ស្ថាបនិកក្លឹប CTT នឹងមិនមានមុខជួបឪពុកម្ដាយ បើមិនឈ្នះខ្សែក្រវាត់ONE
- 2019-01-11 08:05:40
- ចំនួនមតិ 0 | ចំនួនចែករំលែក 0
ស្ថាបនិកក្លឹប CTT នឹងមិនមានមុខជួបឪពុកម្ដាយ បើមិនឈ្នះខ្សែក្រវាត់ONE
ចន្លោះមិនឃើញ
លោក ហ៊ុន ច័ន្ទរាជ្យ បានមកប្រទេសកម្ពុជាដោយមានគោលបំណងបណ្ដុះបណ្ដាលកីឡាគុនចម្រុះ និងនាំកីឡាករ កីឡាការិនីកម្ពុជាសាងស្នាដៃលើឆាកអន្តរជាតិ។ ជាពិសេស លោកបានតាំងចិត្តហើយថា នឹងមិនមានមុខជួបឪពុកម្តាយឡើយ ដរាបណាកីឡាកររបស់លោកមិនទាន់ឈ្នះខ្សែក្រវាត់ពិភពលោករបស់ ONE ណាមួយ។
បុរសសញ្ជាតិខ្មែរដើមកំណើតអាមេរិក ច័ន្ទរាជ្យបានបោះជំហានមកកាន់ទឹកដីនៃប្រទេសដើមកំណើតរបស់ឪពុកម្ដាយរបស់ខ្លួនដើម្បីបើកក្លឹបប្រដាល់ MMA កាលពីឆ្នាំ២០១១ ក្រោយពីលោកបានមើលឃើញពីសក្ដានុពល ក៏ដូចជាភាពរីកចម្រើនយ៉ាងឆាប់រហ័សរបស់កីឡាប្រភេទថ្មីមួយនេះ នៅអាមេរិក ក៏ដូចជាទូទាំងពិភពលោក។
ឆ្នាំដែលលោកបានមកដំបូង ទាំងការប្រកួតក៏ដូចជាកីឡាករយុទ្ធគុនចម្រុះស្ទើរមិនមានសោះ កុំបាច់និយាយដល់ប្រជាប្រិយភាពឡើយនៅកម្ពុជា ដោយសារតែវាត្រូវបានចាត់ទុកជាកីឡាទើបតែបង្កើតថ្មី ហើយក្លឹប MMA អាជីពក៏អត់មានដែរ។ ដោយសារការមើលឃើញពីប្រជាប្រិយភាព និងភាពរីកចម្រើនយ៉ាងឆាប់រហ័សរបស់កីឡា MMA លោកច័ន្ទរាជ្យ រំពឹងទុកថា កីឡានេះនឹងក្លាយជាស្ពានដ៏ធំមួយក្នុងការជួយផ្សព្វផ្សាយសិល្បៈក្បាច់គុនប្រដាល់ខ្មែរ ក៏ដូចជាកីឡាករប្រកបដោយទេពកោសល្យរបស់កម្ពុជា ទៅបង្ហាញខ្លួនលើឆាក់អន្តរជាតិ។
គ្រូបង្វឹកវ័យ៣១ឆ្នាំរូបនេះដែលបានឃ្លាតឆ្ងាយពីឪពុកម្ដាយអស់រយៈពេលជាង៧ឆ្នាំនោះ បានបញ្ជាក់ថា ៖«ក្នុងនាមជាខ្ញុំជាកីឡាករ និងជាអ្នកស្រឡាញ់កីឡា MMA ពេលនៅអាមេរិក ខ្ញុំឆ្ងល់ថា ហេតុអ្វីបានដែលកម្ពុជា មិនមានកីឡាករ MMA និងគ្មានក្លឹបហ្វឹកហាត់។ ខ្ញុំគិតថា ប្រសិនបើយើងបាននាំកីឡាករខ្មែរទៅប្រកួតក្នុងឆាក MMA អន្តរជាតិនោះ យើងនឹងជួយផ្សព្វផ្សាយសិល្បៈក្បាច់គុនខ្មែរ ក៏ដូចជាវប្បធម៌របស់ខ្មែរទៅកាន់ពិភពលោក»។
