មិនត្រឹមតែជាម៉ូដែល Antony Rolland ក៏ជាអ្នកជំនួញវ័យក្មេងដ៏មានសមត្ថភាព

2019-01-10 05:25:00
ចំនួនមតិ 0 | ចំនួនចែករំលែក 0

ចន្លោះមិនឃើញ

Antony Rolland ជាតារាម៉ូដែលខ្មែរកាត់បារាំងមួយរូប មានសម្រស់ស្រស់សង្ហាមិនធម្មតា ប៉ុន្តែអ្វីដែលគួរឲ្យចាប់អារម្មណ៍បំផុតនោះគឺលោកក៏ជាអ្នកជំនួញវ័យក្មេងមួយរូបផងដែរ។ ក្រៅពីអាជីពម៉ូដែល ត្រឹមវ័យ១៧ឆ្នាំលោកក៏ជាសហគ្រិនមួយរូបសម្រាប់ជំនួញទាក់ទងខាងទីផ្សារ (Marketing) ព្រមទាំង Web Business។

ពាក់ព័ន្ធនឹងអាជីពជាតារាម៉ូដែល Antony បានផ្លាស់ប្ដូរទីលំនៅមកកាន់ទីក្រុងភ្នំពេញកាលពីឆ្នាំមុន ហើយមុននេះលោកក៏មានបទពិសោធន៍ខ្លះៗទាក់ទងនឹងម៉ូដែលនៅប្រទេសបារាំងរួចទៅហើយ។ ការងារដំបូងបំផុតរបស់លោក គឺថតរូបម៉ូដែលលក្ខណៈជាគូជាមួយ Mélia Constantin ឲ្យអ្នកច្នៃម៉ូដជំនាញលោក Remy Hou។ ក្រោយមកលោកនិងដៃគូ Mélia ក៏បានចាប់ដៃគ្នាសហការថតរូបម៉ូដែលយ៉ាងច្រើនមិនថាជាគម្រោងដែលទទួលបានកម្រៃឬជាការស្ម័គ្រចិត្តថតដើម្បីជាបទពិសោធន៍។

Antony និង Mélia Constantin

រហូតមកដល់សព្វថ្ងៃនេះ Antony បានបង្ហាញខ្លួនក្នុងគម្រោងជាច្រើនមិនថាជាការថតលក្ខណៈម៉ូដែល ឬក៏ជាលក្ខណៈផ្សព្វផ្សាយពាណិជ្ជកម្មនោះទេ លោកតែងតែស្វាគមន៍នូវគម្រោងថ្មីៗជានិច្ច។ ទោះជាយ៉ាងណាក៏ដោយ ដោយសារតែលោកបានដឹងក្ដីនៅប្រទេសបារាំង ដូច្នេះលោកមានការលំបាកក្នុងការប្រើប្រាស់ភាសាខ្មែរខ្លះៗ ដែលគ្រោងនឹងរៀនបន្ថែមនៅឆ្នាំនេះ។

ចំពោះគម្រោងនៅឆ្នាំ ២០១៩ នេះ Antony នឹងផ្ដោតសំខាន់លើការហាត់ប្រាណឲ្យកាន់តែមានរាងរៅសង្ហាជាងនេះមួយកម្រិតទៀត និយាយភាសាខ្មែរកាន់តែល្អ និងចាប់ផ្ដើមប្រឡូកក្នុងវិស័យសម្ដែងកាន់តែច្រើនជាងមុន ខណៈពេលនេះលោកចំណាយពេលពាក់កណ្ដាលជាអ្នកជំនួញ និងពាក់កណ្ដាលជាតារាម៉ូដែលនិងសម្ដែង៕

អត្ថបទ៖ ធារ៉ូ