មិនចង់ទៅណាឆ្ងាយអស់លុយច្រើន ៥កន្លែងនេះដើរលេងចុងឆ្នាំសប្បាយក្នុងពិភពធម្មជាតិ
- 2018-12-13 05:04:46
- ចំនួនមតិ 0 | ចំនួនចែករំលែក 0
មិនចង់ទៅណាឆ្ងាយអស់លុយច្រើន ៥កន្លែងនេះដើរលេងចុងឆ្នាំសប្បាយក្នុងពិភពធម្មជាតិ
ចន្លោះមិនឃើញ
ក្នុងឱកាសឈប់សម្រាកខាងមុខនេះ ប្រជាពលរដ្ឋខ្មែរតែងរកកន្លែងសម្រាកលម្ហែកាយជួបជុំគ្រួសារក្នុងឱកាសដ៏ពិសេសនេះ។ បើមិនចង់ទៅណាឆ្ងាយអស់លុយច្រើនទេ បងប្អូនអាចធ្វើដំណើរកម្សាន្តទៅតំបន់កម្សាន្ត ៥ កន្លែងខាងក្រោមនេះបាន ឮអ្នកធ្លាប់ទៅនិយាយថា ទេសភាពស្អាត ម្ហូបក៏ធូរថ្លៃទៀត។ តោះ ទៅស្គាល់គ្នា៖
១. ភូមិត្នោត
ភូមិត្នោតគឺជារមណីយដ្ឋានកែច្នៃតាមបែបធម្មជាតិពិតៗ មានទីតាំងស្ថិតនៅមិនឆ្ងាយពីភ្នំពេញទេ។ ដើម្បីទៅដល់ទីនោះប្រិយមិត្តត្រូវធ្វើដំណើរតាមផ្លូវជាតិលេខ២ គឺតាមផ្លូវទៅកាន់រមណីយដ្ឋានទន្លេបាទី និង ភ្នំជីសូរដែរ ដោយចំណាយពេលប្រហែល ៤៥នាទីប៉ុណ្ណោះ ពីភ្នំពេញមក។
ភូមិត្នោតមាន ទេសភាពស្អាត ត្រជាក់ស្រួល កន្លែងសម្រាប់ជួលអង្គុយលេងគឺ នៅក្រោមដើមត្នោតតែម្ដង ឯម្ហូបវិញមានរសជាតិឆ្ងាញ់ហើយតម្លៃសមរម្យ។ ជាពិសេសគឺម្ហូបបែបស្រុកស្រុកស្រែ ប្រមូលពីតាមភូមិស្រុកបែបធម្មជាតិពិតៗ ដូចជា មាន់ស្រែ ត្រីស្រែ សម្លគ្រប់មុខជូនតាមសំណូមពរឥតមានទាល់តែម្ដង។
កាន់តែពិសេសមានអាងហែលទឹកសម្រាប់ក្មេងៗថែមទៀតផង។ ជាងនេះទៅទៀត ភ្ញៀវទៅលេងកម្សាន្តក៏អាចទិញផ្លែត្នោត និងស្ករត្នោតធម្មជាតិពិតៗ។
២. សួនសុបិន
រមណីយដ្ឋានសួនសុបិន-ព្រែកឯង គឺជាកន្លែងកម្សាន្តដ៏ពេញនិយមសម្រាប់ក្រុមគ្រួសារដែលចង់ទៅលម្ហែកាយនៅចុងសប្តាហ៍។ ទៅលេងកម្សាន្តនៅទីនោះ ភ្ញៀវទេសចរអាចស្របយកខ្យល់អាកាសដ៏ត្រជាក់ និងមានម្លប់ឈើដ៏ត្រឈឹងត្រឈៃទៀតផង។ មិនត្រឹមតែប៉ុណ្ណោះ រមណីយដ្ឋានសួនសុបិន-ព្រែកឯង មានកន្លែងលេងសម្រាប់កុមារ និងអាងហែលទឹកឌ៏ស្រស់ស្អាត។ អ្វីដែលគួរឲ្យចាប់អារម្មណ៍ទៅទៀតនោះ គឺ មានស្រះធំៗសម្រាប់ស្ទូចត្រីក្នុងមួយម៉ោងមានតម្លៃ៣ដុល្លារឡើង។
បើនិយាយអំពីម្ហូបអាហារវិញ គឺគួរឲ្យឆ្ងាញ់ជាប់មាត់។ រមណីយដ្ឋានសួនសុបិន មានធ្វើម្ហូបអាហារខ្មែរជាច្រើនប្រភេទជ្រើសរើសតាមចំណង់ចំណូលចិត្តជាមួយតម្លៃសមរម្យ។ រមណីយដ្ឋានសួនសុបិនមានទីតាំងនៅតាមផ្លូវទៅរោងចក្រស្រាបៀរ Tiger ចម្ងាយប្រហែល១គីឡូម៉ែតពីផ្លូវជាតិលេខ១។
