អស់រយៈពេល៥ឆ្នាំ! ទីបំផុត ចិត្ត កញ្ចនា សម្រេចបានបំណងប្រាថ្នាដ៏ធំមួយ
- 2018-12-31 07:50:00
- ចំនួនមតិ 0 | ចំនួនចែករំលែក 0
អស់រយៈពេល៥ឆ្នាំ! ទីបំផុត ចិត្ត កញ្ចនា សម្រេចបានបំណងប្រាថ្នាដ៏ធំមួយ
ចន្លោះមិនឃើញ
កាលពីថ្ងៃសៅរ៍ថ្ងៃទី២២ កន្លងមកនេះតារាចម្រៀង Original ចិត្ត កញ្ចនា បានសម្រេចបំណងប្រាថ្នាដែលខ្លួនមានអស់រយៈពេលជាយូរមកហើយ នោះគឺឱកាសបានបញ្ចេញអាល់ប៊ុមដំបូងនិងការប្រគំតន្ដ្រីសម្ពោធយ៉ាងគគ្រឹកគគ្រេង ព្រមទាំងតារាល្បីៗមួយចំនួនផងដែរ។
វាគឺជាលើកទី១ហើយដែល កញ្ចនា បានប្រារព្ធពិធីប្រគំតន្ត្រីដ៏ធំបែបនេះ។ ការប្រគំតន្ដ្រី "Sweet Nightmare” បានធ្វើឡើងនៅ Factory ដែលមានអ្នកគាំទ្ររបស់ម្ចាស់បទ "អ្នកដទៃ" ចូលរួមយ៉ាងច្រើនកុះករ។ ខុសប្លែកពីតារាចម្រៀង Original Song ផ្សេងៗទៀត កញ្ចនា បានឆ្លៀតយកឱកាសក្នុងកម្មវិធីដ៏ធំសម្រាប់ខ្លួនឯងនេះ ដើម្បីផ្ដល់កម្លាំងចិត្តដល់អ្នកគាំទ្រទៅវិញ ដោយបាននិយាយរៀបរាប់នូវពាក្យពេចន៍ល្អៗ ជាច្រើនក្នុងឱកាសកម្មវិធីនេះ។
ម្ចាស់បទ "Missing You” រូបនេះបានឆ្លងកាត់នូវការតស៊ូយ៉ាងច្រើន ទម្រាំបានមកដល់ចំណុចនេះ។ មុននឹងបានក្លាយជាអ្នកចម្រៀង កញ្ចនា ចាប់ផ្ដើមឡើងតាំងពីជាគ្រូបង្រៀនហ្គីតាម្នាក់។ ដោយសារតែមានចិត្តស្រលាញ់វិស័យចម្រៀងខ្លាំង ព្រមទាំងមានសមត្ថភាពក្នុងការតែងនិពន្ធទំនុកច្រៀងខ្លួនឯងផងនោះ តារាចម្រៀងវ័យក្មេងរូបនេះជម្នះរហូតដល់បានសម្រេច។
អ្វីដែលគួរឲ្យសរសើរនិងគួរឲ្យចាប់អារម្មណ៍បំផុតនោះគឺ ក្នុងអាល់ប៊ុមថ្មីនេះ កញ្ចនា បានបញ្ចូលបទភ្លេងបែបអេឡិចត្រូនិក ឧបករណ៍ភ្លេងខ្មែរពិតជាប្រកបដោយការច្នៃប្រឌិត។ គូសបញ្ជាក់ដែរថាក្នុងអាល់ប៊ុម "Sweet Nightmare” នេះមានបទចម្រៀងចំនួន៧បទគឺ "The Dark”, “Sweet Nightmare”, “Missing You”, “Do It”, “សន្យា", “កម្លាំងចិត្ត" និង "ក្រោកឈរ" ដែលអាចចូលស្ដាប់បានដោយឥតគិតថ្លៃលើ Smart Music App៕
រូបថត៖ ផ្ដល់ឲ្យពី ចិត្ត កញ្ចនា