ក្រុមតេក្វាន់ដូ ITF បង្ហាញសក្ដានុពល និងភាពអស្ចារ្យរបស់ខ្លួនម្សិលមិញនៅកោះពេជ្រ

2018-12-11 06:53:47
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមកីឡាករ កីឡាការិនីឆ្នើមរបស់តេក្វាន់ដូ ITF បានឱកាសល្អសម្ដែងក្បាច់គុន និងស្នៀតពិសេសៗរបស់ខ្លួន ក្នុងទិវាសិទ្ធិមនុស្សខួបលើកទី៧០ នៅសាលមហោស្រពកោះពេជ្រ នាព្រឹកម្សិលមិញនេះ។ ក្រោមក្រសែភ្នែកសម្ដេច សាយ ឈុំ និងភ្ញៀវកិត្តិយសរាប់រយនាក់។

ទិដ្ឋភាពពេលសម្ដែង

លោក ប៉ាល់ ជីវ័ន គ្រូបង្វឹក និងជាអ្នកដឹកនាំការសម្ដែងនោះ បានឲ្យដឹងថា កម្មវិធីខាងលើនេះជាកិត្តិយសខ្លាំងណាស់សម្រាប់ក្រុមកីឡាតេក្វាន់ដូ ITF កម្ពុជា ដែលបានអញ្ជើញឲ្យបង្ហាញនៅសមត្ថភាពរបស់កីឡាករឆ្នើមៗរបស់ខ្លួនទៅដល់ថ្នាក់ដឹកនាំ និងចូលរួមផង។

ទិដ្ឋភាពពេលសម្ដែង

ម្ចាស់មេដាយលំដាប់អន្តរជាតិខាងលើនេះបន្ថែមថា នេះជាសកម្មភាពសំខាន់ៗរបស់សហព័ន្ធតេក្វាន់ ITF នាបំណាច់ឆ្នាំ២០១៨ ហើយក៏ជាការបង្ហាញពីភាពរីកចម្រើន និងការលូតលាស់របស់កីឡាករ កីឡាការិនីរបស់ខ្លួន ដែលបានហ្វឹកហាត់នាពេលកន្លងមក។ ការសម្ដែងនេះគឺមានការបង្ហាញស្នៀតមេគុន ស្នៀតលោតទាត់ក្ដារ ស្នៀតវ៉ៃជាគូ និងក្បាច់វ៉ៃការពារមនុស្សនៅជិតខ្លួនផងដែរ។ ការសម្ដែងនេះទទួលបានជោគជ័យ បន្ទាប់ពីការខំប្រឹងប្រែង និងយកចិត្តទុកដាក់របស់កីឡាករ កីឡាការិនីជិត៤០នាក់នេះ។

ទិដ្ឋភាពថតរូបជុំគ្នា

បញ្ជាក់ដែរថា នេះជាលើកទី២ ហើយសម្រាប់សហព័ន្ធតេក្វាន់ដូ ITF កម្ពុជា ដែលបានចូលរួមសម្ដែងបង្ហាញជូនថ្នាក់ដឹកនាំក្នុងពិធីខួបលើកទី៧០ នៃទិវាសិទ្ធិមនុស្សកម្ពុជាធ្វើឡើងកាលពីថ្ងៃទី១០ ខែធ្នូ ២០១៨ នៅសាលមហោស្រពកោះពេជ្រ៕

អត្ថបទ៖ នួន ស៊ីណា