មកមើលចំណុចដូចគ្នាកន្លងមករបស់ Kai និង Jennie អ្នកគាំទ្រភ្លេចចាប់ភ្លឹក

2019-01-01 04:18:00
ចំនួនមតិ 0 | ចំនួនចែករំលែក 0

ចន្លោះមិនឃើញ

គ្រាន់តែបើកឆាកឆ្នាំ ២០១៩ Kai និង Jennie បានធ្វើឲ្យមជ្ឈដ្ឋានទាំងអស់ជុំវិញពិភពលោក ពិសេសអ្នកគាំទ្រភ្ញាក់ក្រញាងពីដំណឹងស្នេហារបស់ពួកគេ ក្រោយភ្នាក់ងារព័ត៌មានល្បីខាងប្រមាញ់រូប Dispatch បង្ហោះរូបភាពលួចទាក់ទងរបស់អ្នកទាំង ២។

គ្រប់គ្នានាំគ្នាចែកចាយបន្តបន្ទាប់ បន្ទាប់ពីជ្រាបដំណឹងនេះថាតារាផលិតកម្ម SM និង YG នេះលួចទាក់ទងភ្ជាប់ទំនាក់ទំនងគ្នាស្ងាត់ៗតាំងពី ២ទៅ៣ខែមុនមកម្ល៉េះ។ ម្យ៉ាងវិញទៀត ទោះបីកន្លងមក ពួកគេបង្ហាញរូបភាព និងតុបតែងខ្លួនទៅនេះទៅនោះ ក៏មិនសូវមានអ្នកចាប់ភ្លឹកថា Kai និង Jennie មានស្នេហានឹងគ្នាដែរ រហូតព័ត៌មានបែកធ្លាយនៅពេលនេះ។

យ៉ាងណាក្ដី ក្រុមអ្នកគាំទ្រ ពិសេសអ្នកលេងបណ្ដាញសង្គមក៏បានសើរើភស្តុតាងទាំងនោះមកវិញ ទើបដឹងច្បាស់ថា តារាវ័យ ២៤ និង ២២ឆ្នាំនេះភ្ជាប់ទំនាក់ទំនងនឹងគ្នាយូរហើយ។ ទស្សនាដូចតទៅ៖ នៅថ្ងៃទី ០៣ ខែតុលា ឆ្នាំ ២០១៨ ពួកគេបានបង្ហោះរូបថតនៅពីមុខ Tour Eiffel ដូចគ្នា ប៉ុន្តែគ្មានអ្នកណាចាប់អារម្មណ៍ឡើយ។

Kai

Jennie

អ្វីដែលសំខាន់ នៅលើរូបនោះ Jennie ក៏បានសរសេរដែរថា ខ្លួនបានញ៉ាំអាហារពេលល្ងាចដ៏សែនរ៉ូមែនទិក នៅមុខ Tour Eiffel ស្របពេលនៃដំណើរទៅកាន់ប្រទេសបារាំង ដើម្បីចូលរួមកម្មវិធីបង្ហាញម៉ូដមួយ ដោយពេលនោះក៏មានវត្តមាន Kai ដែរ។

រូបភាព Kai ថតលើផ្លូវស្ងាត់ ដែលអ្នកគាំទ្រជឿជាក់ថាអ្នកថតឲ្យគឺជា Jennie

ព្រឹកថ្ងៃទី ២៣ ខែធ្នូ Jennie បង្ហាញខ្លួននៅព្រលានយន្តហោះជាមួយការតុបតែងខ្លួនបែបសាមញ្ញបំផុត ប៉ុន្តែបើប្រៀបធៀបនឹង Kai ក៏មិនខុសគ្នាដែរ ពិសេសស្បែកជើង និងកន្សែងរុំក។

នៅចុងខែធ្នូ អ្នកទាំង ២មានឱកាសឈរលើឆាករួមគ្នានៅចប់កម្មវិធី Music Core ពេលនោះច្បាស់ណាស់ គ្មានអ្នកណាចាប់ភ្លឹកនឹងកាយវិការអ្នកទាំង ២ ទេ។ ប៉ុន្តែពេលនេះទើបច្បាស់ថា Kai បាញ់ក្រសែភ្នែកដាក់ Jennie រហូត៕