អាជ្ញាធរឆ្លើយបែបនេះ ក្រោយព្រះពុទ្ធបដិមានៅប្រាសាទបាយ័ន ត្រូវគេគូសក្រវេមក្រវាម
- 2019-01-10 07:37:32
- ចំនួនមតិ 0 | ចំនួនចែករំលែក 0
អាជ្ញាធរឆ្លើយបែបនេះ ក្រោយព្រះពុទ្ធបដិមានៅប្រាសាទបាយ័ន ត្រូវគេគូសក្រវេមក្រវាម
ចន្លោះមិនឃើញ
ជារឿងដ៏គួរឲ្យសោកស្ដាយមួយ ដែលព្រះពុទ្ធបដិមាជាទីគោរពសក្ការបូជា នៅក្នុងតំបន់ប្រាសាទអង្គរ ដែលជាសម្បត្តិបេតិកភណ្ឌពិភពលោក ត្រូវបានជនខ្វះការគិតពិចារណា បានយកថ្នាំពណ៌ទៅគូសលើព្រះភ័ក្ដ្រក្រវេមក្រវាម គួរឲ្យស្រណោះ។ ពាក់ព័ន្ធនឹងបញ្ហានេះ Sabay បានទំនាក់ទំនងទៅលោក ឡុង កុសល ជាអ្នកនាំពាក្យអាជ្ញាធរជាតិអប្សរា ដើម្បីសុំធ្វើការបំភ្លឺជុំវិញករណីនេះ។ លោកបានឆ្លើយយ៉ាងខ្លីថា មិនបានដឹងឮអំពីរឿងនេះឡើយ មិនដឹងអ្នកណាជាអ្នកទៅគូស ព្រោះធម្មតាមនុស្សទៅលេងច្រើន ម៉ោងខុសគ្នា ពេលខុសគ្នា ធ្វើម៉េចអាជ្ញាធរទៅដឹងថាតើអ្នកណាជាអ្នកធ្វើនោះ?
នៅពេលសួរថាតើអាជ្ញាធរនឹងមានវិធានការបែបណា ក្រោយកើតឡើងករណីនេះ និងរកជនដែលបានប្រព្រឹត្តិនោះដែរទេ? លោកបានឆ្លើយថា៖ «ឲ្យទៅរកនៅឯណា? ពិបាកដែរបើឲ្យទៅរកអ្នកណា អ្នកធ្វើនោះ?» គ្រាន់តែអាចទាក់ទងសួរទៅកាន់អាជ្ញាធរតែប៉ុណ្ណោះ។ លោកបន្តថា មិនដឹងជាគេគូសដើម្បីអី? មិនដឹងថាប្រពៃណី ទំនៀមទម្លាប់អ្វីឡើយ។ តែយ៉ាងណាលោកឆ្លើយថា នេះមិនមែនជារឿងដែលប៉ះពាល់អ្វីធ្ងន់ធ្ងរឡើយ។
ស្ថិតនៅក្នុងតំបន់ដែលជាបេតិកភណ្ឌពិភពលោកបែបនេះ តែងមានអាជ្ញាធរចុះហាមឃាត់ភ្លាមៗប្រសិនបើមានសកម្មភាពមិនប្រក្រតីកើតឡើង និងហាមមិនឲ្យប៉ះពាល់រាល់វត្ថុបុរាណ និងសកម្មភាពណាដែលឆ្គាំឆ្គងដាច់ខាត។ ពាក់ព័ន្ធនឹងសំណួរនេះដែរ អ្នកនាំពាក្យអាជ្ញាធរជាតិអប្សរា លើកឡើងថា ប្រហែលជារឿងនេះកើតឡើង នៅម៉ោងក្រោយបំពេញការងាររបស់អាជ្ញាធរជាតិអប្សរា៕