ប្រកែកគ្នាជិតមួយជីវិតហើយ តើអាហារកំប៉ុងល្អ ឬអាក្រក់សម្រាប់សុខភាព?

2018-12-18 08:06:03
ចំនួនមតិ 0 | ចំនួនចែករំលែក 0

ចន្លោះមិនឃើញ

ការជ្រើសរើសយកអាហារកំប៉ុងមកទទួលទាន ទំនងជាវិធីសាស្ត្រដ៏ងាយស្រួល និងឆាប់រហ័សមួយដើម្បីឲ្យអ្នកបំពេញក្រពះ ជាមួយការចំណាយតិច។ ជាយូរយារណាស់មក មនុស្សគ្រប់គ្នាបានលើកឡើងពីផលប៉ះពាល់របស់អាហារកំប៉ុង តាមទ្រឹស្ដីរបស់វេជ្ជបណ្ឌិតនេះ ឬការស្រាវជ្រាវរបស់គ្រឹះស្ថាននោះ។ តើការពិត អាហារកំប៉ុងពិតជាអាក្រក់មែន ឬមានកត្តាអ្វីផ្សេងទៀតដែលធ្វើឲ្យវាមានបញ្ហា?

អ្នកជំនាញផ្នែកអាហារូបត្ថម្ភបានលើកឡើងថា មានប្រភេទអាហារកំប៉ុងមួយចំនួនដូចជា ប៉េងប៉ោះ សណ្ដែក ល្ពៅ និងត្រីធូណា ពិតជាមានសុវត្ថិភាព ហើយល្អខ្លាំងចំពោះសុខភាព។ ម្យ៉ាងវាអាចរក្សាគុណភាពបានយូរ ដូច្នេះវាចំណេញខ្លាំងសម្រាប់អ្នកប្រើប្រាស់។

អ្នកខ្លះយល់ថា អាហារដែលគេកែច្នៃហើយយកទៅច្រកចូលកំប៉ុងនេះបានបាត់បង់ ឬថយចុះជីវជាតិ។ ផ្ទុយទៅវិញ ការបកស្រាយរបស់អ្នកជំនាញបានបញ្ជាក់ថា ការកែច្នៃដោយត្រឹមត្រូវតាមក្បួនខ្នាត មិនបានប៉ះពាល់ដល់គុណភាពរបស់ជាតិប្រូតេអ៊ីន កាបូនអ៊ីដ្រាត ជាតិខ្លាញ់ ឬជាតិរ៉ែ និងវីតាមីន ដែលមានស្រាប់ពីធម្មជាតិនោះទេ។ ទោះជាយ៉ាងណា ជីវជាតិទាំងនោះអាចនឹងបាត់បង់ខ្លះ ព្រោះការផ្សាំអាហារមុនយកទៅច្រកកំប៉ុង គឺតម្រូវឲ្យប្រើប្រាស់សីតុណ្ហភាពកម្ដៅខ្ពស់ ហើយជាតិវីតាមីនមួយចំនួនដូចជា C និង B អាចត្រូវបានបំផ្លាញ ដោយសារវារលាយទៅក្នុងទឹក។

មែនទែនទៅ អាហារដែលនៅក្នុងកំប៉ុងមិនមែនជាបញ្ហាធំទេ តែកំប៉ុងដែលយកមកវេចខ្ចប់ទៅវិញទេ ដែលជាហានិភ័យធំដល់សុខភាព។ ត្បិតអី កំប៉ុងដែលគេប្រើនោះមានផ្ទុកសារធាតុគីមីម្យ៉ាងហៅថា BPA។ សារធាតុគីមីប្រភេទនេះ អាចបណ្ដាលឲ្យប៉ះពាល់ដល់អ័រម៉ូនមួយចំនួន និងបង្កើនសម្ពាធឈាម ឬប្រឈមនឹងជំងឺមហារីកជាដើម។ ដូច្នេះហើយ ទើបអ្នកជំនាញទូន្មានថា ត្រូវប្រយ័ត្នកុំឲ្យកំប៉ុងកំប៉ិត ឬខូចទ្រង់ទ្រាយ ព្រោះថាពេលកំប៉ុងមានការខូចខាត ជាតិ BPA នឹងហូរចូលទៅក្នុងអាហារ និងភេសជ្ជៈមិនខាន។

ជាមួយគ្នានេះ អ្នកជំនាញបានដាក់ការសង្ស័យថា សារជាតិ BPA អាចបង្កជាការប៉ះពាល់ដល់ អ័រម៉ូនភេទ ដែលនឹងបណ្ដាលឲ្យមនុស្សផ្លាស់ប្តូរចំណាប់អារម្មណ៍ផ្លូវភេទ ប៉ះពាល់ដល់ការបន្តពូជ និងខួរក្បាលជាដើម។

មានភស្តុតាងជាក់លាក់ជាច្រើនតែបញ្ជាក់ថា BPA អាចរំខានដល់ប្រព័ន្ធខួរក្បាល និងអ័រម៉ូន។ ការសិក្សានៅ Clinical Endocrinology ក្នុងឆ្នាំ ២០១៦ បានរកឃើញថា BPA មានការទាក់ទងគ្នានៅនឹងអ័រម៉ូនអាំងស៊ុយលីន ដែលធ្វើឲ្យមនុស្សស្រីឆាប់ធាត់។ ឯនៅឆ្នាំ ២០១៧ ការពិសោធន៍លើសត្វកណ្ដុរបានហុចលទ្ធផលថា BPA អាចមានការប៉ះពាល់បន្តិចបន្តួចទៅលើអ្នកមានផ្ទៃពោះ និងធ្វើអ័រម៉ូនឃ្លាន(Ghrelin) មានការប្រែប្រួល។ មានន័យថា វាប៉ះពាល់ទៅដល់សមត្ថភាពខួរក្បាល និងការគិត ដូច្នេះវានឹងធ្វើឲ្យអ្នកឃ្លានខុសប្រក្រតី។ ការសិក្សាផ្សេងទៀត បានឲ្យដឹងដែរថា ជាតិគីមីនេះ អាចបង្កឲ្យមានបញ្ហាមហារីកសុដន់ ការបន្តពូជ និងការរំលាយអាហារជាដើម៕

អត្ថបទ៖ សុខណា

ពាក្យទាក់ទង