អបអរសាទរ! កូនខ្មែរមួយរូបក្លាយជាទីប្រឹក្សាជាន់ខ្ពស់ ផលិតភាពយន្តលំដាប់ពិភពលោក
- 2019-01-06 04:07:48
- ចំនួនមតិ 0 | ចំនួនចែករំលែក 0
អបអរសាទរ! កូនខ្មែរមួយរូបក្លាយជាទីប្រឹក្សាជាន់ខ្ពស់ ផលិតភាពយន្តលំដាប់ពិភពលោក
ចន្លោះមិនឃើញ
លោកបណ្ឌិត ចិន្ត ច័ន្ទរតនា ដែលបានបញ្ចប់ការសិក្សាផ្នែកបុរាណវិទ្យាពីប្រទេសបារាំងលើផ្នែកប្រវត្តិសិល្បៈ និងបុរាណវិទ្យាអាស៊ីអាគ្នេយ៍ត្រូវបានក្រុមហ៊ុន Walt Disney Animation Studios ដែលមានការិយាល័យធំ គឺនៅក្នុងរដ្ឋកាលីហ្វ័រនីញ៉ា សហរដ្ឋអាមេរិក ជ្រើសរើសជាទីប្រឹក្សា។
ក្រុមហ៊ុនWalt Disney Animation Studio គឺជាក្រុមហ៊ុនផលិតគំនូរជីវចល និងខ្សែភាពយន្ត ព្រមទាំងសេវាកម្សាន្តជាច្រើនទៀត។ ដូច្នេះផ្នែកណាមួយនៃគម្រោងរបស់ក្រុមហ៊ុនអាចពាក់ព័ន្ធនឹងតំបន់អាស៊ីអាគ្នេយ៍ ឬកម្ពុជាទើបជ្រើសរើសលោកជាទីប្រឹក្សា ដូចគ្នានឹងការជ្រើសរើសលោកជាទីប្រឹក្សាផលិតខ្សែភាពយន្តរឿងហ្លួងព្រះស្តេចកនដែរ។លោកបណ្ឌិតចាត់ទុកនេះគឺជាដំណឹងដ៏រីករាយមួយសម្រាប់លោកក្នុងនាមជាកូនខ្មែរមួយរូប។
លោកបានឲ្យដឹងទៀតថា ក្រុមហ៊ុនអាចស្រាវជ្រាវរកឈ្មោះលោកឃើញតាមបណ្តាញអ៊ីនធឺណេត និងការណែនាំពីសាស្ត្រាចារ្យនៅសហរដ្ឋអាមេរិក ព្រោះថា កន្លងមកលោកក៏ធ្លាប់ធ្វើជាគ្រូឧទ្ទេសឲ្យសាកលវិទ្យាល័យមួយនៅសហរដ្ឋអាមេរិកផងដែរ។ ដូច្នេះការងារស្នូលរបស់លោកអាចពាក់ព័ន្ធនឹងសិល្បៈ ស្ថាបត្យកម្ម និងការតុបតែងលម្អជាដើម។ លោកថា ការភ្ជាប់អ្នកជំនាញក្នុងតំបន់ជាទីប្រឹក្សា ក្រុមហ៊ុននឹងមិនបារម្ភពីកំហុសឆ្គង ហើយការងារលោកនឹងចាប់ផ្ដើមនៅដើមឆ្នាំនេះហើយ។
លោកបណ្ឌិតបន្ថែមថា បច្ចុប្បន្ននេះយុវជនកម្ពុជាច្រើននាក់ទៀតសុទ្ធសឹងតែពូកែ និងមានសមត្ថភាពផ្សេងគ្នាអាចឈានជើងប្រឡូកការងារជាមួយនឹងក្រុមហ៊ុនលំដាប់អន្តរជាតិ ហើយលោកជឿថាប្រសិនយុវជនជំនាន់ក្រោយមានការតស៊ូ និងអត់ធ្មត់ រៀនសូត្រ យើងនឹងអាចទទួលបានចំណេះជំនាញអាចប្រកួតប្រជែងនឹងបរទេសបាន៕
រូបភាព៖ ផ្ដល់ឲ្យ