គន្លឹះសំខាន់ៗដែល City ត្រៀមដើម្បីយកឈ្នះ Liverpool

2019-01-02 08:08:57
ចំនួនមតិ 0 | ចំនួនចែករំលែក 0

ចន្លោះមិនឃើញ

Pep Guardiola ត្រូវសាកកម្លាំងគ្នាក្នុងប្រកួតដ៏សំខាន់ជាមួយ Liverpool នៅថ្ងៃព្រហស្បតិ៍ស្អែកនេះដើម្បីកំណត់ជោគវាសនាថាតើក្រុមណាមានសង្ឃឹមខ្ពស់ក្នុងការលើកពានលីគកំពូល Premier League។

ប្រកួតយប់ស្អែកគឺសំខាន់បំផុតសម្រាប់ក្រុមរហស្សនាមថា ពណ៌ផ្ទៃមេឃត្បិតបើចាញ់ពួកគេនឹងដាច់ពិន្ទុ Liverpool រហូតដល់១០, បើស្មើរក្សាគម្លាត៧ពិន្ទុដដែល តែបើឈ្នះ City នឹងបន្ថយមកនៅត្រឹម៤ពិន្ទុប៉ុណ្ណោះពីក្រុមកំពូលតារាង។ មុនការប្រកួតមកដល់ Pep បានត្រៀមរួចជាស្រេចពីវិធីដែលសង្ឃឹមយកបាន៣ពិន្ទុពីក្រុមភ្ញៀវ។

១. តាមរំខានអ្នកចាំទី Alisson

Pep បានប្រាប់កូនក្រុម ពិសេសខ្សែប្រយុទ្ធឲ្យតាមរំខាន Alisson របស់ Liverpool នៅពេលអ្នកចាំទីរូបនេះគ្រប់គ្រងបាល់។ ការព្យាយាមរារាំងអ្នកចាំទីនេះដោយសារ Pep មើលឃើញថាការលេងពីក្រោមទៅលើរបស់ Liverpool គឺធ្វើបានល្អណាមួយ Alisson ពូកែបញ្ជូនបាល់ទៅឲ្យមិត្តរួមក្រុម។ យ៉ាងណាការដាក់សម្ពាធលើអ្នកចាំទីអាចមានប្រយោជន៍លើ City បើសិន Alisson ភ្លាត់ស្នៀតដូចកាលប៉ះ Leicester City។

២. លើកទឹកចិត្តឲ្យ Ederson លេងបាល់វែង

អ្នកចាំទីដៃទី១ Ederson របស់ Manchester City នឹងលេងបាល់វែងច្រើនមិនធ្លាប់មានពេលប៉ះ Liverpool ដោយសារ Pep គិតថាវានឹងទទួលបានផលជាជាងលេងបាល់ខ្លីពីក្រោមទៅលើ។ ការលេងបាល់ខ្លីនឹងពិបាកសម្រាប់កីឡាករម្ចាស់ផ្ទះដោយសារ៣នាក់ខាងលើគឺ Roberto Firmino, Sadio Mane និង Mo Salah របស់ហង្សមានល្បឿនលឿន និងពូកែដណ្ដើមបាល់ដូច្នេះបើសិនភ្លាត់ក្នុងការគ្រប់គ្រងបាល់ City នឹងមានបញ្ហា។ ការលេងបាល់វែងរបស់អ្នកចាំទីក៏ជាវិធីអាចឲ្យបាល់ឆាប់ដល់ជើងខ្សែប្រយុទ្ធរបស់ពួកគេដែរ។

៣. ការលួច Offside (អកហ្សឺ)

គ្មានអ្វីគួរឲ្យភ្ញាក់ផ្អើលទេសម្រាប់ល្បិចលួចអកហ្សឺ ឬ Offside ក្នុងកីឡាបាល់ទាត់។ City បានប្រាប់ដល់កីឡាករក្នុងក្រុមរបស់ខ្លួនឈរជាខ្សែឲ្យត្រង់នៅលើទីលានងាយស្រួលលួច Offside ពេល Liverpool ព្យាយាមលេងបាល់បោះកាត់ទៅកាន់ខ្សែប្រកួតកំពូលល្បឿនទាំង៣។ Salah បាន Offside ១៨ដងរដូវកាលនេះ, Mane បាន Offside ១៤ ដងហើយក្រុមទាំងមូល Offside សរុប៤២ដង ដូច្នេះ Offside ដោយសារល្បឿនគឺជាចំណុចខ្សោយមួយរបស់ហង្ស។

៤. ហាមលេងចតឡានក្រុងជាមួយ Liverpool

កីឡាករក្នុងក្រុមរបស់ Manchester City ត្រូវហាមមិនឲ្យលេងទប់ដាច់ខាតក្នុងករណីនាំមុខ Liverpool មុន មានន័យថាបើស៊ី ១ ឬ២ ត្រូវបន្តវាយសម្រុកទៀតតាមដែលអាចធ្វើទៅបាន។ Pep មើលឃើញថាការចតឡានក្រុងជាមួយ Liverpool ដែលមានប្រយុទ្ធខ្លាំងគឺគ្មានប្រសិទ្ធិភាពឡើយព្រោះចង់មិនចង់គង់តែធ្លាយសំណាញ់ទី ជាក់ស្ដែងដូច Manchester United ជាឧទាហរណ៍ស្រាប់។ United បានព្យាយាមការពារច្រើនក្រោយតាមស្មើ Liverpool ១-១ តែលទ្ធផលចុងម៉ោងពួកគេធ្លាយ២គ្រាប់ពីការស៊ុតរបស់ Shaqiri៕