តុលាការអេស្ប៉ាញនឹងប្រកាសទោសពីបទបន្លំពន្ធរបស់ Ronaldo នៅខែមករា

2018-12-23 03:45:37
ចំនួនមតិ 0 | ចំនួនចែករំលែក 0

ចន្លោះមិនឃើញ

តុលាការអេស្ប៉ាញបាននិយាយថាសាលក្រម (ការសម្រេចវិនិច្ឆ័យទោស) ពីបទបន្លំពន្ធរបស់ Cristiano Ronaldo នឹងត្រូវប្រកាសនៅថ្ងៃទី ២១ ខែមករាខាងមុខ។ នេះបើតាម ទីភ្នាក់ងារព័ត៌មាន AP ដកស្រង់ដោយ The Washington Post កាលពីថ្ងៃសៅរ៍។

Ronaldo ត្រូវគេរំពឹងថានឹងមានទោស តែតុលាការនឹងព្យួរទោសដែល Ronaldo នឹងត្រូវជាប់ពន្ធនាគារ២ឆ្នាំ ដោយមានការព្រមព្រៀងគ្នារវាងតារាឆ្នើមព័រទុយហ្គាល់ ព្រះរាជអាជ្ញា និង អាជ្ញាធរពន្ធដារអេស្ប៉ាញលើកិច្ចព្រមព្រៀងមួយ។

កិច្ចព្រមព្រៀងនោះរួមមាន Ronaldo សុខចិត្តបង់ប្រាក់ពិន័យ ២២លានដុល្លារដើម្បីរួចផុតពីការជាប់ពន្ធនាគារ។

នៅប្រទេសអេស្ប៉ាញ ចៅក្រមអាចព្យួរទោសជនល្មើស២ឆ្នាំឬតិចជាងនេះ ប្រសិនបើជាបទល្មើសលើកដំបូង។

កាលពីឆ្នាំមុន ព្រះរាជអាជ្ញាអេស្ប៉ាញបានចោទប្រកាន់ Ronaldo ពីបទក្លែងបន្លំពន្ធ៤ករណី ចន្លោះពីឆ្នាំ ២០១១-១៤ ដែលមានតម្លៃ ១៦,៥ លានដុល្លារ។

អតីតកីឡាករ Real Madrid រូបនេះត្រូវបានចោទប្រកាន់ថាបានបើកក្រុមហ៊ុនសំបក (ក្រុមហ៊ុនដែលមានតែឈ្មោះតែគ្មានសកម្មភាពជាក់លាក់ណាមួយ) ដើម្បីគេចវេះពីការបង់ពន្ធ។ ការចោទប្រកាន់មិនជាប់ពាក់ព័ន្ធនឹងពន្ធលើប្រាក់បៀវត្សរបស់ Rpnaldo នៅក្លឹបអេស្ប៉ាញឡើយ។

Messi និងឪពុកឈ្មោះ Jorge ត្រូវបានតុលាការអេស្ប៉ាញផ្តន្ទាទោសពីបទបន្លំពន្ធកាលពីឆ្នាំ២០១៦

Lionel Messi ក៏ធ្លាប់ត្រូវបានព្យួរទោសមិនឲ្យជាប់ពន្ធនាគារ២១ខែ កាលពីឆ្នាំ២០១៦ផងដែរ ក្រោយតុលាការអេស្ប៉ាញ បានរកឃើញថាមានទោសពីបទបោកបញ្ឆោតអាជ្ញាធរពន្ធដារដែលគិតជាទឹកប្រាក់សរុប ៤,៦ លានដុល្លារ។

ស្វែងយល់ពីបញ្ហាបង់ពន្ធដ៏ស្មុគស្មាញ នៅអេស្ប៉ាញ

បើតាមច្បាប់ពន្ធលើប្រាក់ចំណូលឆ្នាំ២០១៦ ប្រាក់ចំណូលចាប់ពី ១២ ៤៥០ អឺរ៉ូ ទៅដល់ ៦០០ ០០០ អឺរ៉ូ ត្រូវបង់ពន្ធចាប់ ពី១៩% ទៅ៤៥%។ ដោយឡែករដ្ឋបានកំណត់ "ពន្ធពិសេសសម្រាប់ជនបរទេស ធ្វើការនៅអេស្ប៉ាញ" ដែលធូរប្រមាណពាក់កណ្ដាលបើធៀប នឹងអ្នកបង់ពន្ធទូទៅ។ ការកំណត់បែបនេះមានគោលបំណង លើកទឹកចិត្តឲ្យអ្នកមានទេពកោសល្យ និង កំពូលកីឡាករជុំវិញពិភពលោក ទៅប្រកបអាជីពនៅប្រទេសនេះ។

ច្បាប់នេះ ជួនកាលគេហៅថា "ច្បាប់ Beckham (Beckham Law)” ព្រោះកាលពីឆ្នាំ ២០០៣ ពេលDavid Beckham ទៅលេងឲ្យ Real Madrid គាត់ចំណេញថ្លៃបង់ពន្ធពាក់កណ្ដាល ឬបង់ត្រឹម ២៤% ប៉ុណ្ណោះ។

ច្បាប់លើពន្ធពិសេសនេះ តម្រូវឲ្យបង់ត្រឹម ២៤% ចំពោះចំណូលក្រោម ៦០ ០០ អឺរ៉ូ តែបើលើសពីនេះ នៅតែត្រូវបង់ ៤៥% ដដែល។ ក៏ប៉ុន្តែលក្ខណៈពិសេសមួយទៀតរបស់ "ច្បាប់ Beckham” គឺ មិនថាចំណូលច្រើនប៉ុណ្ណាក៏ដោយ បង់ពន្ធត្រឹម២៤%ទេក្នុងរយៈពេល៥ ឆ្នាំដំបូង ផុតពីនោះត្រូវបង់ ៤៥%ដដែល។

ដូច្នេះមានន័យថា រយៈពេល៥ឆ្នាំដំបូង Ronaldo ត្រូវបង់ពន្ធតែ ២៤%ប៉ុណ្ណោះ ប៉ុន្តែ៤ឆ្នាំចុងក្រោយនៅ Real Madrid ម្ចាស់ពាន Ballon d'Or ៥សម័យកាលត្រូវបង់ពន្ធ៤៥% ពោលគឺចំណូលជិតពាក់កណ្ដាលរបស់ខ្លួនត្រូវចែករំលែកឲ្យរដ្ឋាភិបាលអេស្ប៉ាញ៕

ប្រភព៖ BBC | Washingtonpost ប្រែសម្រួល៖ សុខ លាងហ៊ត