តារាម៉ូដែលប្រុសទាំង៧រូបនេះ ជាបណ្ដាម៉ូដែលគួររំពឹងមើលនៅឆ្នាំថ្មី២០១៩
- 2019-01-03 07:35:00
- ចំនួនមតិ 0 | ចំនួនចែករំលែក 0
តារាម៉ូដែលប្រុសទាំង៧រូបនេះ ជាបណ្ដាម៉ូដែលគួររំពឹងមើលនៅឆ្នាំថ្មី២០១៩
ចន្លោះមិនឃើញ
កាលពីម្សិលមិញ Sabay បានចុះផ្សាយម្ដងរួចមកហើយពីបណ្ដា តារាម៉ូដែលស្រីទាំង៩រូប ដែលនឹងលេចធ្លោខ្លាំងនៅឆ្នាំ ២០១៩ ឥឡូវយើងមកស្គាល់ពីបណ្ដាតារាម៉ូដែលប្រុសៗ ដែលកំពុងតែមានឈ្មោះបោះសំឡេងវិញម្ដង។
នេះជាបណ្ដាតារាម៉ូដែលប្រុស អ្នកគូរតែរំពឹងមើលនៅឆ្នាំ២០១៩៖
១. ទឹម វ៉ាយុ
បន្ទាប់ពីប្រឡូកក្នុងវិស័យម៉ូដែលនេះអស់រយៈពេល ៤ឆ្នាំ វ៉ាយុ ត្រូវបានគេស្គាល់ជាច្រើន ព្រមទាំងមមាញឹកខ្លាំងក្នុងការធ្វើជាម៉ូដែលដើម្បីផ្សព្វផ្សាយផលិតផលថ្មីៗផងដែរ។ សម្រាប់ឆ្នាំថ្មីនេះលោកនឹងបង្ហាញខ្លួននៅក្នុងភាពយន្តខ្នាតធំ ព្រមទាំងក្នុងវីដេអូបទចម្រៀងថ្មីៗផងដែរ បូករួមនឹងអាជីពម៉ូដែល។
២. នូ ឧសភា
លោក នូ ឧសភា ទទួលបានការគាំទ្រច្រើនក្នុងវិស័យម៉ូដែលនេះ ដោយសារតែមានរូបរាងស្រស់សង្ហា កម្ពស់ខ្ពស់និងមានទម្រង់មុខប្លែក។ ឧសភា កំពុងតែមមាញឹកក្នុងការថតរឿង ក៏ដូចជាម៉ូដែលសម្រាប់ផ្សព្វផ្សាយផលិតផលផ្សេងៗផងដែរ។
៣. ស៊ុន ដាយ៉ា
ថ្លែងមកកាន់ Sabay ដាយ៉ា បញ្ជាក់ថាដំបូងឡើយលោកគ្រាន់តែជាអ្នកធ្វើការនៅសណ្ឋាគារមួយតែប៉ុណ្ណោះ តែក្រោយមកលោកក៏ត្រូវបាន Designer ម្នាក់ចាប់អារម្មណ៍និងណែនាំលោកឲ្យក្លាយជាតារាម៉ូដែលដោយសារតែលោកមានសម្រស់ស្រស់ស្អាតនិងកម្ពស់អំណោយផល។ ម៉ូដែលរូបនេះកំពុងតែមមាញឹកយ៉ាងខ្លាំងក្នុងការថតស្ប៉តផ្សេងៗ ក៏ដូចជាវីដេអូចម្រៀងថ្មីៗផងដែរ។
៤. Joseph Vann
លោក Joseph គឺជាតារាម៉ូដែលប្រុសមួយរូប តែងតែបង្ហាញខ្លួនជាញឹកញាប់ក្នុងកម្មវិធីដើរម៉ូដធំៗ ប្រចាំឆ្នាំដូចជា PPDW ជាដើម។ តារាម៉ូដែលរូបនេះបានចូលរៀនផ្នែកម៉ូដែលនេះនៅសាលា Sapore Modeling school កាលពីឆ្នាំ ២០១៥ ហើយក៏បានប្រកបការងារផ្នែកនេះយ៉ាងច្រើន មិនត្រឹមតែប៉ុណ្ណោះលោកក៏នឹងមានគម្រោងថ្មីៗជាហូរហែសម្រាប់ឆ្នាំ ២០១៩នេះផងដែរ។
៥. Satin Preap
លោក Satin Preap គឺជាតារាម៉ូដែលសញ្ជាតិខ្មែរកាត់បារាំង ដែលមានសម្រស់ស្រស់សង្ហាមិនធម្មតា។ Satin មិនញញើតនឹងការថតរូបលក្ខណៈ Fashion ផ្សេងៗដែលមានលក្ខណៈសិចស៊ីខ្លាំងនោះទេ។ ជាមួយនឹងគម្រោងយ៉ាងច្រើនទន្ទឹងរងចាំ ដូច្នេះ Satin គឺតារាម៉ូដែលកូនកាត់ម្នាក់ដែលអ្នកមិនគួរមើលរំលង។
៦. Antony Rolland
Antony ក៏ជាតារាម៉ូដែលសញ្ជាតិបារាំងខ្មែរផងដែរ ដោយនៅក្នុងវ័យតែ១៩ឆ្នាំប៉ុណ្ណោះ ម៉ូដែលរូបនេះបានបង្ហាញមុខយ៉ាងច្រើនដងក្នុងកម្មវិធីធំៗ។ ដោយមានទេពកោសល្យព្រមទាំងរូបសម្បត្តិអំណោយផលទៀតនោះ Antony នឹងធ្វើឲ្យអ្នកស្រលាញ់វិស័យម៉ូដែលស្គាល់ខ្លួនកាន់តែច្រើនក្នុងឆ្នាំថ្មី។
៧. រស រាជសាល
រាជសាល ត្រូវបានគេស្គាល់ថាជាតារាម៉ូដែលមួយរូបដែលមានសាច់ដុំស្អាត និងមុខមាត់ស្អាតមិនធម្មតា។ មិនត្រឹមតែជាតារាម៉ូដែលមួយរូបប៉ុណ្ណោះទេ តារារូបនេះក៏ធ្លាប់បញ្ចេញបទចម្រៀងផ្ទាល់ខ្លួន ព្រមទាំងជាតារាសម្ដែងផងដែរ៕