ច្បាស់ហើយ៤ប្រទេសចូលរួមប្រកួតពានអន្តរជាតិ MATIC 2019 នៅកម្ពុជា

2019-01-09 07:43:12
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រកួតកីឡាអេឡិចត្រូនិកអន្តរជាតិជើងឯក Mission Against Terror International Championship (MATIC) ប្រចាំ២០១៩នឹងប្រកួតចុងសប្តាហ៍នេះហើយដែលកម្ពុជាធ្វើម្ចាស់ផ្ទះរៀបចំការប្រកួតនៅថ្ងៃអាទិត្យ ទី១៣ ខែមករា ផ្សារទំនើបអ៊ីអនសែនសុខ។

ពានរង្វាន់ MATIC

តាមការឲ្យដឹងពីគណៈកម្មការរៀបចំការប្រកួតគឺ MATIC 2019 នេះមានប្រទេសចូលរួមប្រកួត៤គឺម្ចាស់ផ្ទះកម្ពុជា ម៉ាឡេស៊ី ចិន និងថៃ។ ក្រុមខ្លាំងតំណាងឲ្យរបស់ប្រទេសថៃគឺ Safe First ហើយប្រទេសម៉ាឡេស៊ីបញ្ជូនក្រុម Suicide ដែលធ្លាប់មានបទពិសោធច្រើនលើឆាកអន្តរជាតិ។ ចំពោះក្រុមរបស់ប្រទេសចិនគឺ ក្រុម Ali Huaye។

ចំពោះម្ចាស់ផ្ទះកម្ពុជានៅមិនទាន់រកឃើញក្រុមតំណាងចូលរួមប្រកួត MATIC 2019 ឡើយដោយរង់ចាំការប្រកួតជ្រើសរើសជើងឯកជាតិទូទាំងប្រទេសនាថ្ងៃសៅរ៍ ទី១២ ខែមករា ទើបរកឃើញក្រុមតំណាងកម្ពុជា។

សម្រាប់ប្រាក់រង្វាន់ MATIC ក្រុមជើងឯក៖ ទទួលបានពានរង្វាន់ធំ និងប្រាក់ ៦ពាន់ដុល្លារអាមេរិក ក្រុមជើងឯករង៖ ទទួលបាន៣ពាន់ដុល្លារអាមេរិក

ក្រៅពីការប្រកួតពានធំជាក្រុម ក៏មានការប្រកួតជាលក្ខណៈឯកត្តជនដែរ។ ការប្រកួតឯកត្តជនគឺលេខ១ទទួលបានរង្វាន់៥០០ដុល្លារ លេខ២ទទួលបាន៣០០ដុល្លារ និងលេខ៣ទទួលបាន២០០ដុល្លារ។

បើរំលឹកដល់កាលឆ្នាំ២០១៨កន្លងទៅ ក្រុមរបស់ម៉ាឡេស៊ី Syne Gaming ជាជើងឯក និងក្រុមរបស់កម្ពុជា Never Care ជាជើងឯករង។

សូមបញ្ជាក់ នេះជាលើកទី២ហើយដែលកម្ពុជាធ្វើម្ចាស់ផ្ទះរៀបចំការប្រកួតពានរង្វាន់អន្តរជាតិ MATIC បន្ទាប់ពីបានធ្វើម្តងហើយកាលពីឆ្នាំ២០១៤។

ការប្រកួតជើងឯកជាតិទូទាំងប្រទេស និង MATIC 2019 រៀបចំដោយសហព័ន្ធកីឡាអេឡិចត្រូនិកកម្ពុជា និង Sabay ដែលទទួលបានការអនុញ្ញាតពីគណៈកម្មាធិការជាតិអូឡាំពិកកម្ពុជា ហើយមានការចូលរួមឧបត្ថម្ភដោយក្រុមហ៊ុនទូរសព្ទ Huawei, ទូរទស្សន៍ MYTV, ផ្សារទំនើប AEON Mall និងក្លឹបកីឡាអេឡិចត្រូនិក MCT E-Sport Cambodia៕