មាស សុខសោភា រំឮកថាករណីហិង្សាស្រដៀង កញ្ញា ទេព បូព្រឹក្ស ធ្លាប់កើតមានមកលើខ្លួន
- 2018-12-27 09:51:56
- ចំនួនមតិ 0 | ចំនួនចែករំលែក 0
មាស សុខសោភា រំឮកថាករណីហិង្សាស្រដៀង កញ្ញា ទេព បូព្រឹក្ស ធ្លាប់កើតមានមកលើខ្លួន
ចន្លោះមិនឃើញ
ហេតុការណ៍ហិង្សា គប់សា្របៀរមកលើសិល្បករ មិនមែនជារឿងដំបូងកើតមកលើ កញ្ញា ទេព បូព្រឹក្ស ម្នាក់នោះទេ កញ្ញា មាស សុខសោភា ផ្ទាល់សរសេរលើទំព័រហ្វេសប៊ុកខ្លួនថា ក៏ធ្លាប់ជួបរឿងស្រដៀងគ្នា ដែលបញ្ហានេះ កើតឡើងលើស្រ្តី មិនថានៅក្នុងស្រុក ឬក្រៅប្រទេស។
ក្រៅពីនោះទៀតបញ្ហាបំពានផ្សេងៗក្នុងទីកន្លែងធ្វើការ លើស្រី្តពេលបំពេញការងារ អាចកើតឡើងលើស្រ្តីទូទៅ ហើយមិនត្រូវបានផ្សាយជាសារធាណៈ ដែលនេះជារឿងគួរតែលើកទឹកចិត្តជម្រុញរកយុត្តិធម៌ និងសងភាពថ្លៃថ្នូរលើស្រ្តី គ្រប់រូប មិនថាជាសិល្បករ ឬស្រ្តីណាម្នាក់នោះទេ។ នេះបើតាមការលើកឡើងដោយអ្នកគាំទ្រជាច្រើនដូចៗគ្នារបស់កញ្ញា មាស សុខសោភា និងកញ្ញា ទេព បូព្រឹក្ស ជុំវិញរឿងរ៉ាវជះស្រាបៀរពេលកញ្ញា ទេព បូព្រឹក្ស បំពេញការងារជាអ្នកចម្រៀងនៅលើឆាក កាលពីយប់ថ្ងៃទី ២៥ ខែ ធ្នូ ឆ្នាំ ២០១៨ នេះ។
ក្នុងអត្ថបទខ្លីលើផេកហ្វេសប៊ុក កញ្ញា មាស សុខសោភា បរិយាយថា៖ «ក្នុងនាមខ្ញុំជាអ្នកសិល្ប:មួយរូបអស់រយៈពេល១៥ឆ្នាំមកនេះ ខ្ញុំសូមបញ្ចេញមតិខ្លះៗ ទាក់ទងនិងរឿងដែលបានកើតទៅលើប្អូនស្រី ទេព បូព្រឹក្ស កាលពីយប់ម្សិលមិញនេះ ហើយនេះជាបញ្ហាមួយ ដែលតែងតែកើតមានមកលើសិល្បករ សិល្បការិនីយើងមួយចំនួន ទាំងរូបនាងខ្ញុំផ្ទាល់ ក៍ធ្លាប់ជួបរឿងស្រដៀងគ្នានេះដែរ មិនថានៅក្នុងប្រទេស រឺក៍ក្រៅប្រទេសឡើយ។»
តារាចម្រៀង មាស សុខសោភាបន្តទៀតថា ៖ «ដូច្នេះខ្ញុំសូមឲ្យមហាជនទាំងអស់ មេត្តាជួយឲ្យតម្លៃសិល្បការិនីខ្មែរយើង ក៍ដូចជា លើកតម្កើង និងឲ្យតម្លៃដល់ស្រ្តីទាំងអស់ទូទាំងពិភពលោក មិនថាគាត់ជាអ្នកសិល្ប: រឺក៍ជាអ្នកធ្វើការអ្វីមួយក៍ដោយ ពួកគាត់សុទ្ធតែមានតម្លៃរបស់ពួកគាត់ ហើយស្រ្តីទាំងអស់ប្រៀបបានទៅ នឹងកូនស្រី បងស្រី ប្អូនស្រី ម្តាយ និងលោកយាយ របស់យើងដូចគ្នា។»
ជាចុងក្រោយ មាស សុខសោភា សង្ឃឹមថា កញ្ញា ទេព បូព្រឹក្ស ឆាប់រកឃើញដំណោះស្រាយក្នុងប្រការណាមួយ ហើយក៍សូមអោយកញ្ញា នៅតែមានកម្លាំងចិត្ត និងរឹងមាំ តស៊ូដើម្បីសិល្ប:ខ្មែរតទៅមុខទៀត៕