៣. អន្លង់ភ្ញៀវ រមណីយដ្ឋានថ្មីនៅតាកែវ
អន្លង់ភ្ញៀវ ជាឈ្មោះរមណីយដ្ឋានបែបធម្មជាតិកែច្នៃមួយ ដែលកំពុងទាក់ទាញអ្នកទស្សនាខ្លាំង បើទោះបីជានៅទីនោះមិនទាន់បើកដំណើរការជាផ្លូវការក្ដី។ ក្នុងរមណីយដ្ឋាននេះមានសួនកម្សាន្ត និងចម្ការដំណាំជាច្រើនប្រភេទនៅតាមជើងភ្នំនិងចង្កេះភ្នំ និងមានគម្រោងសាងសង់កន្លែងកម្សាន្ត កន្លែងងូតទឹកជាច្រើនផ្សេងទៀត ។ រមណីយដ្ឋានថ្មីនេះមានទេសភាពអមដោយជួរភ្នំព័ទ្ធជុំវិញតែម្ដង។ អន្លង់ភ្ញៀវមានទីតាំងស្ថិតនៅក្នុងភូមិស្រែជើងរាស្ត្រ ឃុំត្រពាំងក្រញូង ស្រុកត្រាំកក់ ខេត្តតាកែវ។ យ៉ាងណាក្ដី រមណីយដ្ឋាននេះមិនទាន់បើកដំណើរការទាំងស្រុងនៅឡើយទេ ប៉ុន្តែក៏មានភ្ញៀវចាប់ផ្ដើមទៅលេងបណ្ដើរៗហើយព្រមជាមួយម្ហូបអាហារដ៏សម្បូរបែបនឹងតម្លៃសមរម្យ។
៤. ភូមិស្ទូចបង្កង
ប្រិយមិត្តដែលកំពុងរកកន្លែងដើម្បីលំហែកាយជាមួយគ្រួសារ មិត្តភ័ក្ត្រ និងមនុស្សជាទីស្រលាញ់ អាចទៅភូមិស្ទូចបង្កងនេះបាន។ ភូមិស្ទូចបង្កងមានបរិយាកាសល្អធំទូលាយ និងមានកញ្ចុះអង្គុយលេងដ៏ស្រស់ស្អាត ហើយអ្វីដែលពិសេស គឺអ្នកទៅលេងកម្សាន្តអាចធ្វើការស្ទូចបង្កងលេងកម្សាន្ត ឬយកមកបរិភោគបាន មានរសជាតិឈ្ងុយឆ្ងាញ់។ បន្ថែមលើពីនេះយើងក៏អាចធ្វើការជ្រើសរើសមុខម្ហួបតាមចំណង់ចំណូលចិត្តបាន ក្នុងតម្លៃអាចទទួលយកបាន។
៥. ភូមិសេអាមេត្រី
"ភូមិកម្សាន្តសេអាមេត្រី" មានខ្យល់អាកាសបរិសុទ្ធ និងទីធ្លាធំទូលាយ។ភូមិកម្សាន្តខាងលើ មានកញ្ចុះអង្គុយជាប់មាត់ទឹក មានអាងហែលទឹក កន្លែងលេងកីឡាច្រើនប្រភេទ និងមានលក់ម្ហូបអាហារ បង្អែម ភេសជ្ជៈផ្សេងៗក្នុងតម្លៃសមរម្យ។ ក្រៅជាភូមិកម្សាន្ត ទីនេះក៏មានបើកសាលាបង្រៀនភាសាខ្មែរ អង់គ្លេស និងកុំព្យូទ័រ ដោយឥតបង់ថ្លៃ សម្រាប់កុមារក្រីក្រទៀងផង។ តម្លៃសំបុត្រសម្រាប់ចូលកម្សាន្ត ត្រឹមតែ ១ ដុល្លារប៉ុណ្ណោះសម្រាប់ភ្ញៀវជាតិ និងតម្លៃ ៥ដុល្លារសម្រាប់ភ្ញៀវបរទេស។ កន្លែងកម្សាន្តនេះ មានទីតាំងស្ថិតនៅត្រើយម្ខាង នៃរមណីយដ្ឋានទន្លេបាទី ក្នុងភូមិចំបក់ត្រប់ ឃុំព្រែករកា ស្រុកកណ្ដាលស្ទឹង ខេត្តកណ្ដាល តាមបណ្ដោយផ្លូវជាតិលេខ២ មានចម្ងាយប្រហែល២០គីឡូម៉ែត្រពីស្ពានអាកាសក្បាលថ្នល់៕