អ្នកគាំទ្រផ្ដើមដាក់ញត្តិប្រឆាំង Dispatch ក្រោយទម្លាយព័ត៌មាន Kai និង Jennie ទាក់ទងគ្នា

2019-01-04 01:51:50
ចំនួនមតិ 0 | ចំនួនចែករំលែក 0

ចន្លោះមិនឃើញ

ជារៀងរាល់ឆ្នាំ ខាងបណ្ដាញសារព័ត៌មាន Dispatch តែងតែទម្លាយព័ត៌មានស្នេហារវាងតារាល្បីៗនៅថ្ងៃទី ០១ ខែមករា។ សម្រាប់ឆ្នាំ ២០១៩នេះ ព័ត៌មានទំនាក់ទំនងស្នេហារវាងសមាជិកក្រុម BLACKPINK តារាចម្រៀង Jennie និងសមាជិកក្រុម EXO តារាចម្រៀង Kai កំពុងស្ថិតលើទំព័រមុខនៃបណ្ដាញសារព័ត៌មានជាច្រើន។ ព័ត៌មានថាទាក់ទងគ្នានេះ ត្រូវបានបែកធ្លាយនៅពេលដែលខាងសារព័ត៌មាន Dispatch បានប្រមាញ់រូបថតរបស់គូស្នេហ៍តារាល្បីមួយគូនេះកំពុងចំណាយពេលវេលាជាមួយគ្នាស្ងាត់ៗ។

ប៉ុន្មានម៉ោងក្រោយព័ត៌មានបានទម្លាយពាសពេញបណ្ដាញសង្គម ខាងផលិតកម្ម SM ក៏បានចេញក្ដីប្រកាសថា Kai និង Jennie កំពុងមានចិត្តលើគ្នាទៅវិញទៅមក។ ទោះជាយ៉ាងណាក៏ដោយ ទាំងមហាជនទូទៅ រួមទាំងអ្នកគាំទ្របានបញ្ចេញប្រតិកម្មផ្សេងៗគ្នា។ មួយចំនួនបានបង្ហាញការគាំទ្រ និងអបអរចំពោះគូស្នេហ៍វ័យក្មេងមួយគូនេះ ខណៈមួយចំនួនទៀតបានបញ្ចេញប្រតិកម្មរិះគន់ទៅវិញ។ ក្នុងនោះដែរ ក៏មានក្រុមអ្នកគាំទ្រមួយចំនួនបានដាក់ការវាយប្រហាររបស់ពួកគេទៅលើសារព័ត៌មាន Dispatch។ ពួកគេបានអះអាងថា សារព័ត៌មានមួយនេះ បានរំលោភបំពានសិទ្ធិឯកជនរបស់សិល្បករ ហើយពួកគេក៏បានធ្វើការទាមទារបិទបណ្ដាញសារព័ត៌មានមួយនេះចោលផងដែរ។

ចំពោះញត្តិដែលពួកគេបានដាក់ទៅខាងរដ្ឋាភិបាលនោះមានឈ្មោះផ្សេងៗគ្នា ដោយក្នុងនោះមានដូចជា "សូមបិទ Dispatch ដែលជាសារព័ត៌មានរំលោភបំពានសិទ្ធិឯកជនរបស់សិល្បករ" “ទាមទារឲ្យមានការបិទសារព័ត៌មាន Dispatch” “Dispatch រំលោភបំពានសិទ្ធិឯកជន" ជាដើម ដែលញត្តិទាំងនេះត្រូវបានបង្ហោះលើវិបសាយរបស់ Blue House ដោយផ្ទាល់៕

ប្រភព៖ Allkpop ប្រែសម្រួល៖ អន សុភក្ត្រា