ការមើលឃើញកម្ពុជាមិនមានក្លឹបដើម្បីផ្ដល់ការហ្វឹកហាត់ MMA លោក ហ៊ុន ច័ន្ទរាជ្យ ក៏បានសម្រេចចិត្តលះបង់ជីវិត និងសុខចិត្តឃ្លាតឆ្ងាយពីឪពុកម្ដាយដើម្បីចាប់ផ្ដើមបើកក្លឹបប្រដាល់គុនចម្រុះនៅកម្ពុជា។ ក្រោយពីបានបង្កើតក្លឹបនៅចុងឆ្នាំ២០១១ លោករំពឹងទុកថា ការនាំយកកីឡានេះមកកាន់កម្ពុជា និងជួយផ្សព្វផ្សាយសិល្បៈក្បាច់គុនខ្មែរទៅកាន់ពិភពលោកជាគោលដៅចម្បងមួយ។ យ៉ាងណា មុននឹងបង្កើតក្លឹបលោកច័ន្ទរាជ្យ ក៏មានកត្តាសំខាន់ៗក្នុងការជួយជ្រោមជ្រែងគឺមានទំនាក់ទំនងជាមួយនឹងអង្គភាពរៀបចំក្បាច់ប្រដាល់ចម្រុះនៅក្រៅប្រទេសជាច្រើនក្នុងនោះរាប់បញ្ចូលទាំង ONE Championshipជាដើម។
លោក ច័ន្ទរាជ្យ បានសហប្រតិបត្តិការជាមួយនឹងអង្គភាពរៀបចំក្បាច់ប្រដាល់ចម្រុះធំជាងគេប្រចាំទ្វីបអាស៊ីមួយនេះ ចាប់តាំងពីឆ្នាំ២០១១មកម្ល៉េះ និងបាននាំយកកីឡាករកម្ពុជាច្រើននាក់ទៅចូលរួមក្នុងព្រឹត្តិការណ៍របស់ ONE ទាំងក្នុង និងក្រៅប្រទេស។
អង្គភាព ONE Championship បានបង្កើតភាពរំភើបផ្សេងៗតាមរយៈការបោះជំហានមកកាន់ទឹកដីកម្ពុជា ក្នុងឆ្នាំ២០១៤ ដើម្បីរៀបចំព្រឹត្តិការណ៍ជាលើកទី១របស់ខ្លួននៅភ្នំពេញ។ លោកបានបញ្ជាក់ថា មុននឹងជ្រើសរើសកីឡាករកម្ពុជាម្នាក់ទៅប្រកួតនៅក្រៅប្រទេស កីឡាកររូបនោះ ត្រូវធ្វើការហ្វឹកហាត់នៅក្លឹបរបស់លោកយ៉ាងហោចណាស់ឲ្យបានរយៈពេលកន្លះឆ្នាំដែរដើម្បីអាចមានសមត្ថភាពទៅប្រកួតជាមួយនឹងកីឡាករបរទេសបាន។
បច្ចុប្បន្នក្លឹប Cambodian Top Team មានកីឡាករកំពុងហ្វឹកហាត់ប្រមាណជា៨នាក់ ហើយក្លឹបកំពុងពង្រឹងវិសាលភាពតាមរយៈការនាំយកគ្រូបង្វឹកជំនាញផ្នែក MMA មកពីប្រទេសសិង្ហបុរី និងប្រេស៊ីល ដើម្បីជួយបង្កើនសមត្ថភាព និងបច្ចេកទេសរបស់កីឡាករកម្ពុជា។ ក្រោយពីការហ្វឹកហាត់ជាមួយគ្រូបង្វឹកជំនាញមួយរយៈ និងបន្ទាប់ពីមើលឃើញពីភាពរីកចម្រើនរបស់កីឡាករកម្ពុជាលើកីឡា MMA លោកច័ន្ទរាជ្យ កំពុងសម្លឹងមើលអនាគត និងក្តីសុបិនដ៏ធំពីកីឡាកររបស់លោក។
ទាក់ទងនឹងគោលដៅឆ្នាំ២០១៩ និងក្តីសុបិនដ៏ធំគឺលោកបានបញ្ជាក់ថា ៖«ខ្ញុំសង្ឃឹម កីឡាករកម្ពុជានឹងមានឱកាសកាន់តែច្រើនក្នុងការបង្ហាញខ្លួនក្នុង ONE ក៏ដូចជានាំយកជ័យជម្នះមកកាន់ប្រទេសវិញកាន់តែច្រើន។ ក្តីសុបិនដ៏ធំបំផុតរបស់ខ្ញុំ គឺការឃើញកីឡាករកម្ពុជាក្នុងក្លឹបរបស់ខ្ញុំឈ្នះខ្សែក្រវាត់ពិភពលោកមួយរបស់ ONE ទើបខ្ញុំអាចមានមុខទៅជួបឪពុកម្ដាយរបស់ខ្ញុំវិញបាន»៕