គួរឲ្យសរសើរអតីតហ្វេសស៊ីលេខ១ ថោ សោម៉ាលីន ដាច់ខាត ត្រូវនាំកូនៗឲ្យមកស្គាល់អង្គរវត្តរបស់ខ្មែរ

2018-12-24 04:47:23
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយទៅរស់នៅស្រុកគេច្រើនឆ្នាំ អតីតស្រីស្អាតលេខ១ ឆ្នាំ២០០៤ ថោ សោម៉ាលីន បាននាំទាំងគ្រួសារមកលេងប្រទេសកំណើត លេងក្រុមគ្រួសារថ្មីៗ ដែលគោលបំណងធំបំផុត គឺនាងត្រូវនាំកូនរបស់នាង ឲ្យមកស្គាល់ប្រាសាទអង្គរវត្តដ៏ល្បីល្បាញរបស់ខ្មែរអោយបាន។

សោម៉ាលីន បានប្រាប់ឲ្យដឹងថា តាំងពីកូនៗនាងដឹងក្ដីមក នាងតែងរៀបរាប់រឿងរ៉ាវជាច្រើនពីកម្ពុជា ក្នុងនោះបំណងទី១ គឺចង់ឲ្យកូនៗដឹងយ៉ាងហោចណាស់ថា ម្ដាយរបស់គេជាជនជាតិខ្មែរ កើតនៅក្នុងប្រទេសកម្ពុជា ព្រោះខ្លាចកូននាងមិនដឹង ដោយសារនាង និងកូនៗរស់នៅប្រទេសនូវែលហ្សេឡង់។ "ព្រោះកូនៗខ្ញុំឥឡូវ ការចង់របស់គាត់ចាប់ផ្ដើមមាន គាត់មានវ័យ ៣ឆ្នាំ និង ៥ឆ្នាំ គាត់អាចចងចាំបាន អីចឹងហើយ ខ្ញុំរមែងប្រាប់ពីគាត់ពីប្រទេសកម្ពុជា អីចឹងគាត់អាចចាំបាន គាត់អាចស្រមៃពីទិដ្ឋភាពខ្លះបាន"។

រឿងមួយក្នុងចំណោមរឿងដែលនាង បានប្រាប់ទៅកូនៗនោះ គឺរឿងអំពីប្រាសាទអង្គរវត្តរបស់ខ្មែរ ដែលពួកគេចាប់អារម្មណ៍ខ្លាំង ហើយពួកគេតែងដេញសួរជាច្រើនពីសម្បត្តិបេតិកភណ្ឌមនុស្សជាតិរបស់ខ្មែរមួយនេះ។ ដូច្នេះហើយ ទើបនាងដាច់ខាតត្រូវនាំកូនៗ មកទស្សនា និងស្គាល់ឲ្យទាល់តែបាន។

“ខ្ញុំគិតថា អង្គរវត្ត គឺជាកន្លែងដ៏ពិសេសរបស់យើងអីចឹងណា អីចឹងក៏នាំគាត់មកមើលឲ្យហើយ យើងមិនដឹងថា ៥ឆ្នាំ ១០ឆ្នាំទៀត វាយ៉ាងម៉េចទេ ជួនកាលខ្លាចវាបាក់វាបែកទៅ ដល់នាំគាត់មក មិនដូចអ្វីដែលយើងប្រាប់ ឬក៏មិនដូចរូបភាព អីចឹងនាំគាត់មកមើលឲ្យហើយ!”។ សោម៉ាលីន បន្ថែម។

ថោ សោម៉ាលីន បច្ចុប្បន្នមានវ័យ ៣៥ឆ្នាំ មកពីខេត្តព្រៃវែង ហើយនាង គឺជាអតីតស្រីស្អាតលេខ១ឆ្នាំ ២០០៤។ ក្រោយពីចេញទៅបន្តការសិក្សានៅប្រទេសញ៉ូហ្សេលែនកាលពីឆ្នាំ ២០០៧ និងបានជួបជួន និងចាប់ដៃគ្នាសាងគ្រួសារជាមួយជនជាតិកូរ៉េនៅលោកខាងលិចនេះ នាងទើបនឹងបានមកដល់ប្រទេសកំណើតកាលពីដើមខែធ្នូ ឆ្នាំនេះ ដែលជាដំណើរចុងក្រោយបំផុតត្រឹមពេលនេះ ក្នុងពេលកន្លងមក នាងក៏ធ្លាប់មកលេងច្រើនដងហើយ។

ក្រៅពីមកដើម្បីបានជួបជុំ និងសួរសុខទុក្ខគ្រួសារ គោលបំណងសំខាន់ គឺដូចខាងលើ គឺនាំកូនៗរបស់នាងទាំងពីរ មកទស្សនាប្រាសាទអង្គរវត្តដ៏ល្បីល្បាញរបស់ខ្មែរ។ តាមផែនការ ថោ សោម៉ាលីន និងគ្រួសារ គ្រោងនឹងវិលត្រឡប់ទៅប្រទេសញ៉ូហ្សេលែនវិញ នៅថ្ងៃទី ២៨ ធ្នូ ខាងមុខនេះ៕