ឡើងសង្វៀនសាថ្មីគាំទ្រពេញទំហឹង ភុំ សារ៉ាយ បានវ៉ៃគូអន្តរជាតិសប្តាហ៍នេះតែម្តង

2019-01-11 08:37:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ការបង្ហាញមុខជាថ្មីរបស់ ភុំ សារ៉ា ធ្វើឲ្យមហាជនក៏ដូចជាអ្នកនិយមប្រដាល់គុនខ្មែរចាប់អារម្មណ៍ជាខ្លាំង និងសរសើរពីសមត្ថភាពខ្លាំងបើទោះជាអាយុច្រើនយ៉ាងណាក្ដី។ តាមការទទូចរបស់អ្នកគាំទ្រនាពេលកន្លងទៅនេះ បានធ្វើឲ្យអ្នករៀបចំការប្រដាល់របស់សង្វៀនបាយ័ន សម្រេចដាក់រូបគេឡើងប្រកួតជាថ្មីនិងប៉ះថៃសប្ដាហ៍នេះតែម្ដង។

រូបភាពរបស់លោក Masayori Ishikawa

ភុំ សារ៉ាយ ជាកីឡាករជើងចាស់យូរណាស់មកហើយ ចំណែកអាយុវិញក៏ច្រើនទៅទៀត។ អ្នកលេងគុនខ្មែររូបនេះបាត់មុខពីសង្វៀនឈឹងតែម្ដង ក៏មិនដែលលេចឮថានៅប្រកួតឬឈប់នោះដែរ ទើបតែឃើញវត្តមានកីឡាកររូបនេះជាថ្មីនៅសង្វៀនបាយ័នកាលពីចុងខែធ្នូ ២០១៨។

រូបភាពរបស់លោក Masayori Ishikawa

ទោះជាអាយុច្រើនមែន ប៉ុន្តែជើងខ្លាំងរូបនេះបង្ហាញទម្រង់វ៉ៃល្អ និងរហ័សដដែល ពោលអាចប្រកួតឈ្នះសិស្សក្មួយ សេក គឹមរួន ដោយអាជ្ញាកណ្ដាលបញ្ឈប់នៅទឹកទី៥ ព្រោះមើលឃើញថាមិនមានស្មារតីប្រកួតបន្តនោះឡើយ។ ភុំ សារ៉ាយ នៅតែល្អជាកីឡាករវ៉ៃក្បាច់ ជាពិសេសការទាត់ធ្ងន់ទាំងលើ និងខាងក្រោម ចំណែកកណ្ដាប់ដៃម៉ាត់ ខាវ ជាគ្រោះថ្នាក់ដល់ដៃគូដដែល។ យ៉ាងណាមិញសម្រាប់ការប្រកួតមិត្តភាពអន្តរជាតិនៅប្រកួតទី២ របស់អ្នកលេងគុនខ្មែរខាងលើនេះ មិនទាន់មានសង្ឃឹមឈ្នះច្រើននោះទេ ព្រោះវ័យក៏ចាស់កម្លាំង អាចនឹងចាញ់ក្មេង ហើយណាមួយប៉ះអ្នកប្រដាល់វ៉ៃក្បាច់របស់ថៃទៀតផង។

រូបភាពរបស់លោក Masayori Ishikawa

រំលឹកដែរថា កីឡាករ ភុំ សារ៉ាយ ការប្រកួតជាថ្មីកាលពីថ្ងៃទី៣០ ខែធ្នូ ឆ្នាំ២០១៨ នៅសង្វៀនបាយ័ននោះគឺផ្ដួលអ្នកប្រដាល់មកពីខេត្តសៀមរាប សេក គឹមរួន ត្រឹមទឹកទី៥។ ថ្ងៃអាទិត្យទី១៣ មករា នេះរូបគេនឹងត្រូវប៉ះកីឡាករថៃ Fanimit Phran 26 លើប្រភេទទម្ងន់ ៦៣,៥គីឡូក្រាម នៅសង្វៀនបាយ័នស្ទឹងមានជ័យ៕

អត្ថបទ៖ នួន ស៊ីណា