ច្បាស់ហើយ! រឿងថាមានសត្វខ្លាធំចេញខាំគោអ្នកស្រុកនៅបាត់ដំបង តាមពិតជាខ្លាឃ្មុំ
- 2018-12-19 02:24:02
- ចំនួនមតិ 0 | ចំនួនចែករំលែក 0
ច្បាស់ហើយ! រឿងថាមានសត្វខ្លាធំចេញខាំគោអ្នកស្រុកនៅបាត់ដំបង តាមពិតជាខ្លាឃ្មុំ
ចន្លោះមិនឃើញ
ក្រសួងបរិស្ថានបានឲ្យដឹងថាមានសត្វខ្លាឃ្មុំបានចេញខាំគោរបស់អ្នកស្រុកសំឡូត ខេត្តបាត់ដំបង និងថានៅតំបន់នោះមានវត្តមានខ្លាឃ្មុំជាច្រើនផងដែរ។
កាលពីម្សិលមិញមានសេចក្តីរាយការណ៍ថាមានសត្វខ្លាមួយក្បាលបានចេញមកខាំគោរបស់អ្នកភូមិនៅក្នុងស្រុកសំឡូត ខេត្តបាត់ដំបង និងបានបង្កការភ័យខ្លាចដល់ប្រជាពលរដ្ឋ។
នៅល្ងាចថ្ងៃដដែលក្រសួងបរិស្ថានបានសរសេរលើទំព័តហ្វេសប៊ុករបស់ខ្លួនដោយដកស្រង់សម្តីប្រធានមន្ទីរបរិស្ថានខេត្តថាគឺជាសត្វខ្លាឃុំ ដែលរស់នៅក្នុងព្រៃការពារនោះទេ ដែលបានចេញមកខាំសត្វគោមួយក្បាលរបស់អ្នកភូមិស្ទឹងតូច ឃុំកំពង់ល្ពៅ នៅស្រុកសំឡូត។
បើតាមប្រភពខាងលើវត្តមានខ្លាឃ្មុំមានចំនួនច្រើននៅក្នុងតំបន់ការពារធម្មជាតិក្នុងខេត្តបាត់ដំបង។ លោកប្រធានមន្រទីបរិស្ថានខេត្ត កត បូរ៉ាន បានអះអាងសមត្ថកិច្ច បានរកឃើញ ដានជើងនៅលើដី និងរោមខ្លាឃ្មុំធំជាប់នឹងស្នាមរបួសរបស់សត្វគោ ដែលខ្លាឃ្មុំនោះបានចចេញពីព្រៃមកខាំសត្វគោមួយក្បាលនោះ។
លោកបញ្ជាក់បន្ថែមថា៖ «នេះពិតជាមានវត្តមាននៃសត្វខ្លាឃ្មុំពិតប្រាកដ ព្រោះបើពិនិត្យឃើញ មានរោម និងស្នាមក្រចកជាប់នឹងរបួសត្វគោ ដោយឡែករបៀបវាយប្រហារចំណីអាហារគឺវាខាំបំពង់កក្រោម និងខ្ទង់ចម្រុះ»។
លោកឲ្យដឹងដែរថា ក្នុងតំបន់ប្រើប្រាស់ច្រើនយ៉ាងសំឡូត ដែលស្ថិតនៅក្នុងស្រុកសំឡូត ខេត្តបាត់ដំបង ជាជម្រករស់នៅនៃហ្វូងខ្លាឃ្មុំព្រៃ ដែលខ្លះមានទម្ងន់ចាប់ពី១៤០គីឡូក្រាម។ លោកប្រធានមន្ទីរ បញ្ជាក់ដែរថាបន្ទាប់ពីមានការការពារនិងអភិរក្សធនធានធម្មជាតិ បានល្អប្រសើរនៅតាមតំបន់ការពារធម្មជាតិ រយៈពេល១០ឆ្នាំកន្លងមកនេះ ជាពិសេសនៅក្នុងខេត្តបាត់ដំបង វត្តមានសត្វព្រៃមានចំនួនកើនឡើងច្រើន។
គួរបញ្ជាក់ថា បច្ចុប្បន្ននេះ ក្រសួងបរិស្ថានបានបង្កើត និងគ្រប់គ្រងតំបន់ការពារធម្មជាតិ ចំនួន៥១កន្លែង លើផ្ទៃដីប្រមាណ៧,៥លានហិកតាទូទាំងប្រទេស៕