កុំភ្លេច Downloadទុក! ក្រសួងដាក់ដំណើរការកម្មវិធី "ថតផ្លូវ" ជូនពលរដ្ឋទូទាំងប្រទេសជាផ្លូវការ
- 2018-12-13 02:52:19
- ចំនួនមតិ 0 | ចំនួនចែករំលែក 0
កុំភ្លេច Downloadទុក! ក្រសួងដាក់ដំណើរការកម្មវិធី "ថតផ្លូវ" ជូនពលរដ្ឋទូទាំងប្រទេសជាផ្លូវការ
ចន្លោះមិនឃើញ
ក្រសួងសាធារណការ និងដឹកជញ្ជូន ប្រកាសដាក់ដំណើរការប្រព័ន្ធAppកម្មវិធីថ្មីឈ្មោះថា " កម្មវិធីថែទាំផ្លូវ (ROAD CARE Mobile App) " ជាផ្លូវការនៅថ្ងៃនេះ។ កម្មវិធីនេះ អាចឲ្យប្រជាពលរដ្ឋទាញយកមកប្រើប្រាស់បាននៅលើទូរស័ព្ទដៃ ដើម្បីថតរូបភាព ជង្ហុកសម្បុកមាន់ ផ្ញើមកក្រុមការងារបច្ចេកទេសក្រសួងភ្លាមៗ។ បន្ទាប់ពី ទទួលបានរូបភាពរួចហើយ ក្រុមការងារក្រសួងនឹងចុះត្រួតពិនិត្យ និងជួសជុលភ្លាមៗ ដើម្បី បង្ការ កុំឲ្យរីករាលដាលកាន់តែធំ ដែលអាចបង្កគ្រោះថ្នាក់ចរាចរដល់អ្នកធ្វើដំណើរ ។
ការប្រើប្រាស់ ប្រព័ន្ធAppថ្មីនេះ គឺវាមានសារៈសំខាន់ណាស់ សម្រាប់ការចូលរួមរបស់បងប្អូនប្រជាពលរដ្ឋ ក្នុងការផ្ដល់ព័ត៌មាន និងថតរូបភាពផ្លូវខូច និងផ្លូវដែលមានសម្បុកមាន់ច្រើន ផ្ញើបញ្ជូនមកក្នុង ប្រព័ន្ធAppនេះ ដើម្បីក្រុមការងារដោះស្រាយភ្លាមៗ។ Appនេះ មានការចងក្រងផ្លូវគ្រប់រាជធានី ខេត្ដ រងការប៉ះពាល់ សម្បុកមាន់ និងបានបង្ហាញកាន់តែច្បាស់លាស់ ខណៈពេលដែលបងប្អូនប្រជាពលរដ្ឋបានថតផ្ញើរូបភាពចូលក្នុងប្រព័ន្ធនេះ។
ឯកឧត្តម ស៊ុន ចាន់ ទេសរដ្ឋមន្ត្រី រដ្ឋមន្ត្រីនៃក្រសួងសាធារណៈការ ធ្លាប់អះអាងថា ប្រព័ន្ធ App ទំនើបនេះ គឺល្អណាស់ ដោយសារតែនៅពេលដែលមានការបញ្ចូនរូបមកភ្លាមវាចេញ ពណ៌ ក្រហម និងដឹងព័ត៌មានពិតប្រាកដ ថាតើសម្បុកមាន់នេះ ឬកន្លែងផ្លូវខូចនេះនៅត្រង់ណា ម្ដុំណា ផ្លូវណាមួយ។ លើសពីនេះទៀត ក្នុងពេលទទួលបានព័ត៌មាននេះ ក្រសួងនឹងផ្ដល់ជូន ទៅឱ្យមន្ទីរសាធារណការរាជធានី ខេត្ដ ឬមន្រ្ដីជំនាញក្រសួង ដើម្បីចុះទៅពិនិត្យ និងជួសជុល សម្បុកមាន់តាមកន្លែងដែលបានខូចនោះ។ ឯកឧត្តមបានបន្ដថា ក្រោយពីការជួសជុលកន្លែង សម្បុកមាន់នេះរួច ហើយថតរូបភាពដាក់បញ្ជូលក្នុងប្រព័ន្ធAppនេះ ត្រឡប់មកវិញ វានឹងក្លាយ ជាពណ៌បៃតង។
បញ្ជាក់ តាមរយៈប្រព័ន្ធ Appនេះ ក៏មានដាក់ឈ្មោះប្រធានមន្ទីរសាធារណការ និងដឹកជញ្ជូនទាំង២៥ រាជធានី ខេត្ដ ដើម្បីឱ្យប្រជាពលរដ្ឋស្គាល់មុខមន្ត្រី និងដាក់បង្ហោះចំនួនផ្លូវខូច ផ្លូវមានសម្បុកមាន ប៉ុន្មានសរុបប្រចាំខែ បានជួសជុលរួចនៅតាមរាជធានី ខេត្ដនីមួយៗ ដើម្បីឱ្យបានដឹងទាំងអស់គ្នាផងដែរ។