រលកយក្សស៊ូណាមិនៅឥណ្ឌូនេស៊ី អ្នកស្លាប់ របួស និងបាត់ខ្លួន កើនជិត២ពាន់នាក់ហើយ

2018-12-25 02:46:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ទីភ្នាក់ងារកាត់បន្ថយគ្រោះមហន្តរាយឥណ្ឌូនេស៊ី បាននិយាយថា ចំនួនអ្នកស្លាប់ដោយសាររលកយក្សស៊ូណាមិ ដែលបណ្ដាលមកពីភ្នំភ្លើង Anak Krakatau បានកើនឡើងយ៉ាងហោចណាស់ដល់ ៣៧៣នាក់ហើយ។

គួររំលឹកឲ្យដឹងថា កាលពីថ្ងៃសៅរ៍ ទី២២ ខែធ្នូ ឆ្នាំ២០១៨ កន្លងទៅនេះ រលកយក្សស៊ូណាមិបានវាយប្រហារលើទីប្រជុំជន នៃតំបន់ឆ្នេរសមុទ្រនៅកោះ Sumatra និង Java។ គេជឿជាក់ថា ការផ្ទុះរបស់ភ្នំភ្លើង Anak Krakatau បង្កឲ្យមានការរអិលបាក់ដីក្រោមបាតសមុទ្រ ហើយបង្កើតជារលកយក្សតែម្ដង។

អ្នកនាំពាក្យរបស់ទីភ្នាក់ងារខាងលើ លោក Sutopo Purwo Nugroho បាននិយាយនៅក្នុងសេចក្ដីថ្លែងការណ៍មួយថា «មនុស្សចំនួន ១ ៤៥៩ នាក់បានរងរបួស ហើយ ១២៨នាក់ផ្សេងទៀតកំពុងបាត់ខ្លួន»។

យ៉ាងណាមិញ អ្នករស់នៅតំបន់ឆ្នេរជិតភ្នំភ្លើង Anak Krakatau របស់ប្រទេសឥណ្ឌូនេស៊ី ត្រូវបានគេព្រមានឲ្យចាកចេញពីតំបន់នោះ ខណៈមានការភ័យខ្លាចថា វាអាចបង្កជារលកយក្សស៊ូណាមិជាថ្មី ដោយសារតែកាលពីថ្ងៃអាទិត្យ ទី២៣ ខែធ្នូ ឆ្នាំ២០១៨ ម្សិលមិញនេះ ភ្នំភ្លើង Anak Krakatau បានផ្ទុះឡើងសារជាថ្មីម្ដងទៀត ដោយព្រួសផេះ និងផ្សែងទៅលើអាកាសយ៉ាងខ្មួលខ្មាញ់៕

ទស្សនាវីដេអូខាងក្រោម៖