ប្រាំមួយចំណុចគួរដឹង ដើម្បីសុវត្ថិភាពពេលបើកបរ
- 2018-12-13 07:30:32
- ចំនួនមតិ 0 | ចំនួនចែករំលែក 0
ប្រាំមួយចំណុចគួរដឹង ដើម្បីសុវត្ថិភាពពេលបើកបរ
ចន្លោះមិនឃើញ
គ្រោះថ្នាក់ចរាចរណ៍បានសម្លាប់មនុស្សខ្ទង់រយនាក់ជារៀងរាល់ខែ ជាក់ស្តែងកាលខែវិច្ឆិកា កន្លងទៅនេះមនុស្សស្លាប់ដោយគ្រោះថ្នាក់ចរាចរណ៍មាន១៤២នាក់។
ទោះយ៉ាងណាបញ្ហាគ្រោះថ្នាក់ចរាចរណ៍អាចកាត់បន្ថយបានបើអ្នកបើកបរគោរព ឬចេះយកចិត្តទុកដាក់លើចំណុចទាំងប្រាំមួយនេះ។
ចំណុចទីមួយគឺការបើកបរដោយមិនប្រើប្រាស់ទូរសព្ទដៃពេលកំពុងបើកបរ ឬអាចប្រើបានបើមានឧបករណ៍ភ្ជាប់សំឡេងដែលអនុញ្ញាតដោយច្បាប់។
សម្រាប់ចំណុចបន្ទាប់គឺអ្នកបើកបរនិងអ្នករួមដំណើរត្រូវពាក់ខ្សែក្រវ៉ាត់សុវត្ថិភាពគ្រប់ពេលបើកបរ និងចំណុចដែលសំខាន់មួយទៀតគឺបើកបរដោយមិនពិសាគ្រឿងស្រវឹង។ បើតាមច្បាប់ស្តីពីចរាចរណ៍ផ្លូវគោកហាមឃាត់អ្នកបើកបរមានជាតិអាល់កុល០,២៥មីលីក្រាមក្នុងមួយលីត្រខ្យល់បើកបរ និងបើមានជាតិអាល់កុលចាប់ពី០,៤០មីលីក្រាមក្នុងមួយលីត្រខ្យល់ប្រឈមនឹងជាប់ពន្ធនាគារ។
សម្រាប់ចំណុចទីបួនគឺបើកបរក្នុងល្បឿនសុវត្ថិភាព។ ត្រង់ចំណុចនេះចង់មានន័យថាដូចជារថយន្តធុនតូចតាមច្បាប់កំណត់ល្បឿនអតិបរមា៤០គីឡូម៉ែត្រក្នុងមួយម៉ោងសម្រាប់ការបើកបរក្នុងទីប្រជុំជន និង៨០គីឡូម៉ែត្រក្នុងមួយម៉ោងនៅក្រៅទីប្រជុំជន។
ចំណែកចំណុចទីប្រាំគឺអ្នកបើកបរត្រូវទុកគម្លាតសុវត្ថិភាពក្នុងការបើកបរ ដោយក្នុងទីប្រជុំជនត្រូវទុកចន្លោះសុវត្ថិភាពយ៉ាងតិច១វិនាទី និងក្រៅទីប្រជុំជនយ៉ាងតិច២វិនាទី។
សម្រាប់ចំណុចពិសេសចុងក្រោយគឺត្រូវធ្វើការត្រួតពិនិត្យយានយន្តតាមពេលកំណត់ដោយច្បាប់ក្នុងរយៈពេលពីរឆ្នាំម្តង ឬមួយឆ្នាំម្តងទៅតាមប្រភេទយានយន្ត៕