មកដឹង របស់ទាំង ៧ គួរដាក់តាំងលើតុការិយាល័យ ដើម្បីបង្កើនផលិតភាពការងារ
- 2018-12-11 07:06:45
- ចំនួនមតិ 0 | ចំនួនចែករំលែក 0
មកដឹង របស់ទាំង ៧ គួរដាក់តាំងលើតុការិយាល័យ ដើម្បីបង្កើនផលិតភាពការងារ
ចន្លោះមិនឃើញ
នៅតាមការិយាល័យភាគច្រើន អ្នកធ្វើការតែងទទួលបានអ៊ីម៉ែល និងសារជូនដំណឹងយ៉ាងច្រើនសន្ធឹកសន្ធាប់ជារៀងរាល់ថ្ងៃដែលធ្វើឲ្យពួកគេពិបាកក្នុងការផ្ដោតអារម្មណ៍លើកិច្ចការងាររបស់ខ្លួន។ ប៉ុន្តែមានរឿងមួយចំនួនដែលអ្នកអាចសាកល្បងធ្វើ ដើម្បីកាត់បន្ថយអារម្មណ៍តានតឹង និងស្ដ្រេសពេលកំពុងធ្វើការ។
ខាងក្រោមនេះ គឺជារបស់ទាំង ៧ គួរដាក់តាំងលើតុការិយាល័យ ដើម្បីបង្កើនផលិតភាពការងារ ៖
១. ដបទឹក
ការរក្សាជាតិទឹកក្នុងខ្លួនពេញមួយថ្ងៃ គឺជាកត្ដាសំខាន់ដើម្បីរក្សាផលិតភាព និងការផ្ដោតទៅលើការងារ។ ៨០% នៃខួរក្បាលរបស់មនុស្សយើងគឺជាទឹក ខណៈពេលដែលរាងកាយរបស់យើង ៦៥% គឺទឹក ដូច្នេះហើយយើងត្រូវការរក្សាជាតិទឹកក្នុងខ្លួនជាចាប់បាច់។
២. ប្រតិទិន
ការព្យួរប្រតិទិនលើជញ្ជាំង ឬដាក់តាំងលើតុការិយាល័យ អាចជួយឲ្យអ្នកធ្វើការបង្កើនផលិតភាពក្នុងការងារ។ ប្រតិទិននឹងជួយរំលឹកអ្នកពីការងារដែលត្រូវធ្វើឲ្យរួចរាល់មុនថ្ងៃកំណត់ ដូច្នេះវាត្រូវតែនៅជិតភ្នែកដែលអ្នកអាចនឹងងាយស្រួលមើល។ លើសពីនេះ វាក៏ជួយកាត់បន្ថយស្ត្រេសពីការរកនឹកថ្ងៃខែដែលត្រូវសម្រេចកិច្ចការផងដែរ។
៣. រុក្ខជាតិលើតុ
រុក្ខជាតិអាចមានឥទ្ធិពលគួរឱ្យភ្ញាក់ផ្អើលទៅលើអ្នកធ្វើការនៅក្នុងការិយាល័យ។ តាមការសិក្សាជាច្រើនបង្ហាញថា ដំណើរការចងចាំរបស់បុគ្គលិកអាចកើនឡើងរហូតដល់ ១៥%ដែលជាជំនួយខ្លាំងដល់ផលិតភាពការងារ។ បុគ្គលិកអាចដាក់តាំងរុក្ខជាតិផ្សេងៗលើតុរបស់ខ្លួន ឬខាងក្រុមហ៊ុនជាអ្នកជួយដាក់តាំងរុក្ខជាតិទាំងនោះនៅជុំវិញការិយាល័យ។
៤. ទូរស័ព្ទក្រុមហ៊ុន
នៅពេលដែលអ្នកមានទូរស័ព្ទក្រុមហ៊ុននៅក្បែរដៃ អ្នកនឹងមិនសូវរវីរវល់ពីបញ្ហាផ្ទាល់ខ្លួនដូចជាការប្រើប្រាស់ទូរស័ព្ទផ្ទាល់ខ្លួននោះទេ។ អ្នកនឹងបែរមកផ្ដោតលើការងារជាជាងបញ្ហាផ្សេងៗរបស់ខ្លួនដែលមិនពាក់ព័ន្ធ លើកលែងតែករណីបន្ទាន់ចាំបាច់ប៉ុណ្ណោះ។
៥. កាសត្រចៀក
ជាការពិតណាស់ សម្រាប់អ្នកខ្លះការស្តាប់តន្រ្តី អាចជួយបង្កើនផលិតភាពការងារ ខណៈពេលដែលអ្នកខ្លះទៀត បែរជាគិតថាវាជាការរំខានទៅវិញ។ សប៉ុន្តែការស្រាវជ្រាវបានបង្ហាញថា តន្ត្រីពិតជាអាចជួយបង្កើនផលិតភាពជាពិសេសនៅពេលដែលមានភារកិច្ចច្រើន និងច្រំដែលដូចជាការឆ្លើយតបអ៊ីមែលច្រើនជាដើម។ ដូច្នេះនៅពេលណាដែលអ្នកប្រឈមមុខនឹងការងារដែលរវល់និងគួរឱ្យធុញទ្រាន់ សូមដោតកាសស្តាប់ត្រចៀករបស់អ្នក ហើយជ្រើសរើសបទចម្រៀងដែលអ្នកពេញចិត្ត។
៦. សៀវភៅកត់ត្រា
មិនថាអ្នកអង្គុយនៅតុការិយាល័យ ឬក្នុងកិច្ចប្រជុំជាភ្ញៀវនោះទេ អ្នកគួរតែមានសៀវភៅកត់ត្រាតាមខ្លួនជាប់ជានិច្ច ដើម្បីកត់ទុកទិន្នន័យដែលសំខាន់ៗជាជាងការភ្លេចនៅពេលក្រោយ។ ផលិតភាពនឹងត្រូវបានបង្កើនឡើងនៅពេលដែលអ្នកនឹងចំណាយពេលតិចដើម្បីព្យាយាមចងចាំរឿងដែលអ្នកមិនបានកត់ត្រាទុក។
៧. កៅអីដែលផ្ដល់ភាពងាយស្រួល
សម្រាប់បុគ្គលិកការិយាល័យទាំងអស់ ចំណាយពេលភាគច្រើនរបស់ខ្លួនអង្គុយលើកៅអីក្នុងការិយាល័យ។ ការអង្គុយយូរអាចបណ្ដាលឲ្យមានបញ្ហាសុខភាព ជាពិស្រសបើយើងមិនអង្គុយមិនបានត្រឹមត្រូវ ឬមានកៅអីការិយាល័យដែលមិនអាចទ្រទ្រង់យើងបានត្រឹមត្រូវ។ ដូច្នេះការជ្រើសរើសកៅអីដែលផ្ដល់ភាពងាយស្រួលពិតជាមានសារសំខាន់ណាស់សម្រាប់ផលិតភាពការងាររបស់បុគ្គលិក៕