មនុស្សជាច្រើនជ្រួលជ្រើមនាំគ្នាធ្វើ "Bird Box Challenge” រហូត Netflix ចេញក្ដីប្រកាសហាមប្រាម

2019-01-03 03:33:05
ចំនួនមតិ 0 | ចំនួនចែករំលែក 0

ចន្លោះមិនឃើញ

“The Bird Box Challenge” កំពុងក្លាយជាល្បែងមួយដែលមនុស្សជាច្រើននាំគ្នាធ្វើនិងចែកចាយពាសពេញបណ្ដាញសង្គម ក្រោយរឿងដ៏ល្បី "Bird Box” បានចាក់បញ្ចាំងជាផ្លូវការនៅលើកម្មវិធី Netflix។

“Bird Box” ជាខ្សែភាពយន្តបែបរន្ធត់ រៀបរាប់ពីគ្រួសារមួយដែលត្រូវធ្វើដំណើរផ្សងព្រេងដ៏គ្រោះថ្នាក់ដោយប្រើក្រណាត់ចងភ្នែកជិតឈឹង ដើម្បីគេចចេញពីការសម្លាប់របស់បិសាចដ៏សាហាវមួយដែលសម្លាប់មនុស្សតាមការមើលក្នុងកែវភ្នែក។ ក្រោយភាពយន្តមួយនេះបានចេញចាក់បញ្ចាំង រូបភាពបែបត្រូលជាច្រើនត្រូវបានធ្វើឡើងពាក់ព័ន្ធនឹងរឿងនេះ ហើយឥឡូវនេះ មនុស្សមួយចំនួនក៏បានយករឿងនេះទៅធ្វើសកម្មភាពអ្វីមួយដែលលើសពីការរំពឹងទុកថែមទៀត ដោយពួកគេបាននាំគ្នាចងភ្នែកពួកគេឲ្យជិត ហើយដើរជុំវិញផ្ទះ ឬកន្លែងណាមួយដែលមើលទៅឲ្យដូចជាក្នុងរឿង ដែលសកម្មភាពទាំងនេះ គេហៅថា "The Bird Box Challenge”។

មិនយូរប៉ុន្មាន ល្បែងមួយនេះកាន់តែរាលដាលខ្លាំងទៅៗ ដែលរហូតធ្វើឲ្យកម្មវិធី Netflix ផ្ទាល់ចេញសារប្រកាសហាមប្រាមអ្នកទស្សនារឿងមួយនេះទាំងអស់ កុំឲ្យព្យាយាមលេងល្បែងបែបនេះទៀត ដែលអាចបង្កជាគ្រោះថ្នាក់ណាមួយចំពោះពួកគេបាន៕

ប្រភព៖ 9gag ប្រែសម្រួល៖ អន សុភក្ត្រា