រកស៊ីត្រូវចេះចាប់ឱកាស ស៊ិន ឧត្ដមផល្លា ថា ពីពេលនេះទៅតារាចម្រៀងភាសាចិន កើបលុយហើយ!
- 2018-12-11 03:19:22
- ចំនួនមតិ 0 | ចំនួនចែករំលែក 0
រកស៊ីត្រូវចេះចាប់ឱកាស ស៊ិន ឧត្ដមផល្លា ថា ពីពេលនេះទៅតារាចម្រៀងភាសាចិន កើបលុយហើយ!
ចន្លោះមិនឃើញ
ឆ្លងកាត់បទពិសោធន៍ខ្លួនឯង ដែលអាចច្រៀងបានច្រើនភាសា ក្នុងនោះមានភាសាចិនផង ស៊ិន ឧត្ដមផល្លា លើកឡើងថា អ្នកចម្រៀងភាសាចិន នឹងមានទីផ្សារកាន់តែល្អរាប់ចាប់ពីពេលនេះតទៅ។
ការព្យាករណ៍នេះ ដោយផ្អែកទៅលើស្ថានភាពបច្ចុប្បន្ន ដែលប្រជាជនចិន និងការវិនិយោគរបស់ចិនបាន និងកំពុងហូរចូលមកកម្ពុជាច្រើនឡើង តាមនយោបាយភ្ជាប់ទំនាក់ទំនងល្អជាមួយរដ្ឋាភិបាលចិន របស់រាជរដ្ឋាភិបាលប្រទេសកម្ពុជា។ ដូច្នេះហើយ តាមការកត់សម្គាល់ផ្ទាល់ខ្លួន ផល្លា អះអាងថា នាងបានឃើញវត្តមានរបស់ជនជាតិ ឬភ្ញៀវចិននៅក្នុងកម្មវិធីនានា ច្រើនឡើងៗ។ ប្រការនេះច្បាស់ណាស់ថា ពួកគេ(ចិន) ចង់ស្ដាប់បទចម្រៀងជាភាសាខ្លួនឯង។
ផល្លា ថ្លែង៖ “អ្នកចម្រៀងភាសាចិន ចាប់ពីពេលនេះទៅត្រៀមកើបលុយ ព្រោះកម្មវិធីអីក៏ដោយ តែងតែមានភ្ញៀវចិនស្ទើរតែ៩៩ភាគរយទៅហើយ។" យ៉ាងនេះក្ដី បើមើលពីទិដ្ឋភាពជាក់ស្ដែង តារាចម្រៀងខ្មែរដែលអាចច្រៀងជាភាសាចិនមានតិចតួចបំផុត។ ដូច្នេះហើយ ពិតជាល្អដែលតារាចម្រៀងខ្មែរនានា អាចវិវត្តខ្លួនបន្ថែមមកជាតារាចម្រៀងជាភាសាចិន ដូចដែលក្រុមអ្នករកស៊ីមានពាក្យមួយឃ្លាថា "ចង់រកស៊ី ត្រូវចេះចាប់ឱកាស" នោះឯង។
"តារាចម្រៀងខ្មែរយើងទាំងអស់ គួរហាត់រៀនច្រៀងបទចិនអោយបានច្រើននាក់ ព្រោះអ្នកចម្រៀងភាសាចិននៅមានកម្រិតនៅឡើយ។ អភិវឌ្ឍសមត្ថភាពទៅ ខ្ញុំមិនចង់មាន មិនចង់បានតែម្នាក់ឯងទេ(សើច)”។ ស៊ិន ឧត្ដមផល្លា បន្ថែម។
អ្នកមេម៉ាយចាយរាង ស៊ិន ឧត្ដមផល្លា ត្រូវបានគេស្គាល់ថាជា តារាចម្រៀងយ៉េយ៉េ ដែលអាចច្រៀងបានជាច្រើនភាសាមានទាំងខ្មែរ អង់គ្លេស ឥណ្ឌា និងចិនជាដើម។ សមត្ថភាពដ៏កម្រនេះ នាំអ្នកមេម៉ាយដែលមានវ័យលើ ៤០ឆ្នាំទៅហើយ នៅតែមានទីផ្សារការងារល្អនៅឡើយ។ ជាក់ស្ដែង ក្រោយពីថៅកែហាងមួយហៅនាងទៅច្រៀងប្រចាំហាងរបស់គេ ផល្លា ក៏ទើបត្រូវលោក យ៉ែម សំអូន ប្រធានក្រុមពិធីការ Dara Entertainment កោះហៅចូលក្រុមដែរ ដែលធ្វើឲ្យនាងរវល់កាន់តែខ្លាំងពីមួយថ្ងៃទៅមួយថ្ងៃ។
ជាមួយគ្នានេះ ក្នុងចំណោមភាសាដែលនាងអាចច្រៀងបាន ម្ចាស់ហាងលក់សម្ភារៈសម្រាប់ពិធីបុណ្យផ្សេងៗ "ឧត្ដមឧត្ដម" បានអះអាងទៀតថា ច្រៀងជាភាសាចិន ក៏បានធ្វើឲ្យនាងមានទីផ្សារការងារសិល្បៈកាន់តែខ្ពស់នៅក្នុងដំណាក់កាលនេះដែរ ដែលពេលខ្លះ ក៏ការងារជាក្រុម ពេលខ្លះទៀត ជាការងារឯកជនរបស់នាងដែរ។ កម្មវិធីនីមួយ ផល្លា ប្រាប់ថា នាងតែងច្រៀងភាសាចិនច្រើនជាងភាសាដទៃទៀត ដូច្នេះហើយ រាល់កម្មវិធីដែលមានភ្ញៀវចិនចូលរួមច្រើន ម្ចាស់កម្មវិធី កម្រមើលរំលងនាងណាស់។
គិតត្រឹមថ្ងៃនេះ ស៊ិន ឧត្ដមផល្លា ត្រូវបានម្ចាស់កម្មវិធីនានាកក់រួចហើយ រាប់ចាប់ពីថ្ងៃ 11, 13, 14, 15, 21, 22, 27, 30, 31/12/2018៕