមនុស្សចូលចិត្តរក្សាទុករបស់របរឲ្យស្អាត និងនៅថ្មី អ៊ីចឹងរបស់ប្រើមួយចំនួន មិនទាន់ហួសសម័យ លែងត្រូវប្រើប្រាស់ទៀត ដូចជាកាបូប នាឡិកា និងសម្លៀកបំពាក់ គ្រឿងអេឡិចត្រូនិច... ហើយយកវាទៅដាក់លក់តាមonline ដែលអាចចំណេញបានទាំងលុយ ហើយបានទូលាយផ្ទះទៀតផង។
៥. បាយផ្ទះរាល់ថ្ងៃ
មួយខែ សឹងតែ៣០ថ្ងៃ ហើយ ដែលយុវជនកំពូលអ្នកសន្សំនេះ ញ៉ាំបាយជុំគ្នាជាមួយគ្រួសារ។ ខ្លះណាបើមិត្តភក្ដិបបួលញាំអី នាងតែងហៅមកជួបជុំធ្វើផ្ទះ វាក៏បង្កបរិយាយកាសសប្បាយម្យ៉ាង និងចំណាយអស់តិចផងដែរ។
៦. រៀនធ្វើរបស់ដោយខ្លួនឯង (DIY)
វណ្ណា លើកឡើងថា របស់របរប្រើប្រាស់មួយចំនួន យើងអាចរៀនធ្វើរបស់ដោយខ្លួនឯងបាន មិនចាំបាច់ទិញទេ។ ឧទាហរណ៍ របរប្រើមួយចំនួន យើងអាចរៀនធ្វើ DIY (មានន័យថា Do it yourself) ងាយៗ មើលតាមYoutube ក្នុងនោះមានវត្ថុជាច្រើន យើងអាចកែច្នៃធ្វើបានដោយខ្លួនឯងពីអ្វីដែលមានស្រាប់ ដោយមិនចាំបាច់ចំណាយលុយទៅទិញនោះទេ។