គ្រូបង្វឹកមកពី Spurs ២រូប មកចូលរួមកម្មវិធីអង្គការផ្កាយសមុទ្រជាលើកទី២

2018-12-11 03:17:38
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុនធានារ៉ាប់រងអាយុជីវិត AIA បានហៅគ្រូបង្វឹកក្រុម Spurs នៅតំបន់អាស៊ី២រូប មកចូលរួមបើកកម្មវិធីប្រកួត AIA-ISF Youth League ជាលើកទី២។

ការប្រកួតពានរង្វាន់នេះដែរ គឺមានក្រុមចូលរួមដល់ទៅ១០០ក្រុមឯណោះ ដោយមានកុមារចំនួន ១ ៤៥៥នាក់ មកពីបណ្ដាអង្គការទាំងអស់ទូទាំងរាជាធានីភ្នំពេញ។ ការប្រកួតបានបែងចែកជាច្រើនកម្រិតដូចជា កុមារក្រោមអាយុ១០ឆ្នាំ ១៤ឆ្នាំ និង១៨ឆ្នាំជាដើម។ ក្នុងឱកាសនោះ ខាង AIA ជាដែលជាដៃគូសហការរៀបចំការប្រកួតនេះជាមួយ អង្គការផ្កាយសមុទ្រ បានអញ្ជើញគ្រូបង្វឹក Spurs ២នាក់មកបង្ហាត់បង្ហាញពីបច្ចេកទេសខ្លះៗផងដែរ។

លោក Anton Blackwood គ្រូបង្វឹកម្នាក់ក្នុងចំណោមគ្រូបង្វឹក Spurs ទាំងពីរនាក់និងធ្លាប់មកកម្ពុជាកាលពីឆ្នាំមុននោះ បាននិយាយដែរថា៖ “យើងបានផ្ដល់ការហ្វឹកហាត់ខ្លីៗ ដើម្បីជាគន្លឹះសម្រាប់កុមារលេងបាល់ទាត់ឱ្យបានត្រឹមត្រូវ។ យើងរំពឹងថាពួកគេនឹងខិតខំប្រឹងប្រែង ហើយយើងសប្បាយចិត្តដែលបានចូលរួមកម្មវិធីនេះ។ បាល់ទាត់រីកចម្រើនទៅបាន គឺត្រូវកើតចេញពីក្មេងៗទាំងនេះ”។

ចំណែកឯលោក Richard Bates អគ្គនាយកក្រុមហ៊ុន AIA បាននិយាយដែរថានេះជាការងារមួយដែលអាចជួយដល់សង្គមបាន ហើយការលេងបាល់ទាត់គឺសំខាន់សម្រាប់ក្មេងៗ។ លោករំពឹងថាការប្រកួតនេះ នឹងនាំផលវិជ្ជមានច្រើនដល់ក្មេងៗ ទៅថ្ងៃមុខ។

ជាមួយគ្នានោះដែរ Leo Brogan សមាជិកក្រុមប្រឹក្សាភិបាលនៃអង្គការផ្កាយសមុទ្របាននិយាយថា៖ “យើងពិតជារីករាយដែលបានធ្វើការជាមួយខាង AIA ដែលមានឆន្ទៈក្នុងការគាំទ្រ និងជំរុញឱ្យមានការរស់នៅប្រកបដោយសុខភាពល្អ សម្រាប់មនុស្សគ្រប់រូប និងសហគមន៍ក្រីក្រ។ ការសហការគ្នានេះ នឹងធ្វើឱ្យកុមារនៅកម្ពុជាមានឱកាសកាន់តែច្រើនក្នុងការទទួលបានបច្ចេកទេសលេងបាល់ទាត់ ព្រោះក្រុមហ៊ុននេះ មានទំនាក់ទំនងល្អជាមួយក្រុម Spurs ។ ពួកគេនឹងជួយយើងកាន់តែច្រើន ចំពោះបច្ចេកទេសក្នុងការលេងបាល់ទាត់”៕

អត្ថបទ៖ មុន្នីរម្យ